ទិត្យ ឌីណា ថាបើក្រុមជម្រើសជាតិ ប្រហែលឈ្នះម៉ារ៉ុក All Stars ម្សិលមិញ
- 2016-12-19 02:29:51
- ចំនួនមតិ 0 | ចំនួនចែករំលែក 0
ទិត្យ ឌីណា ថាបើក្រុមជម្រើសជាតិ ប្រហែលឈ្នះម៉ារ៉ុក All Stars ម្សិលមិញ
ចន្លោះមិនឃើញ
ខ្សែបម្រើក្រុម Cambodia All Stars ទិត្យ ឌីណា មានជំនឿចិត្តថា ប្រសិនបើយកក្រុមជម្រើសជាតិកម្ពុជាលេងប្រហែលអាចឈ្នះ បន្ទាប់ពីក្រុមតំណាងឲ្យកម្ពុជា Cambodia All Stars ធ្វើបានត្រឹមស្មើក្រុម ម៉ារ៉ុក All Stars ១-១នៅកីឡដ្ឋាន RSN ម្សិលមិញក្នុងជំនួបមិត្តភាពអន្តរជាតិ។
ទិត្យ ឌីណា ត្រូវបានកាន់តំណែងជាប្រធានក្រុម Cambodia All Stars បន្ទាប់ពីផ្លាស់ប្ដូរ ប្រាក់ មុន្នីឧត្ដម ដែលជាប្រធានក្រុមទីមួយចេញពីទីលាន។ ក្រោយចប់ការប្រកួតភ្លាម ខ្សែបម្រើឆ្នើមក្នុងជម្រើសជាតិកម្ពុជារូបនេះបានបង្ហាញជំនឿចិត្ត បើប្រកួតគ្នារវាងក្រុមជម្រើសជាតិកម្ពុជា និងម៉ារ៉ុក All Stars ម្ចាស់ផ្ទះអាចយកឈ្នះក្រុមភ្ញៀវបាន។
កីឡាកររបស់ក្លឹបប៉ូលិសរូបនេះលើកហេតុផលថា មកពីក្រុម Cambodia All Stars ហ្វឹកហាត់ជាមួយគ្នាមានរយៈពេលខ្លីពេក ទើបធ្វើឲ្យទម្រង់លេងរបស់ក្រុមមិនមានភាពស៊ីចង្វាក់គ្នាល្អ។ ងាកទៅខាងម៉ារ៉ុកវិញ ឌីណា យល់ថា មិនខ្លាំងជាងក្រុមជម្រើសជាតិកម្ពុជាទេ ហេតុនេះបើដាក់ជម្រើសជាតិឲ្យលេងមានភាគរយច្រើនអាចយកឈ្នះបាន។
ខ្សែបម្រើមានភាពប៉ិនប្រសព្វខាងអូសបាល់រូបនេះបញ្ជាក់ទៀតថា បើប្រៀបធៀបទម្រង់លេងក្រុម Cambodia All Stars ភាពស៊ីចង្វាក់គ្នានៅទាបជាងជម្រើសជាតិនៅឡើយ។
សូមបញ្ជាក់ថា ការប្រកួតរវាងក្រុម Cambodia All Stars និងក្រុមម៉ារ៉ុក All Stars គឺដើម្បីរឹតចំណងមិត្តភាពរវាងប្រទេសកម្ពុជា និងប្រទេសម៉ារ៉ុកខួបលើកទី២០ ទំនាក់ទំនងការទូត៕