យានយន្តបំពាក់អំពូលឡាស៊ែរ និង LED អាចរងការផាកពិន័យឬទេ?

2017-01-16 06:14:04
ចំនួនមតិ 0 | ចំនួនចែករំលែក 0

ចន្លោះមិនឃើញ

យានយន្តស៊េរីទំនើបមួយចំនួន បានបំពាក់អំពូលឡាស៊ែរ និង LED ដើម្បីបំភ្លឺផ្លូវបានច្បាស់ និងជាផ្នែកមួយនៃការលម្អ ប៉ុន្តែអំពូលខ្លះបានប៉ះពាល់ដល់អ្នកបើកបរបញ្ច្រាសទិសគ្នា រហូតមើលផ្លូវមិនឃើញក៏មាន។ តើការបំពាក់អំពូលឡាស៊ែរ និង LED ដែលចាំងខ្លាំងពេក អាចរងការផាកពិន័យឬទេ?

រូបភាព៖ ស្នងការនគរបាលខេត្តបាត់ដំបង

កាលពីថ្ងៃសៅរ៍កន្លងទៅ ទំព័រហ្វេសប៊ុករបស់ស្នងការនគរបាលខេត្តបាត់ដំបង បានបញ្ជាក់យ៉ាងលម្អិត អមដោយមាត្រាច្បាប់ថា ការប្រើអំពូលLaser ឬ LED មានពន្លឺចាំងខ្លាំងបានធ្វើឲ្យប៉ះពាល់ដល់អ្នកបញ្ជាយានយន្តក្នុងទិសដៅផ្ទុយគ្នា។ ជារឿយៗករណីនេះបានធ្វើឲ្យកើតមានគ្រោះថ្នាក់ចរាចរណ៍ បណ្ដាលឲ្យមានមនុស្សស្លាប់ និងរងរបួស ព្រមទាំងខូចខាតនូវទ្រព្យសម្បត្តិមួយចំនួនធំ ។

ក្នុងរយៈពេលកន្លងទៅ ឧត្ដមសេនីយ៍ស្នងការនគរបាលខេត្តបាត់ដំបង បានបញ្ជាឲ្យនគរបាលចរាចរណ៍ផ្លូវគោក កាក់ត្រួតពិនិត្យយានយន្តដែលធ្វើចរាចរណ៍ពេលយប់ មានបំពាក់អំពូល Laser ឬ LED ត្រូវដោះចេញហើយផាកពិន័យតាមផ្លូវច្បាប់។ ករណីនេះមិនមែនជាករណីទី១ទេ ដែលនគរបាលបានធ្វើ ហើយចំណាត់ការកន្លងទៅ ទទួលបានការគាំទ្រពីប្រជាពលរដ្ឋទូទៅ និងស្របតាម អនុក្រឹត្យលេខ ៨៥ របស់រាជរដ្ឋាភិបាលនៃព្រះរាជាណាចក្រកម្ពុជា និងមាត្រា៣០ នៃច្បាប់ស្ដីពីចរាចរណ៍ផ្លូវគោកនៃព្រះរាជាណាចក្រកម្ពុជា។

តាមមាត្រា៣០ នៃច្បាប់ស្ដីពីចរាចរណ៍ផ្លូវគោកកម្ពុជា បានចែងថា ការបំពាក់សួរសព្ទ ភ្លើងបំភ្លឺ ឬភ្លើងលំអផ្សេងៗទៀត ក្រៅពីការកំណត់លក្ខណៈបច្ចេកទេសរបស់យានជំនិះ ត្រូវហាមឃាត់។

ទោះបែបនេះក្ដី សមត្ថកិច្ចខេត្តបាត់ដំបងបានបញ្ជាក់រួចហើយថា ប្រសិនបើអំពូល Laser ឬ LED ទាំងនោះ ត្រូវបំពាក់ចេញពីរោងចក្រផ្ទាល់ នឹងមិនមានការផាកពិន័យឡើយ៕

ចំណែកមាត្រា៨ នៃអនុក្រឹត្យលេខ៨៥ អនក្រ.បក ចុះថ្ងៃទី០៨ ខែកក្កដា ឆ្នាំ២០១៥ ស្ដីពីការពិន័យអន្តរការណ៍ចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក បានចែងថា ត្រូវពិន័យអន្តរការណ៍ចំពោះអ្នកបើកបរទោចចក្រយានយន្ត ឬទោចក្រយានយន្តសណ្ដោងរ៉ឺម៉ក ឬត្រីចក្រយានយន្តចំនួនទឹកប្រាក់ ២៥០០០(ពីរម៉ឺនប្រាំពាន់) រៀល អ្នកបើកបរយានយន្តធុនស្រាលចំនួនទឹកប្រាក់ ៥០០០០(ប្រាំម៉ឺន) រៀល និងអ្នកបើកបរយានយន្តធុនធ្ងន់ចំនួនទឹកប្រាក់ ១០០ ០០០រៀល(មួយសែន) ចំពោះអំពើល្មើសដូចខាងក្រោម៖

ចំណុច ឆ៖ អ្នកបើកបរយានយន្តល្មើសនឹងការប្រើប្រាស់ភ្លើងបំភ្លឺ ឬកែច្នៃភ្លើងបំភ្លឺ ឬភ្លើងសញ្ញានៃយានមិនត្រឹមត្រូវ៕