ទំនៀមទម្លាប់ឡើងគេហដ្ឋានថ្មីពីបុរាណ នាំមកនូវសេចក្ដីសុខ លាភសំណាង
- 2016-12-27 06:33:08
- ចំនួនមតិ 0 | ចំនួនចែករំលែក 0
ទំនៀមទម្លាប់ឡើងគេហដ្ឋានថ្មីពីបុរាណ នាំមកនូវសេចក្ដីសុខ លាភសំណាង
ចន្លោះមិនឃើញ
ពិធីឡើងគេហដ្ឋានថ្មី ជាទំនៀមទម្លាប់របស់ប្រជាជនខ្មែរតាំងពីបុរាណកាលមកម្ល៉េះ។ ឡើងគេហដ្ឋានថ្មីជាពិធីមួយរៀបចំឡើងដើម្បីសុំសេចក្ដីសុខ សួស្ដី មាននិមន្តព្រះសង្ឃ ដើម្បីសូត្រមន្តប្រោះព្រំជាដើម។ ប៉ុន្តែតាមជំនឿពីបុរាណពិធីឡើងគេហដ្ឋានត្រូវធ្វើឱ្យបានត្រឹមត្រូវ តាមក្បួនតម្រា ដូនតាខ្មែរ ទើបមានសុភមង្គល មាសប្រាក់ កែវកងចូលផ្ទះហែហូរ។
បន្ទាប់ពីបានរកគ្រូគន់គូររកវេលាល្អ ដើម្បីឡើងផ្ទះហើយនោះ រឿងដែលមិនត្រូវមើលរំលងនោះ គឺ ត្រូវរៀបចំប្រដាប់គ្រឿងឡើងផ្ទះតាមទំនៀមពីបុរាណយូរលង់ណាស់មកហើយ។ តាមទំនៀមគ្រឿងប្រដាប់ទាំងនោះមានដូចជា បង្អែម១ថាស ចម្អាប១ថាស ស្រូវ១ការុង បន្លែ ផ្លែឈើ។
ក្រៅពីនោះមានប្រដាប់ធ្វើស្រែចម្ការ ដូចជា កាំបិត កណ្ដៀវ កញ្ជើ ល្អី ជាដើម។ ប្រដាប់ស្លៀកពាក់ មានដូចជា ហិបដាក់សំពត់ មួក ឆត្រ។ គ្រឿងអលង្ការ មាស ប្រាក់។ គ្រឿងសំអាងខ្លួន ប្រេងម្សៅ កញ្ចក់ក្រាស់ កន្ត្រៃកាំបិតកោរ។ គ្រឿងដំណេក កន្ទេល ពូក ខ្នើយ មុង និងស្លាបារី ប្រអប់ស្លាបាយព្រលឹង។ ក្អមសម្រាប់ដាក់ទឹកសំរឹទ្ធ បើគ្មានអាចជំនួសផ្ដិលសំរឹទ្ធ សម្រាប់ព្រះសង្ឃសូត្រមន្តប្រោះព្រំ។ បន្ថែមលើសពីនេះទៀតត្រូវមាន ភ្លុក,ស័ង្ខ, ផ្លែដូងទុំបិទមាស១ផ្លែ ឆ្មាញីសម្បុរបីមួយក្បាល។ល។
គ្រឿងប្រដាប់ទាំងនោះត្រូវរៀបចំដាក់នៅផ្ទះថ្មី ហើយបន្ទាប់អាចារ្យត្រូវរកមនុស្សស្រី៦នាក់ដាក់ឈ្មោះ នាងស្រី នាងរ័ត្ន នាងសួស្ដី នាងគង់ នាងកែវ និងម្នាក់ទៀតដាក់ឈ្មោះនាងជ័យ ឈ្មោះទាំង៦ បញ្ចូលគ្នាមានន័យថា កើតមានសេចក្ដីសុខសួស្ដី មានមាសប្រាក់កែវកង ស្ថិតនៅគង់វង្ស មានជោគមានជ័យសិរីមង្គល។ ហើយត្រូវយកគ្រឿងប្រដាប់ទាំងអស់ឱ្យនារីទាំង ៦នាក់កាន់ឡើងលើផ្ទះ នាងស្រីត្រូវកាន់ក្អមឬផ្ដិល នាងរ័ត្នកាន់គ្រឿងស្លា នាងសួស្ដីកាន់សំពត់អាវ នាងគង់កាន់ពូកកន្ទេល នាងកែវកាន់មាសប្រាក់ នាងជ័យកាន់គ្រឿងភ្លុកកុយ។
ក្រៅពីនារីទាំង៦នាក់នេះ ត្រូវរកមនុស្សប្រុសស្រីជាច្រើននាក់ទៀត ឱ្យកាន់របស់ផ្សេងៗទៀតដូចមានរៀបរាប់ខាងលើ ដើរដង្ហែជុំវិញផ្ទះបីជុំ ក្នុងនោះម្ចាស់ផ្ទះត្រូវមានអ្នកបាំងឆត្រឱ្យផង។ វេលានោះត្រូវមានមនុស្សចាស់ ២ទៅ៣នាក់ឡើងទៅលើផ្ទះមុន ហើយធ្វើជាស្រែកសួរថា "អ្នកណាមកពីណាគ្នាច្រើនម្ល៉េះ?” បន្ទាប់មកអ្នកនៅខាងក្រោមត្រូវឆ្លើយថា "មកពីឆ្ងាយនាំគ្រឿងឧបភោគបរិភោគមានមាសប្រាក់កែវកងជាដើមច្រើនណាស់ណា មករកទីលំនៅដោយឮថា មានផ្ទះមួយទំនេរយើងចង់មកនៅផ្ទះនេះ តើយើងនៅបានសេចក្ដីសុខឬទេ?" ខណៈនោះអ្នកនៅខាងលើត្រូវឆ្លើយថា "អើបើអញ្ចឹងអញ្ជើញមកនៅផ្ទះនេះចុះ បើអ្នកណាបាននៅហើយ នឹងបានសេចក្ដីសុខសប្បាយចម្រើនទ្រព្យសម្បត្តិ បរិបូរណ៍គ្រប់ប្រការហោង"។ បន្តទៀតអ្នកហែទាំងអស់គ្នាត្រូវនាំរបស់ទ្រព្យទាំងនោះឡើងលើផ្ទះជាការស្រេច៕