គ្រូ Barcelona ថាត្រូវតែឈ្នះ Celtic យប់នេះ ដើម្បីធានាបានកៅអីវគ្គ១៦ក្រុម

2016-11-23 06:56:23
ចំនួនមតិ 0 | ចំនួនចែករំលែក 0

ចន្លោះមិនឃើញ

Luis Enrique អ្នកចាត់ការក្រុម FC Barcelona បាននិយាយថា ក្រុមអ្នកមានបុណ្យរបស់លោក ត្រូវតែយកឈ្នះម្ចាស់ផ្ទះ Celtic ដាច់ខាតយប់នេះ ដើម្បីធានាកៅអីឡើងទៅវគ្គ១៦ក្រុមចុងក្រោយ UEFA Champions League។

Luis Enrique អ្នកចាត់ការក្រុម FC Barcelona

Barca នឹងត្រូវប៉ះ Celtic នៅកីឡដ្ឋាន Celtic Park វេលាម៉ោង០២:៤៥នាទីយប់នេះ ក្នុងការប្រកួតសន្សំពិន្ទុពូល C។ កាលជើងទី១ នាកីឡដ្ឋាន Camp Nou ក្រុមអ្នកមានបុណ្យ បានលត់ Celtic ទក់សាច់ ៧-០ ខណៈដែលពេលនោះ Lionel Messi ស៊ុតបានហ៊ែតទ្រីក។ បច្ចុប្បន្នក្រុមជើងឯកអេស្ប៉ាញមាន ៩ពិន្ទុ ឈរលេខ១ ពូល C នៅលើ Manchester City ២ពិន្ទុ ហើយយប់នេះ បើពួកគេបានត្រឹមស្មើ ឬឈ្នះ នោះនឹងបានកៅអីឡើងទៅវគ្គ១៦ក្រុម។

Lionel Messi ហ្វឹកហាត់ ត្រៀមប៉ះ Celtic

អ្នកចាត់ការ Enrique និយាយក្នុងសន្និសីទកាសែតម្សិលមិញថា៖ "ការប្រកួតនេះ នឹងមិនដូចកាលប្រកួតទី១ ដែលយើងឈ្នះពួកគេច្រើនគ្រាប់នៅ Camp Nou នោះទេ។ Celtic នឹងមានយុទ្ធសាស្ត្រល្អរបស់គេ ហើយយើងត្រូវតែផ្ដោតអារម្មណ៍ដោយប្រុងប្រយ័ត្ន។ វានឹងក្លាយជាការប្រកួតពិសេស ព្រោះពួកគេជាក្លឹបអស្ចារ្យ មានកីឡដ្ឋានបរិយាកាសល្អ យើងពិតជាពេញចិត្ត។ ក្រុមរបស់យើង មានឱកាសឡើងទៅវគ្គបន្ទាប់ ដូច្នេះយើងត្រូវតែឈ្នះ”។

Barca ធ្លាប់ប៉ះ Celtic ៩ដងនៅ UEFA Champions League ក្នុងនោះ ពួកគេឈ្នះ៧ ស្មើ១ និងចាញ់១។ សម្រាប់ការប្រកួតយប់នេះ ខ្សែប្រយុទ្ធ Luis Suarez ដែលអវត្តមានកាលប៉ះ Malaga ដោយសារជាប់ពិន័យ នឹងអាចចូលលេងជម្រើសដំបូងបានវិញ ខណៈដែល Messi ដែលខកខានប្រកួតមុន ដោយសារមានបញ្ហាឈឺក្រពះដែរនោះ ក៏ត្រៀមបង្ហាញខ្លួនសហការគ្នាជាមួយ Neymar នៅតំបន់ប្រយុទ្ធខាងលើបានធម្មតាផងដែរ៕