អស់តែម្នាក់ ៣ម៉ឺនរៀល អាចទទួលសេវាកម្មគ្រប់ ពីរមណីយដ្ឋានបឹងសំរឹទ្ធិ
- 2016-12-06 07:36:20
- ចំនួនមតិ 0 | ចំនួនចែករំលែក 0
អស់តែម្នាក់ ៣ម៉ឺនរៀល អាចទទួលសេវាកម្មគ្រប់ ពីរមណីយដ្ឋានបឹងសំរឹទ្ធិ
ចន្លោះមិនឃើញ
រមណីយដ្ឋានបឹងសំរឹទ្ធិ ជាតំបន់កម្សាន្តបែបកែច្នៃមួយកន្លែងកំពុងល្បីល្បាញខ្លាំងនៅក្នុងខេត្តកំពង់ធំ ស្ថិតនៅក្នុងភូមិបឹងសំរឹទ្ធិ ឃុំបល្ល័ង្ក ស្រុកបារាយណ៍។ ដូច្នេះប្រសិនបើប្រិយមិត្តចង់ទៅកម្សាន្ត នៅបឹងសំរឹទ្ធិនោះ គឺចំណាយត្រឹមតែ ៣ម៉ឺនរៀលប៉ុណ្ណោះ នឹងទទួលបានសេវាកម្មដ៏អស្ចារ្យពីរមណីយដ្ឋានមួយនេះ ដូចជា អាងហែលទឹកមនុស្សធំ-កូនក្មេង ទរំអិល ខ្សែកាបឆ្លងបឹង ប៉េដាឡូ ជិះកង់ សួនកុមារ និង ខ្យូសជុំវិញបឹងសម្រាប់អង្គុយលេងជាដើម។ ក្រៅពីសេវាកម្មកម្សាន្ត បឹងសំរឹទ្ធិ មានសេវាស្នាក់នៅ និង ម្ហូបអាហារផងដែរ។
សេវាកម្មកម្សាន្ត
លោក ទួន គីវ នាយកប្រតិបត្តិនៅរមណីយដ្ឋានបឹងសំរឹទ្ធិ បានប្រាប់ក្រុមការងារ "ផ្លូវទៅស្រុក" ថា រមណីយដ្ឋាននេះមានទីតាំងធំទូលាយហើយមានសេវាកម្មសព្វគ្រប់ ទាំងកន្លែងលេងកម្សាន្ត សេវាស្នាក់នៅ និងម្ហូបអាហារ។ ដូច្នេះ លក្ខណៈពិសេសរបស់រមណីយដ្ឋាននេះ គឺធំទូលាយដែលមានទំហំរហូតដល់ទៅ ៤៧ ហិកតារ និង មានសេវាកម្មចម្រុះតែម្ដង។
"ភ្ញៀវអាចបង់ត្រឹមតែ ៣០ ០០០រៀល អាចលេងតាំងពីព្រឹករហូតដល់ល្ងាច យើងមានខ្ជូស មានភ្លើង មានកង្ហារអត់គិតលុយទេ បានន័យថា គាត់បង់ ៣ម៉ឺន អាចលេងបានទាំងអស់។ ជិះកង់ ទររំអិល ខ្សែកាបឆ្លងបឹង ប៉េដាឡូ អាងហែលទឹកជាដើម។ ក្មេងយើងគិតគូរដែរយើងអត់យកលុយទេ ចំពោះក្មេងតូច អត់លេងកើត តែយើងមានឧបករណ៍ឲ្យក្មេងលេងដែលមានកម្ពស់ ១ម៉ែត្រចុះ។" លោក ទួន គីវ បញ្ចាក់បន្ថែម។
