ទិញផ្ទះ និងដី មួយណាមិនសូវប្រឈមនឹងហានិភ័យ?

2017-01-03 01:41:23
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្ននេះកំណើនប្រជាជនក្នុងប្រទេសកម្ពុជា បានកើនឡើងពីមួយឆ្នាំទៅមួយឆ្នាំ ធ្វើឱ្យមានតម្រូវការទៅលើដី និងផ្ទះកាន់តែច្រើន។ ទន្ទឹមនឹងនោះប្រជាពលរដ្ឋមួយចំនួននៅមិនទាន់បានវិភាគឱ្យបានល្អិតល្អន់នៅឡើយពីហានិភ័យជុំវិញ ការទិញផ្ទះនិងដី។ នៅក្នុងជំនួបជាមួយលោក សុត វីរៈ ប្រធានផ្នែកយុទ្ធសាស្ត្រ ក្នុងក្រុមហ៊ុនវាយតម្លៃអចលនទ្រព្យ CPL បានលើកយកករណីជម្រើសក្នុងការទិញផ្ទះនិងដីមួយណាជាជម្រើសដ៏ល្អបំផុតសម្រាប់ប្រជាពលរដ្ឋ។

ចំពោះចំណុចនេះ លោក សុត វីរៈ បានប្រាប់ថា ជាជម្រើសដ៏ល្អបំផុតសម្រាប់ប្រជាពលរដ្ឋដែលមានលុយ គួរតែទិញផ្ទះតែម្ដង។ លោកបន្តទៀតថា ទិញផ្ទះមិនសូវប្រឈមមុខហានិភ័យខ្ពស់ដូចទិញដីនោះទេ។ លក្ខណៈពិសេសដែលទិញផ្ទះខុសពីទិញដីរួមមាន៖

អាចយកទៅវិនិយោគបន្ត៖

នៅត្រង់ចំណុចនេះមានន័យថា ពេលទិញផ្ទះប្រសិនបើមិនចង់ស្នាក់នៅផ្ទះនោះអាចយកជួលបន្តទៀតបាន។ ខណៈទិញដីពិបាកក្នុងការរកអ្នកជួលដី ឬចង់យកដីទៅធ្វើការវិនិយោគព្រោះដីទាមទារលក្ខខណ្ឌច្រើនជាងទិញផ្ទះ ទម្រាំមានអ្នកសម្រេចចិត្តទិញដីនោះ ហើយម្យ៉ាងវិញទៀតប្រសិនបើមានដីហើយ ប៉ុន្តែត្រូវសង់ផ្ទះមួយសារទៀត នាំឱ្យការចំណាយកាន់តែច្រើន។

បញ្ចៀសហានិភ័យ៖

ប្រធានផ្នែកយុទ្ធសាស្ត្រ ប្រចាំក្រុមហ៊ុន CPL បានបន្តទៀតថា ចំពោះដីមុនពេលទិញត្រូវគិតលើបញ្ហាជាច្រើនរួមមាន ស្ថិតនៅចំណុចល្អ មានប្រជាជនរស់នៅច្រើន មានប្រព័ន្ធផ្លូវត្រឹមត្រូវ មានសុវត្ថិភាព។ ប៉ុន្តែប្រសិនទិញផ្ទះតែម្ដងមានន័យថា ម្ចាស់វិនិយោគបានវិភាគរួចអស់ហើយទៅលើចំណុចទាំងនោះ ដូចនេះមិនសូវប្រឈមមុខឡើយ។

ងាយស្រួលក្នុងការលក់វិញ៖

អ្នកដែលទិញដីហើយ ប៉ុន្តែប្រសិនបើចង់លក់វិញត្រូវចំណាយពេលវេលាយូរ ទម្រាំអាចលក់បាន។ ប៉ុន្តែផ្ទះប្រើរយៈពេលលក់លឿនជាងដី ហើយតម្លៃផ្ទះក៏កើនឡើងដែរ ដែលមិនធ្វើឱ្យម្ចាស់ផ្ទះខាតបង់លុយកាក់នោះឡើយ។

លក្ខខណ្ឌផ្ទេរកម្មសិទ្ធិ៖

ចំពោះការទិញដីអាចមានហានិភ័យខ្ពស់ចំពោះការផ្ទេរកម្មសិទ្ធិគឺប្លង់រឹង និងប្លង់ទន់។ ពេលទិញដី អាចទទួលបានប្លង់ត្រឹមប្លង់ទន់ ចេញពីឃុំ សង្កាត់ ឬខណ្ឌ ចំណែកប្លង់រឹងម្ចាស់កម្មសិទ្ធិយកទៅបញ្ចាំបាត់ទៅហើយ នាំឱ្យមានហានិភ័យខ្ពស់។ ប៉ុន្តែចំពោះការទិញផ្ទះ មិនមានករណីស្មុគស្មាញចំពោះបញ្ហានេះឡើយ គឺមានកិច្ចសន្យាទិញលក់ច្បាស់លាស់ និងផ្ទេរសិទ្ធិត្រឹមត្រូវ ព្រោះបើទិញផ្ទះថ្មី គ្មានអ្នកណាធ្លាប់ជាម្ចាស់ពីមុនទេ គឺម្ចាស់វិនិយោគតែម្ដងជាអ្នកលក់។

ទាំងនេះជាចំណុចពិសេសនៃការទិញផ្ទះ។ ប៉ុន្តែ លោក សុត វីរៈ ប្រាប់ថាមិនមែនទិញផ្ទះមិនប្រឈមហានិភ័យនោះទេ ដូចនេះមុនសម្រេចចិត្តទិញផ្ទះ គួររកអ្នកវាយតម្លៃអចលនទ្រព្យដើម្បីប្រឹក្សា និងជួយក្នុងដំណើរការទិញផ្ទះនោះ ឬមួយអ្នកដែលមានជំនាញក្នុងផ្នែកទិញលក់អចលនទ្រព្យនេះ ដើម្បីធានាសុវត្ថិភាព១០០%៕