កែវ រំចង់ រំសាយប៉ះ Iquezang នៅ Thai Fight ព្រោះគ្រោះថ្នាក់ចរាចរណ៍របួសដៃ

2016-12-08 04:52:05
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីប្រកួត Thai Fight រវាងជើងខ្លាំងកម្ពុជា កែវ រំចង់ និងអ្នកប្រដាល់ថៃ Iquezang នាថ្ងៃទី២៤ ខែធ្នូ ឆ្នាំ២០១៦ នេះនឹងត្រូវរំសាយចោល ដោយសារគ្រោះថ្នាក់ចរាចរណ៍រងរបួសប៉ះទង្គិចឆ្អឹងដៃកាលពីពេលថ្មីៗនេះ។

កីឡាករ កែវ រំចង់ (ប្រកួតកន្លងមក)

ក្រៅពីការរំសាយការប្រកួតខាងលើរូបគេក៏បានសុំរំសាយការប្រកួតមិត្តភាពអន្តរជាតិនៅខេត្តព្រះសីហនុរបស់សង្វៀនអប្សរាជាដើម។

បន្ទាប់ពីបានមានរបួសដៃកូនប្រុសរបស់លោក កែវ សំអាង រូបនេះបានឲ្យដឹងថា ក្នុងរយៈពេលប្រមាណជាជាង ៧ខែអ្នកប្រដាល់ល្បីឈ្មោះរូបនេះ នឹងខកខានឡើងសង្វៀន។ គ្រូពេទ្យបានប្រាប់គេឲ្យធ្វើការថែរក្សាសុខភាព ពិសេសរបួសឆ្អឹងដៃដែលកើតឡើងដោយសារគ្រោះថ្នាក់ចរាចរណ៍នៅខេត្តបាត់ដំបង។

បន្ថែមលើសពីនេះ រំចង់ បានឲ្យដឹងទៀតថា រូបគេនឹងត្រូវឡើងសង្វៀនអន្តរជាតិមួយទៀត ដែលធ្វើឡើងនៅទឹកដីសហរដ្ឋអាមេរិកនាកំឡុងខែកក្កដា ឬខែសីហា ឆ្នាំ២០១៧ (មិនទាន់ច្បាស់) ជាមួយអ្នកប្រដាល់ជើងខ្លាំងអាមេរិក។ ចំណែកកម្រិតសមត្ថភាពដៃគូ រំចង់ បានដឹងខ្លះៗថា មានជំនាញក្នុងការប្រើកណ្ដាប់ដៃ ក្រៅពីនោះគឺមិនល្អខ្លាំងឡើយ។

បច្ចុប្បន្ន កែវ រំចង់ ចេញពីមន្ទីរពេទ្យហើយ ដោយសម្រាកនៅផ្ទះលេបថ្នាំ។ ខណៈការប្រកួតនៅលើទឹកដីអាមេរិកនេះគ្រោងធ្វើឡើងនៅខែមករា ប៉ុន្តែដោយសារមានបញ្ហាដូច្នេះត្រូវពន្យារពេលដល់វេលាខាងលើ។ រូបគេត្រូវសម្រាកឲ្យបានល្អរយៈពេល៨ខែ ដើម្បីឲ្យរបួសដៃបានជាសះស្បើយទាំងស្រុង បន្ថែមលើសពីនេះ រំចង់ ត្រូវសម្រកទម្ងន់ ៦៥គីឡូក្រាមផងដែរ ដើម្បីប្រកួត៕