ថៅកែលាលែងតំណែង ក្រោយបុគ្គលិកធ្វើអត្តឃាតខឹងធ្វើការលើសម៉ោង

2016-12-30 04:17:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានភ្នាក់ងារផ្សព្វផ្សាយល្បីឈ្មោះរបស់ជប៉ុនមួយ បានលាលែងពីតំណែងត្រឹម ២៤ម៉ោងប៉ុណ្ណោះ ក្រោយពីរដ្ឋអាជ្ញាបានដាក់ការចោទប្រកាន់ប្រឆាំងនឹងក្រុមហ៊ុនលោក ចំពោះករណីឃាតកម្មរបស់បុគ្គលិកធ្វើការលើសម៉ោងម្នាក់។

អ្នកនាង Matsuri Takahashi

លោក Tadashi Ishii ប្រធានក្រុមហ៊ុន Dentsu Inc. បានប្រាប់អ្នកយកព័ត៌មានថា លោកនឹងទទួលខុសត្រូវចំពោះការស្លាប់របស់បុគ្គលិក គឺអ្នកនាង Matsuri Takahashi ទាំងស្រុង។ នារីវ័យ ២៤ឆ្នាំរូបនេះ បានធ្វើអត្តឃាតកាលពីឆ្នាំមុន បន្ទាប់ពីខាងក្រុមហ៊ុនបង្ខំឲ្យធ្វើការលើសម៉ោងនៅប៉ុន្មានខែទើបចូលដំបូង។

លោក Ishii ទទួលស្គាល់ថាការធ្វើការលើសម៉ោង គឺជាបញ្ហាដ៏ធំសម្រាប់បុគ្គលិកជាង១០០នាក់ដែលម្នាក់ៗកំពុងធ្វើការលើសជាង៨០ម៉ោងក្នុងមួយខែ។

អ្នកស្រី Takahashi បានចាប់ផ្ដើមចូលធ្វើការនៅក្រុមហ៊ុន Dentsu ក្នុងខែមេសា ឆ្នាំ ២០១៥។ បន្ទុកការងារច្រើនឡើងៗនៅខែតុលា ហើយនាងតែងតែត្រលប់មកដល់ផ្ទះវិញនាម៉ោង ៥ព្រឹក និងបានគេងតិចជាង២ម៉ោងប៉ុណ្ណោះ ក្រោយធ្វើការពេញមួយថ្ងៃ និងពេញមួយយប់។

ម៉ោងបន្ថែមរបស់នាងបានកើនដល់ ១០០ម៉ោងក្នុងមួយខែ ធ្វើឲ្យនាងទ្រាំលែងបានក៏លោតសម្លាប់ខ្លួនពីអគារក្រុមហ៊ុននាខែធ្នូ ឆ្នាំ ២០១៥តែម្ដង។ មុនសម្រេចធ្វើអត្តឃាតនាងបន្សល់ទុក Email ផ្ញើជូនម្ដាយដោយសុំមិនឲ្យបន្ទោសនាង។ "ម៉ាក់ ជាម៉ាក់ល្អបំផុតក្នុងលោក។ ប៉ុន្តែហេតុអ្វីការងាររបស់ខ្ញុំមានភាពលំបាកខ្លាំងពេកហើយ?" នាងសរសេរ។

បន្ទាប់ពីរដ្ឋអាជ្ញាសម្រេចចោទប្រកាន់ លោក Ishii បានប្រាប់អ្នកសារព័ត៌មានពីទីស្នាក់ការក្រុមហ៊ុននាថ្ងៃព្រហស្បតិ៍ម្សិលមិញថា "នេះជាអ្វី ដែលមិនគួរបណ្ដោយឲ្យកើតមានឡើងម្ដងទៀតឡើយ"។

គួរបញ្ជាក់ផងដែរ ក្នុងមួយឆ្នាំៗ មានប្រជាជនជប៉ុនប្រមាណ ២០០០នាក់ ធ្វើអត្តឃាត ដោយសារស្ត្រេសនៅកន្លែងការងារ៕