គន្លឹះសំខាន់ៗដើម្បីឲ្យបុគ្គលិកធម្មតាចំណាយពេលត្រឹម១ឆ្នាំ ក្លាយជាថ្នាក់ដឹកនាំក្នុងក្រុមហ៊ុនមួយ

2017-01-20 07:09:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ការអភិវឌ្ឍខ្លួនឯងក្នុងនាមជាបុគ្គលិកធម្មតាម្នាក់ ឱ្យមានដំណែងខ្ពស់ក្នុងក្រុមហ៊ុនមួយមិនមែនជារឿងងាយស្រួលនោះទេ ហើយបើចង់ក្លាយជាអ្នកដឹកនាំក្នុងក្រុមហ៊ុនត្រឹមរយៈពេលខ្លីកាន់តែពិបាកទៀត។ តើមានគន្លឹះសំខាន់ៗអ្វីខ្លះ ដើម្បីក្លាយជាបុគ្គលិកមានដំណែងខ្ពស់ក្នុងក្រុមហ៊ុនមួយត្រឹមរយៈពេលខ្លី?

អ្នកស្រី យូ បូរី អគ្គនាយិកាក្រុមហ៊ុន Top Talent Consulting ធ្លាប់ធ្វើការក្នុងក្រុមហ៊ុនមួយ ជាបុគ្គលិកធម្មតាត្រឹមតែមួយឆ្នាំប៉ុណ្ណោះ បន្ទាប់មកអ្នកស្រីបានក្លាយជាថ្នាក់ដឹកនាំក្នុងក្រុមហ៊ុនមួយ បានចែករំលែកបទពិសោធន៍ដូចខាងក្រោម៖

១. ត្រូវបង្កើតគោលដៅខ្លួនឯង

ដើម្បីឆាប់ឡើងដំណែងនៅក្នុងក្រុមហ៊ុនមួយ អ្នកស្រី យូ បូរី អគ្គនាយិកាក្រុមហ៊ុន Top Talent Consulting បានប្រាប់ថា ជាបុគ្គលិកដ៏ឆ្លាតវៃ គឺត្រូវចេះកំណត់គោលដៅដោយខ្លួនឯងថាចង់មានដំណែងតួនាទីអ្វីនៅក្នុងក្រុមហ៊ុននោះ។ ជាក់ស្ដែងតាមបទពិសោធន៍របស់អ្នកស្រីផ្ទាល់ធ្លាប់ធ្វើការ ជាបុគ្គលិកធម្មតារយៈពេលត្រឹមតែ ១ឆ្នាំប៉ុណ្ណោះតែអាចក្លាយជាថ្នាក់ដឹកនាំក្នុងក្រុមហ៊ុន គឺមកពីអ្នកស្រីបានកំណត់ខ្លួនឯងថាត្រូវតែធ្វើការក្នុងតួនាទីនោះឱ្យបាន។ ប្រសិនបើពុំមានគោលដៅច្បាស់ លាស់ក្នុងការធ្វើការក្នុងក្រុមហ៊ុនណាមួយនោះទេ គឺមិនងាយនឹងឡើងដំណែងតួនាទីឡើយ។

២. ការតាំងចិត្ត

គ្រប់ការងារដែលថ្នាក់ដឹកនាំប្រគល់ឱ្យធ្វើ ត្រូវតែធ្វើឱ្យបានសម្រេច តាមរយៈការតាំងចិត្តក្នុងការធ្វើការឱ្យបានល្អកុំឡេះឡោះលេងសើច។ អគ្គនាយិកាក្រុមហ៊ុន Top Talent Consulting បន្តទៀតថា ទោះបីជាសមត្ថភាពមិនខ្លាំងណាស់ណា ប៉ុន្តែប្រសិនបើមានការតាំងចិត្តគឺអាចធ្វើបានដូចគ្នា។ មិនត្រឹមតែប៉ុណ្ណោះការតាំងចិត្តគឺបង្ហាញអំពីគុណតម្លៃនៃបុគ្គលិកនោះ ដែលស្រឡាញ់ការងារខ្លាំងទើបតាំងចិត្តធ្វើរហូតបានសម្រេច និងមានលទ្ធផលល្អ។

៣.ជួយការងារអ្នកដ៏ទៃ

តាមរយៈបទពិសោធន៍របស់អ្នកស្រីផ្ទាល់ ដើម្បីក្លាយជាបុគ្គលិកជោគជ័យប្រើរយៈពេលខ្លីដើម្បីឆាប់ឡើងដំណែងនោះ គឺការជួយការងារបុគ្គលិកដូចគ្នាក្នុងក្រុមហ៊ុន។ ចេះជួយការងារអ្នកដទៃមិនត្រឹមតែបង្ហាញថាជាមនុស្សដែលមានគុណធម៌ សីលធម៌ប៉ុណ្ណោះទេ ប៉ុន្តែជាការបង្ហាញទៅដល់ថ្នាក់ដឹកនាំក្នុងក្រុមហ៊ុន ឱ្យមើលឃើញពីសមត្ថភាពរបស់ខ្លួនមិនត្រឹមតែអាចធ្វើការងាររបស់ខ្លួនបានល្អប៉ុណ្ណោះទេ ប៉ុន្តែថែមទាំងអាចជួយការងារអ្នកដទៃបានទៀត។

៤. ជួយធ្វើការមេ

ត្រង់ចំណុចនេះអ្នកស្រី យូ បូរី ប្រាប់ថា ត្រូវចេះជួយធ្វើការមេរបស់ខ្លួនឯង ព្រោះនេះជាឱកាសដ៏ល្អបំផុតដើម្បីរៀនសូត្រតាមគាត់។ អ្នកស្រីបន្តថា ត្រូវចេះលួចរៀនដោយខ្លួនឯងថា មូលហេតុអ្វីទើបជាគាត់អាចទទួលបានដំណែងនេះ តើភាពជាអ្នកដឹកនាំត្រូវមានចំណុចអ្វីខ្លះ? ម្យ៉ាងវិញទៀតការជួយធ្វើការមេនេះ អ្នកស្រីប្រាប់ថា អាចជួយឱ្យសិក្សាពីការងារកាន់តែច្បាស់ និងជួយអភិវឌ្ឍសមត្ថភាពកាន់តែប្រសើរ៕