ភ្ញៀវទេសចរទាំងជាតិ និង អន្ដរជាតិ នៅពេលបានទៅកម្សាន្តនៅរមណីយដ្ឋានបឹងសំរឹទ្ធិ សុទ្ធតែលាន់មាត់ថា មានទេសភាពល្អ ខ្យល់បរិសុទ្ធ ជាទីសម្រាកកាយបំបាត់ទុក្ខកង្វល់ ព្រោះតែមានសេវាកម្មចម្រុះ រួមនឹងទេសភាពស្អាតៗ អមដោយសំណង់ អគាររដ្ឋបាលដែលរំលេចទៅដោយសួនច្បារ ចម្រុះពណ៌គួរជាទីចាប់អារម្មណ៍ សង់ផ្ទះ បណ្ដែតទឹក រោងកាហ្វេ ដែលលំអ ដោយសួនច្បារមានផ្ការចម្រុះពណ៌គួរឲ្យចង់ទស្សនាក្រៃលែង។
ចង់ដឹងព័ត៌មានកាន់តែលម្អិតចុចទស្សនាវីដេអូខាងក្រោមនេះ៖
បន្ទប់ស្នាក់នៅ
ក្រៅពីសេវាកម្មកម្សាន្តបឹងសំរឹទ្ធិ ក៏មានទទួលសេវាកម្មធ្វើពិធីជប់លៀង ប្រជុំ ជាដើម។ ទន្ទឹមនឹងនេះ ក៏មានបន្ទប់ស្នាក់នៅសម្រាប់ភ្ញៀវដែលចង់ស្នាក់នៅជាលក្ខណៈកម្សាន្តបែបគ្រួសារ ធ្វើពិធីជប់លៀង ឬ ប្រជុំ និងការកម្សាន្តចុងឆ្នាំរបស់ក្រុមហ៊ុនជាដើម។
នាយកប្រតិបត្តិរមណីយដ្ឋានខាងលើបាននិយាយទៀតថា សេវាកម្មស្នាក់នៅ គឺបែងជា ៤ ប្រភេទ៖
-១. ដំណាក់កោះរំដួល ក្នុង១បន្ទប់តម្លៃ ៦០ដុល្លារ
-២. បឹងហ្គាឡូស្ទឹងជីនិត ក្នុង១បន្ទប់តម្លៃ ៥០ ដុល្លារ
-៣. អូតែល សំរឹទ្ធិ ក្នុង១បន្ទប់តម្លៃ ២០ ដុល្លារ
-៤. តង់បោះជំរុំ
ចំពោះផែនការនៅពេលខាងមុខ បឹងសំរឹទ្ធិ គ្រោងនឹងបង្កើតផ្ទះស្នាក់នៅសម្រាប់គ្រួសារផងដែរ។ លោក ទួន គីវ ប្រាប់ឲ្យដឹងបន្ថែម។
ភោជនីយដ្ឋាន
ក្រៅពីការយកចិត្តទុកដាក់ផ្ដល់សេវាកម្មកម្សាន្ត បន្ទប់ស្នាក់នៅ រមណីយដ្ឋានបឹងសំរឹទ្ធ ក៏មានភោជណីយដ្ឋានខ្លួនឯងដែរ ដែលភ្ញៀវមកកម្សាន្តនៅរមណីយដ្ឋានមួយនេះ អាចកុម្ម៉ង់ម្ហូបតាមតម្រូវការ ដែលផ្ដល់សេវាកម្មល្អ ប្រកបដោយអនាម័យខ្ពស់ និង តម្លៃសមរម្យ។ លោក ទួន គីវ លើកឡើងបន្ថែម។
រមណីយដ្ឋានបឹងសំរឹទ្ធិ បានចាប់ផ្ដើមសាងសង់តាំងពីឆ្នាំ ២០០៦ រហូតដល់ឆ្នាំ ២០១៣ ទើបចាប់ផ្ដើមដំណើរការផ្លូវការ ដែលរមណីយដ្ឋានមួយនេះបានផ្លាស់ប្ដូរពីតំបន់ប្រទាញប្រទង់ និងសម្បូរចោរព្រៃ (អសន្ដិសុខ) ក្លាយជារមណីយដ្ឋានល្បីល្បាញមួយនៅក្នុងខេត្តកំពង់ធំ៕