ពិព័រណ៍រូបថត ផ្លូវទៅស្រុក ធ្វើឲ្យអ្នកទស្សនាចង់ឃើញគម្រោងលើកទី២
- 2017-01-09 08:56:32
- ចំនួនមតិ 0 | ចំនួនចែករំលែក 0
ពិព័រណ៍រូបថត ផ្លូវទៅស្រុក ធ្វើឲ្យអ្នកទស្សនាចង់ឃើញគម្រោងលើកទី២
ចន្លោះមិនឃើញ
ពិព័រណ៍រូបថតផ្លូវទៅស្រុក The Road Home Photo Exhibition បានបញ្ចប់ហើយកាលពីល្ងាចថ្ងៃទី៧ ខែមករា ដោយទាក់ទាញអ្នកទស្សនាប្រមាណជាង ១ពាន់នាក់។ អ្នកជំនាញផ្នែកថតរូប តំណាងក្រុមហ៊ុន ព្រមទាំងអ្នកចូលរួមទស្សនាសុទ្ធតែលាន់មាត់ថា ជាកម្មវិធីដ៏ល្អ និងចង់ឲ្យគម្រោងនេះកើតឡើងជាលើកទី២។
លោក Yves Jassaud ជានាយកផ្នែកគ្រប់គ្រងក្រុមហ៊ុន Total នៅកម្ពុជា បាននិយាយថា លោកពិតជាមានភាពរីករាយយ៉ាងខ្លាំង ដែល Total បានក្លាយជាអ្នកឧបត្ថម្ភមួយសម្រាប់គម្រោង ផ្លូវទៅស្រុក។ លោកបានបង្ហាញចំណាប់អារម្មណ៍ថា កម្ពុជាមានកន្លែងស្អាតៗជាច្រើនដែលគ្មានអ្នកស្គាល់ ហើយកម្មវិធី ផ្លូវទៅស្រុក បានផ្ដិតយកទិដ្ឋភាពទាំងនោះមកចែកជូនអ្នកទស្សនាតែម្ដង។ លោក Yves Jassaud បានបញ្ជាក់ថា ចង់ឃើញកម្មវិធីនេះកើតឡើងជាថ្មី ហើយក្រុមហ៊ុនរបស់លោក រីករាយនឹងឧបត្ថម្ភសម្រាប់គម្រោងថ្មីនោះ។
លោក លន ហ្សាឌីណា ជាអ្នកថតរូបអាជីពម្នាក់នៅទូរទស្សន៍ PNN បានលើកឡើងថា កម្មវិធីផ្លូវទៅស្រុក ពិតជាល្អសម្រាប់ប្រជាជនកម្ពុជា ព្រោះមិនប្រាកដថាពួកគេស្គាល់អស់ខេត្តឡើយ ប៉ុន្តែ Sabay អាចនាំយករូបភាពទាំងនោះមកបង្ហាញជូន តាមរយៈកម្មវិធីផ្លូវទៅស្រុក។ លោកបាននិយាយយ៉ាងដូច្នេះថា៖ "ខ្ញុំដើរមកមើលឃើញ គឺល្អមែនទែន ព្រោះវាប្លែក ហើយរូបខ្លះខ្ញុំបានទៅដល់មែន តែមិនបានថត អាចភ្លេច... ចឹង Sabay ធ្វើនេះ អាចឲ្យមនុស្សដក់អារម្មណ៍លើខេត្តនានា"។ លោក ហ្សាឌីណា បានអះអាងថា ចង់ឃើញគម្រោងនេះ កើតឡើងបន្តបន្ទាប់នៅរដូវកាលក្រោយៗទៀត។
ចំណែក លោក សៅ សីហា ជាតំណាងក្រុមហ៊ុន Sony ក៏បានលើកឡើងស្រដៀងគ្នាថា កម្មវិធីផ្លូវទៅស្រុក ធ្វើឲ្យប្រជាជនបានស្គាល់ពីខេត្តនានា និងរបៀបរស់នៅរបស់ប្រជាជននៅតាមតំបន់ទាំងនោះ។ លោក សីហា បាននិយាយថា៖ "បើខ្ញុំមានស្រុកកំណើតនៅខេត្តមួយ ហើយខ្ញុំឃើញរូបភាពខេត្តហ្នឹង ធ្វើឲ្យខ្ញុំនឹកស្រុកកំណើត ហើយគ្រប់រូបថត និងការចុះផ្សាយសុទ្ធតែជាចំណេះដឹង... ខ្ញុំគិតថា កម្មវិធីនេះគួរតែមានបន្តៗទៀត"។
យុទ្ធនាការជាកញ្ចប់ដែលមានឈ្មោះថា "ផ្លូវទៅស្រុក" រយៈពេល៣ខែ ដើម្បីស្វែងរករឿងរ៉ាវគ្រប់បែបយ៉ាងនៅតាមភូមិ ឃុំ ស្រុក ទូទាំងប្រទេសកម្ពុជា ទើបបញ្ចប់មុនដំណាច់ឆ្នាំ២០១៧ នេះ។ បន្ទាប់មក ក្រុមការងារបានរៀបចំពិព័រណ៍រូបភាពដ៏ធំមួយ "The Road Home Photo Exhibition" រយៈពេល ៥ថ្ងៃ ចាប់ពីថ្ងៃទី០៣ រហូតដល់ថ្ងៃទី ០៧ខែមករា នៅសាលមហោស្រពចតុមុខ ដើម្បីបង្ហាញរូបថតគ្រប់ខេត្តដែលថតបាន។
កម្មវិធី "ផ្លូវទៅស្រុក" រៀបចំឡើងដោយក្រុមហ៊ុន Sabay Digital Corporation នាំមកជូនដោយក្រុមហ៊ុនប្រេងឥន្ធនៈ Total ព្រមទាំងសហការគាំទ្រដោយក្រុមហ៊ុន Angkor Beer, AMK, Smart, Ford និងក្រុមហ៊ុន Sony៕