ជុំ ស្រីលីន ស្ត្រីខ្មែរទីមួយឈ្នះពាន Unsung Hero ប្រចាំឆ្នាំ២០១៦ ពីអូស្ត្រាលី

2016-12-15 06:45:47
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ កញ្ញា ជុំ ស្រីលីន ដែលជាប្រធានក្រុមប្រឹក្សាភិបាលនៃសមាគមមនុស្ស និង ក្ដីសង្ឃឹម ត្រូវបានអង្គការ World Relief Australia នៃប្រទេសអូស្ត្រាលី ប្រកាសថាជាម្ចាស់ពានរង្វាន់ Unsung Hero ប្រចាំឆ្នាំ២០១៦។ រីឯពិធីប្រគល់ពានរង្វាន់ នឹងត្រូវធ្វើឡើងនៅថ្ងៃទី១៨ ខែធ្នូនៅក្នុងខេត្តសៀមរាប។

Unsung Hero គឺជាពានសំខាន់មួយផងដែររបស់ប្រទេសអូស្ត្រាលី ដែលប្រគល់ទៅអោយបុគ្គលពិសេសម្នាក់ជារៀងរាល់ឆ្នាំ។ អ្នកទទួលបានពានរង្វាន់នេះ ជាបុគ្គលលះបង់កម្លាំងកាយចិត្ត ក្នុងការជួយសង្គ្រោះមនុស្សដែលរងទុក្ខវេទនា ពង្រឹងនូវសមត្ថភាពរបស់ខ្លួន និង មានភាពម្ចាស់ការលើប្រជាជនក្រីក្រក្នុងសហគមន៍ខ្លួនផ្ទាល់។ ក្រៅពីពានរង្វាន់ កញ្ញាក៏នឹងទទួលបានលិខិតបញ្ជាក់ ព្រមទាំង កាដូជាប៊ិចពិសេសមួយសម្រាប់ឆ្លាក់ឈ្មោះផងដែរ។

មានស្រុកកំណើតនៅខេត្តសៀមរាប ដោយរស់នៅក្នុងគ្រួសារមានជីវភាពខ្សត់ខ្សោយ កញ្ញា ស្រីលីន បានពុះពាររាល់ការលំបាកនានា និង ពង្រឹងសមត្ថភាពខ្លួនឯងតាំងពីក្មេងមក។ ពិសេសគឺមានតែកញ្ញាម្នាក់គត់ដែលបានបញ្ចប់ការសិក្សាផ្នែកអក្សរសាស្ត្រអង់គ្លេសនៅសកលវិទ្យាល័យ ក្នុងចំណោម បងប្អូនទាំង៧នាក់។

មូលហេតុដែលកញ្ញាចង់ផ្លាស់ប្ដូរសហគមន៍របស់ខ្លួន គឺ ដោយសារតែកញ្ញាគិតថា ការអប់រំគឺជារឿងដ៏សំខាន់មួយសម្រាប់ប្រជាជនក្នុងសហគមន៍ ប៉ុន្តែអ្វីដែលសំខាន់ជាងនេះទៅទៀតគឺការចាប់ផ្ដើមធ្វើរឿងនេះ។ កញ្ញាបានចូលបម្រើការងារនៅអង្គការក្រៅរដ្ឋាភិបាលមួយឈ្មោះ សុបិនកុមារ (Child's Dream) ហើយតែងបើកវគ្គបណ្ដុះបណ្ដាលជាច្រើន ដល់បុគ្គលិកប្រចាំអង្គការ និង សមាគមនានា។

មិនតែប៉ុណ្ណោះ កញ្ញាបានឆ្លៀតពេលធ្វើការងារស្ម័គ្រចិត្តនៅក្នុងសមាគមមនុស្ស និង ក្ដីសង្ឃឹម រយៈពេល៥ឆ្នាំដោយពុំយកកម្រៃអ្វីនោះឡើយ។ កញ្ញាគឺជាអ្នកផ្ដល់ប្រឹក្សាយោបល់ដល់នាយកសមាគមសម្រាប់ការអនុវត្តគោលនយោបាយក្នុងសហគមន៍អោយបានត្រឹមត្រូវ និង ការអភិវឌ្ឍន៍សហគមន៍ប្រកបដោយភាពវិជ្ជមាន។ ជាចុងក្រោយ នារីវ័យ៣០ឆ្នាំរូបនេះ បានបង្ហាញទស្សនៈផ្ទាល់ខ្លួនថា៖ "ការនិយាយពាក្យល្អៗ គឺជារឿងមួយដ៏ងាយ ក៏ប៉ុន្តែវាជារឿងមួយដ៏លំបាកក្នុងការធ្វើរឿងល្អៗទាំងនោះ។ វិធីតែមួយគត់ដើម្បីអោយមានការផ្លាស់ប្ដូរគឺ ការធ្វើសកម្មភាពដ៏ត្រឹមត្រូវ។ ដូច្នេះចូរធ្វើខ្លួនអ្នកជាអ្នកផ្លាស់ប្ដូរមួយរូប។"