ប្រាក់ មុន្នីឧត្ដម ទម្លាយមូលហេតុខ្លួនធ្វើមិនសូវបានល្អនៅ Suzuki Cup
- 2016-11-30 00:00:00
- ចំនួនមតិ 0 | ចំនួនចែករំលែក 0
ប្រាក់ មុន្នីឧត្ដម ទម្លាយមូលហេតុខ្លួនធ្វើមិនសូវបានល្អនៅ Suzuki Cup
ចន្លោះមិនឃើញ
ខ្សែប្រយុទ្ធក្រុមជម្រើសជាតិកម្ពុជា ប្រាក់ មុន្នីឧត្ដម ទម្លាយពីមូលហេតុដែលធ្វើមិនសូវបានល្អក្នុងការប្រកួតពានរង្វាន់ AFF Suzuki Cup នៅប្រទេសមីយ៉ាន់ម៉ាកាលពីពេលកន្លងទៅថ្មីៗនេះ។
ខ្សែប្រយុទ្ធឆ្នើមរបស់ក្រុមព្រះខ័នរាជស្វាយរៀងរូបនេះត្រូវបានអ្នកគាំទ្រមួយចំនួនធំនៅកម្ពុជាសម្គាល់ឃើញថា ហាក់មានទម្រង់លេងធ្លាក់ចុះខ្លាំងខុសប្លែកកាលជួយក្រុមក្នុងវគ្គជម្រុះនៅទឹកដីកម្ពុជា ដែលជួយក្រុមឡើងទៅវគ្គចែកពូល។
ទាក់ទងនឹងបញ្ហានេះអតីតប្រធានក្រុមជម្រើសជាតិកម្ពុជាក្រោមអាយុ ២៣ឆ្នាំរូបនេះបានឲ្យដឹងថា រូបគេបានមានជំងឺគ្រុនក្ដៅពេលទៅដល់ទឹកដីមីយ៉ាន់ម៉ាភ្លាម ក្រោយសម្រាកមានសុខភាពប្រសើរឡើងវិញខំប្រឹងព្យាយាមហ្វឹកហាត់។ ប៉ុន្តែទោះបីជាអត់ធ្មត់ចង់បង្កើនកម្លាំងមកវិញយ៉ាងណាក៏ពិបាក ព្រោះម្យ៉ាងចាញ់អាកាសធាតុផង ទើបធ្វើឲ្យរូបគេហាក់មានការថមថយកម្លាំងខ្លាំងដោយអាចលេងល្អបានត្រឹមតែមួយវគ្គទី១។
ខ្សែប្រយុទ្ធរូបនេះបន្ថែមថា ទោះបីមានសុខភាពមិនសូវល្អក្ដី ឧត្ដម មិនបានផ្ដល់តំណឹងទៅកាន់អ្នកសារព័ត៌មានឬអ្នកផ្សេងដឹងឡើយ ដើម្បីមិនចង់ឲ្យអ្នកគាំទ្រមានការព្រួយបារម្ភ។ ទន្ទឹមនឹងនោះត្រឡប់មកដល់ភ្នំពេញរូបគេនៅមិនទាន់មានសុខភាពធម្មតាវិញនៅឡើយ។
សូមបញ្ជាក់ថា បីប្រកួតរបស់កម្ពុជាក្នុងវគ្គសន្សំពិន្ទុពូល B គឺចាញ់ទាំងបីដោយប្រកួតទី១ ចាញ់ម៉ាឡេស៊ី ៣-២ ប្រកួតទី២ ចាញ់មីយ៉ាន់ម៉ា ៣-១ និងប្រកួតទី៣ ចាញ់វៀតណាម ២-១៕