អធិការស្រុកកោះធំ សុខចិត្តផ្ដល់ជម្រើសទិញមួកការពារ ជំនួសការផាកពិន័យ

2017-01-20 11:46:04
ចំនួនមតិ 0 | ចំនួនចែករំលែក 0

ចន្លោះមិនឃើញ

អធិការនគរបាលស្រុកកោះធំ ឈឿន ប៊ុនឆន បានបង្ហោះលើបណ្ដាញសង្គមផ្ទាល់ខ្លួននៅរសៀលនេះថា លោកបានសម្រេចចិត្តផ្ដល់ជម្រើស២ សម្រាប់អ្នកល្មើសច្បាប់ចរាចរណ៍ ដោយទី១ ផាកពិន័យតាមច្បាប់ចេញវិក្កយបត្រ និងទី២ គឺតម្រូវឲ្យទិញមួក ទិញកញ្ចក់ភ្លាមៗតាមតម្លៃដើម ដោយមិនមានការផាកពិន័យបន្ថែម។

អធិការនគរបាលស្រុកកោះធំ ឈឿន ប៊ុនឆន

តាមបណ្ដាញសង្គម Facebook ផ្ទាល់ខ្លួន លោកវរសេនីយ៍ទោ ឈឿន ប៊ុនឆន បានបង្ហោះថា "ខ្ញុំហ៊ានចុះលើផ្លូវអនុវត្តច្បាប់ចរាចរណ៍ផ្លូវគោកថ្ងៃនេះ ខ្ញុំក៏ហ៊ានទទួលយកការជេរ ឬរិះគន់គ្រប់បែបយ៉ាងផងដែរ។ រវាងអត់មួកអត់កញ្ចក់ផាកសរុប ៣៥.០០០ រៀល ហើយនិងទិញមួកទិញកញ្ចក់ថ្មីពាក់ភ្លាមៗ តើជ្រើសរើសមួយណា?”

លោកក៏បានបញ្ជាក់បន្ថែមថា នៅព្រឹកថ្ងៃទី២០ ខែមករានេះ កម្លាំងផ្នែកជំនាញនៃអធិការដ្ឋាននគរបាលស្រុកកោះធំ បានសហការជាមួយកម្លាំងផ្សេងទៀត ដែលមានគ្នាសរុបប្រមាណ ៤០នាក់ ចុះអនុវត្តរឹតបន្តឹងច្បាប់ចរាចរណ៍ផ្លូវគោកថ្មី នៅគោលដៅ២ គឺភូមិកំពង់ស្វាយក្រោម និងភូមិព្រែកធន់ ឃុំព្រែកថ្មី ស្រុកកោះធំ ខេត្តកណ្ដាល។

សម្រាប់អ្នកល្មើសច្បាប់ចរាចរណ៍ ត្រូវបានផ្ដល់ជម្រើស២ ឲ្យជ្រើសរើស៖

ទី១៖ បើសិនជាគាត់អត់មួក គឺធ្វើការផាកពិន័យតាមច្បាប់ដោយចេញវិក្កយបត្រ ១៥.០០០ រៀល ។ ទី២៖ បើសិនជាគាត់មិនចង់អោយផាកពិន័យ គឺកម្លាំងមានសមត្ថកិច្ចសម្រួលចែកជូនមួកសុវត្ថិភាពចំនួន១ ក្នុងតម្លៃ ១៥.០០០រៀល ដោយមិនមានការផាកពិន័យបន្ថែម ។

ជាលទ្ធផល ក្នុងការអប់រំចែកជូនមួកសុវត្ថិភាពនេះ ឃើញថាប្រជាពលរដ្ឋមានការសប្បាយចិត្ត និងព្រមទទួលយកមួកសុវត្ថិភាពអស់ចំនួន ៧០មួក ។ ដោយឡែកកញ្ចក់ម៉ូតូក៏ធ្វើរូបមន្តបែបនេះដែរ បើមិនចង់អោយផាកពិន័យ គឺទិញថ្មីមកបំពាក់មុខសមត្ថកិច្ច៕

អត្ថបទ៖ គង់ វិសាល