ប្រធានសហព័ន្ធវាយកូនបាល់អន្តរជាតិមកកម្ពុជាលើកត្តាសំខាន់ពីរ
- 2017-01-12 06:58:55
- ចំនួនមតិ 0 | ចំនួនចែករំលែក 0
ប្រធានសហព័ន្ធវាយកូនបាល់អន្តរជាតិមកកម្ពុជាលើកត្តាសំខាន់ពីរ
ចន្លោះមិនឃើញ
លោក David Haggerty ប្រធានសហព័ន្ធកីឡាវាយបាល់អន្តរជាតិ (ITF ) បានមកទស្សនកិច្ចកម្ពុជាលើកទី១កាលម្សិលមិញដើម្បីជួយរៀបចំកម្ពុជាលើផែនការអភិវឌ្ឍទីលានវាយកូនបាល់ និងនាំគ្រូល្អៗមកពីក្រៅស្រុកមកជួយបង្ហាត់ជម្រើសជាតិកម្ពុជា។
បន្ទាប់ពីបញ្ចប់ការទស្សនកិច្ចទៅលើការរៀបចំប្រព័ន្ធកីឡាករ និងថ្នាលយុវជន ប្រធានសហព័ន្ធវាយកូនបាល់អន្តរជាតិរូបនេះអះអាងថា កម្ពុជាត្រូវការទីលានបន្ថែមទៀត និងគ្រូល្អៗ ពីព្រោះកម្ពុជាមានថ្នាលយុវជនជាច្រើនរហូតដល់១ម៉ឺននាក់ ដែលប្រទេសនៅលើពិភពលោកមិនទាន់មាន។ លោកសង្ឃឹមថា ថ្ងៃអនាគតកម្ពុជានឹងក្លាយជាប្រទេសសំបូរកីឡាករខ្លាំងៗជាក់ជាមិនខាន។
លោក David Haggerty បានស្វែងយល់ពីកម្រិតសមត្ថភាពកីឡាវាយកូនបាល់កម្ពុជាបច្ចុប្បន្នថា មានកម្រិតខ្ពស់ និងអាចប្រកួតប្រជែងជាមួយប្រទេសផ្សេងៗក្នុងតំបន់អាស៊ានបាន ប៉ុន្តែដើម្បីចង់បានលទ្ធផលកាន់តែប្រសើរជាងនេះ ត្រូវបន្តការខំប្រឹងប្រែងឲ្យខ្លាំងបច្ចុប្បន្នទៀត។
ក្រៅពីការសម្លឹងឃើញចំណុចគួរអភិវឌ្ឍទាំងនេះ លោកកំពុងរៀបចំគម្រោងសហការជាមួយកម្ពុជា ជួយជ្រោមជ្រែងលើថ្នាលយុវជន ត្រៀមដណ្ដើមមេដាយឲ្យបានច្រើននាឆ្នាំ២០២៣ ដែលកម្ពុជាធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម។ អ្វីដែលពិសេសទៀតនោះ លោកនឹងប្រឹងប្រែងឲ្យអស់ពីសមត្ថភាព ដើម្បីបំពេញតម្រូវការរបស់កម្ពុជា។
ជាមួយគ្នានោះលោក ទេព រិទ្ធីវិទ្ធ អគ្គលេខាធិការនៃសហព័ន្ធកីឡាវាយកូនបាល់កម្ពុជា សម្ដែងការសប្បាយចិត្តជាខ្លាំងចំពោះវត្តមានរបស់ប្រធានសហព័ន្ធកីឡាវាយកូនបាល់អន្តរជាតិ។ ក្នុងនាមជាថ្នាក់ដឹកនាំផ្នែកនេះមួយរូបលោកនឹងប្រឹងប្រែងបន្ថែមទៀត ដើម្បីមុខមាត់ប្រទេសជាតិ។
លោក David Haggerty ធ្លាប់ទៅទស្សនកិច្ចប្រទេសមួយចំនួនក្នុងអាស៊ាន ដែលពាក់ព័ន្ធកីឡាវាយកូនបាល់នេះគឺ វៀតណាម សិង្ហបុរី ឡាវ ម៉ាឡេស៊ី និងឥណ្ឌូណេស៊ីជាដើម៕