បុរសខ្មែរអ្នកគាំទ្រ Apple ដ៏ស្មោះស្ម័គ្រម្នាក់ ដាច់ចិត្តលក់ iPod ឡៃឡុងចោលព្រោះតែ....
- 2017-01-19 06:17:36
- ចំនួនមតិ 0 | ចំនួនចែករំលែក 0
បុរសខ្មែរអ្នកគាំទ្រ Apple ដ៏ស្មោះស្ម័គ្រម្នាក់ ដាច់ចិត្តលក់ iPod ឡៃឡុងចោលព្រោះតែ....
ចន្លោះមិនឃើញ
អ្នកគាំទ្រផលិតផល Apple ដ៏ស្មោះស្ម័គ្រម្នាក់ បានសម្រេចចិត្តប្រកាសដាក់លក់ឧបករណ៍ស្ដាប់តន្ត្រីដែលខ្លួនស្រលាញ់លើអនឡាញគឺ iPod 6 ដោយហេតុផល Apple លែងផលិត iPod ជំនាន់ថ្មីទៀត។
លោក ពៅ រតនៈ បានឲ្យ Sabay ដឹងថា លោកចូលចិត្តលេងភ្លេង និងស្ដាប់តន្ត្រីណាស់ ជាពិសេសជាមួយឧបករណ៍ស្ដាប់តន្ត្រី iPod 6 នេះតែម្ដងព្រោះវាជាមិត្តយល់ចិត្តលោកជាងគេ ម៉្យាងវាដើរលឿន (iOS 10.2) ស្រួលប្រើ មិនសូវឡើងកម្ដៅខ្លាំង ទោះប្រើច្រើនម៉ោងក៏ដោយ។
បុរសសម្បុរស្រអែមដៃកាន់ហ្គីតារូបនេះបានបន្តថា សព្វថ្ងៃលោកមាន iPhone 5s មួយគ្រឿង ដែលទិញយកមកប្រើយូរដែរហើយ ចំណែកឯ iPod6 នេះវិញទើបនឹងទិញមកប្រើបានប្រមាណជា ៣ ខែ ប៉ុណ្ណោះ។ លោកចូលចិត្ត iPod នេះខ្លាំងណាស់ ទោះជាទិញមកដើម្បីតែលេង Facebook និងស្ដាប់ចម្រៀងក៏ដោយ ប៉ុន្តែដាច់ចិត្តលក់វាវិញព្រោះដឹងថា Apple លែងផលិត iPod ជំនាន់ថ្មីទៀត។ មួយទៀត លោកដាច់លុយដែរ(សើច) ហើយថា បើ Apple ធ្វើ iPod ជំនាន់ថ្មី លោកប្រាកដជាទិញប្រើម្ដងទៀត។
ក្រុមហ៊ុនផលិតគ្រឿងអេឡិចត្រូនិកយក្ស Apple បានប្រកាសឈប់ផលិតឧបករណ៍ស្ដាប់តន្ត្រី iPod តាំងពីខែកញ្ញាឆ្នាំ ២០១៤ មកម៉្លេះ ប៉ុន្តែនៅតាមបណ្ដាហាងលក់ទូរសព្ទមួយចំនួនក្នុងស្រុកនៅតែមានចែកចាយលក់ជាប្រចាំ៕