ព័ត៌មានបន្ថែម ជុំវិញដំណឹងមរណភាពអ្នកគ្រប់គ្រងទូទៅផលិតកម្មថោន អ៊ា វឌ្ឍនា សាច់ញាតិអះអាងផ្ទុយគ្នា
- 2017-01-18 04:42:40
- ចំនួនមតិ 0 | ចំនួនចែករំលែក 0
ព័ត៌មានបន្ថែម ជុំវិញដំណឹងមរណភាពអ្នកគ្រប់គ្រងទូទៅផលិតកម្មថោន អ៊ា វឌ្ឍនា សាច់ញាតិអះអាងផ្ទុយគ្នា
ចន្លោះមិនឃើញ
ជុំវិញដំណឹងមរណភាពអ្នកគ្រប់គ្រងទូទៅនៅផលិតកម្មថោន អ៊ា វឌ្ឍនា មានព័ត៌មានផ្ទុយគ្នានៅឡើយ ដោយដំបូងឡើយ មិត្តភ័ក្ដិ និងសាច់ញាតិម្នាក់របស់លោកផងបានបញ្ចេញឲ្យ Sabay ដឹងថា អ្នកគ្រប់គ្រងរូបនេះស្លាប់ហើយ។ ប៉ុន្តែភរិយារបស់លោកបានបញ្ចេញថា ស្វាមីអ្នកស្រី មិនទាន់មរណភាពទេ។
កាលពីព្រឹកមិញនេះ ដំណឹងមរណភាពរបស់ អ៊ា វឌ្ឍនា បានធ្វើឲ្យរញ្ជួយក្នុងចង្កោមសិល្បៈ និងមិត្តភក្ដិ ដោយសារតែប្រភពដែលជាមិត្តភក្ដិជិតស្និទ្ធ ក្នុងនោះមានបងថ្លៃលោកផងឈ្មោះ ប្រាក់ ចន្ធុល រស់នៅប្រទេសបារាំង បានបញ្ចេញឲ្យដឹងថា មិត្តភ័ក្ដិ និងសាច់ញាតិរបស់ពួកគេ បានធ្វើមរណកាលទៅហើយ។
មិត្តភ័ក្ដិរួមជំនាន់ និងរួមការងាររបស់លោកផង ជាច្រើនបានបញ្ចេញសារចូលរួមសោកស្ដាយ និងរំលែកទុក្ខព្រោងព្រាតជាមួយគ្រួសារនៃសពនៅលើបណ្ដាញសង្គម។ យ៉ាងនេះ ប៉ុន្មាននាទីមុននេះ ព័ត៌មានអកុសលខាងលើ ត្រូវបានទាត់ចោលដោយស្រ្តីម្នាក់ឈ្មោះ Raxmy Muol ដែលអះអាងថាជាភរិយាលោក អ៊ា វឌ្ឍនា។
ស្រី្តវ័យកណ្ដាលបញ្ចេញសារនៅហ្វេសប៊ុករបស់ខ្លួនថា "អរគុណចំពោះទឹកចិត្តអ្នកទាំងអស់គ្នា នាងខ្ញុំជាភរិយាលោក សូមបញ្ជាក់ថា គាត់មិនទាន់ចាកចេញពីពួកយើងទេ"។ ប្រិយមិត្តដែលជាប់ទាក់ទង និងស្គាល់ ក៏បានចូលរួមអបអរឡើងវិញ និងជូនពរឲ្យលោក ឆាប់សះស្បើយ បន្ទាប់ពីឃើញសារខ្លីនេះ ពីស្ត្រីដែលអះអាងថាជាភរិយាលោក អ៊ា វឌ្ឍនា។
ជុំវិញបញ្ហានេះដែរ លោក ប្រាក់ ចន្ធុល ជាបងថ្លៃលោក វឌ្ឍនា ដែលបានប្រាប់ Sabay ពីមុនថា ប្អូនថ្លៃលោកស្លាប់ហើយនោះ បានបញ្ជាក់ប្រាប់ម្ដងទៀតថា សាច់ថ្លៃរបស់លោករូបនេះ មិនទាន់ផុតដង្ហើមទេ។
ប៉ុន្តែលោកបានបញ្ជាក់ថា លោក វឌ្ឍនា ដែលជាប់ជាមួយបំពង់អុកស៊ីហ្សែន ស្ថិតក្នុងអការមិនដឹងខ្លួនឡើយ និងមានសង្ឃឹមតិចតួចបំផុត។
Sabay នឹងរាយការណ៍បន្តបន្ទាប់ជុំវិញករណីនេះ ប្រសិនបើមានព័ត៌មានវិវត្តន៍ថ្មី