សារប្រយោជន៍ទាំង៧ ដែលអ្នកនឹកស្មានមិនដល់ពីការបោះជំរំជាក្រុម
- 2017-01-12 08:58:06
- ចំនួនមតិ 0 | ចំនួនចែករំលែក 0
សារប្រយោជន៍ទាំង៧ ដែលអ្នកនឹកស្មានមិនដល់ពីការបោះជំរំជាក្រុម
ចន្លោះមិនឃើញ
ការបោះជំរំជាក្រុមគឺជាសកម្មភាពនៃការហ្វឹកហាត់រៀងកាយខ្លួនឯង រួមជាមួយដំណើរកម្សាន្តទៅកាន់ទីដ៏ស្រស់ស្អាតមួយដែលមនុស្សភាគតិចបានទៅដល់ ជាមួយក្រុមការងារ រឺ មិត្តភក្តិរបស់។ ការបោះជំរំជាក្រុម បានផ្ដល់នូវសារប្រយោជន៍ជាច្រើនមានដូចជា៖
១ ឯករាជ្យភាព
ពិតណាស់ នៅពេលអ្នកធ្វើដំណើរកម្សាន្តជាលក្ខណៈទេសចរណ៍ជាមួយក្រុមគ្រួសារ អ្នកប្រាកដជាស្ថិតនៅក្រោមការរៀបចំរបស់ឪពុកម្ដាយជាមិនខាន។ ហើយមិនអាចធ្វើអ្វីដែលអ្នកចង់ធ្វើច្រើនពេកនោះទេ។ ឧទាហរណ៍ ដើរថតរូបច្រើនសន្លឹក ដើរទិញអីវ៉ាន់បានយូរជាដើម។ ប៉ុន្តែនៅពេលអ្នកទៅបោះជំរំជាក្រុមវិញ អ្នកនឹងមានសេរីភាព និង ពេលវេលាគ្រប់គ្រាន់ក្នុងការទៅទីកន្លែងណាដែលអ្នកពេញចិត្ត និង អាចស្វែងយល់ពីរបស់នានានៅតំបន់នោះ។
២ ការលត់ដំខ្លួន
គោលបំណងនៃការបោះជំរំមិនមែនជាការញ៉ាំអាហារឆ្ងាញ់ៗ និង ដេកស្រួលដូចក្នុងសណ្ឋាគារផ្កាយ៥នោះឡើយ។ អ្នកត្រូវរៀនរស់នៅដោយចេះសម្របខ្លួនទៅនឹងប្រជាជនក្នុងតំបន់ និង បរិភោគអាហារដូចពួកគាត់ដែរ។
៣ ធ្វើអោយមានសុខភាពល្អ
អ្នកអាចស្រម៉ៃឃើញថា ពេលអ្នកដើរកម្សាន្តជាមួយគ្រួសារ អ្នកច្បាស់ជាជិះរថយន្ត ម៉ូតូជាប់ជាមិនខាន។ ប៉ុន្តែការបោះជំរំនៅតាមតំបន់ព្រៃភ្នំ អ្នកគ្មានជម្រើសអ្វីក្រៅពីដើរថ្មើរជើងនោះទេ។ ប៉ុន្តែប្រការនេះនឹងជួយអោយអ្នកមានសុខភាពល្អ ដូចជារាងកាយរឹងមាំ កាត់បន្ថយជំងឺបេះដូង មានភាពរហ័សរហូន ព្រមទាំងមានភាពតស៊ូអំណត់ជាងមុនផងដែរ។
៤ មានអារម្មណ៍ស្រស់ស្រាយ
ពេលដែលអ្នកបានចូលរួមការបោះជំរំ នោះអ្នកនឹងមានអារម្មណ៍ស្រស់ស្រាយសប្បាយអស់ទុក្ខកង្វល់ និង អារម្មណ៍ស្រ្តេសនានា ដោយសារអ្នកបានជួបជាមួយសម្រស់នៃធម្មជាតិដ៍ស្រស់បំព្រងដែលមិនធ្លាប់បានឃើញពីមុនមក។ លើសពីនេះទៅទៀត ការបោះជំរំជាក្រុមតែងមានកម្មវិធីកម្សាន្តប្លែកៗជាច្រើនដូចជា ការរាំច្រៀង ការនិយាយរឿងនិទាន ការលេងហ្គីតា ការសម្លឹងមើលវ៉ូងតារាជាដើម។
៥ មានភាពឆ្នៃប្រឌិត និង ភាពជាអ្នកដឹកនាំ
នៅពេលដែលអ្នកបានផ្ដល់យោបល់ ក៏ដូចជាប្រឹងប្រែងសម្រាប់ការងារក្រុម ពេលនោះអ្នកបានបង្ហាញពីភាពឈ្លាសវៃ ច្នៃប្រឌិតរួចទៅហើយ។ មិនតែប៉ុណ្ណោះការរៀបចំក្រុម ការដាក់ផែនការយុទ្ធសាស្ត្រនានាគឺសុទ្ធតែបង្ហាញពីភាពជាអ្នកដឹកនាំដែលអ្នកកំពុងមាន។
៦ មានទំនាក់ទំនងល្អ និង សាមគ្គីភាព
ជាធម្មតា ការបោះជំរំជាក្រុម តែងមានមនុស្សជាច្រើនចូលរួម ដូចនេះវាជាឱកាសមួយយ៉ាងល្អដែលអ្នកអាចស្គាល់មនុស្សជាច្រើន មានសមត្ថភាពពិសេសផ្សេងៗគ្នា ហើយអ្នកក៏អាចបង្កើនសាមគ្គីភាពរវាងគ្នា និង គ្នាបានផងដែរ។
៧ ចំណេញលុយ
ការបោះជំរំនឹងធ្វើអោយអ្នកចំណាយអស់លុយតិច ព្រោះអ្នកមិនបានចំណាយលើថ្លៃសណ្ឋាគារ ថ្លៃម្ហូបអាហារឆ្ងាញ់ៗយ៉ាងច្រើនសន្ធឹកសន្ធាប់នោះឡើយគឺអ្នកគ្រាន់តែមានតង់ អាហារកំប៉ុង អាហារក្រៀមៗ ទឹកផឹក និង សម្ភារៈមួយចំនួនតាមខ្លួនប៉ុណ្ណោះ គឺជាការស្រេចទៅហើយ។
ប្រភព៖ Anussa Event Planner, Joy Tour & Travel