អស្ចារ្យ! Rooney បំបែកកំណត់ត្រា ស៊ុតឲ្យក្រុម Man Utd ២៥០គ្រាប់

2017-01-22 02:55:33
ចំនួនមតិ 0 | ចំនួនចែករំលែក 0

ចន្លោះមិនឃើញ

Wayne Rooney ខ្សែប្រយុទ្ធក្រុម Manchester United បានបំបែកកំណត់ត្រាវីរបុរសក្លឹប Sir Bobby Charlton ក្លាយជាអ្នកស៊ុតបញ្ចូលទីច្រើនជាងគេបំផុតក្នុងប្រវត្តិសាស្ត្រក្រុមបិសាចក្រហម បន្ទាប់ពីស៊ុតគ្រាប់ទី២៥០ យ៉ាងអស្ចារ្យយប់មិញ។

Rooney (លេខ១០) រត់អបអរ ក្រោយស៊ុតចូលយប់មិញ

កីឡាករជម្រើសជាតិអង់គ្លេសរូបនេះ ស៊ុតហ្វ្រីឃីកដ៏អស្ចារ្យនៅនាទី៩០+៤ ជួយឲ្យ Man Utd តាមស្មើម្ចាស់ផ្ទះ Stoke City ១-១ យប់មិញ។ កំណត់ត្រាចាស់ Sir Bobby ធ្លាប់ស៊ុតឲ្យ Man Utd ច្រើនជាងគេបំផុត ២៤៩គ្រាប់ ក្នុង៧៥៨ប្រកួត ចន្លោះឆ្នាំ១៩៥៦-១៩៧៦។ ប៉ុន្តែកំណត់ត្រាថ្មី Rooney ស៊ុត២៥០គ្រាប់ ត្រឹមតែ៥៤៦ប្រកួត តាំងពីចូលលេងឲ្យបិសាចក្រហម ឆ្នាំ២០០៤មក។

Rooney ផ្ទេរពីក្លឹប Everton ទៅកីឡដ្ឋាន Old Trafford កាលឆ្នាំ២០០៤ ក្នុងតម្លៃ២៧លានផោន កាលជំនាន់លោក Sir Alex Ferguson នៅដឹកនាំក្រុមបិសាចក្រហម ហើយតាំងពីពេលនោះមក រូបគេគឺជាតួអង្គដ៏សំខាន់បំផុត ដែលជួយឲ្យ Man Utd ឈ្នះពានជាច្រើន។ កីឡាករវ័យ៣១ឆ្នាំរូបនេះ ក៏ទើបបំបែកកំណត់ត្រា ក្លាយជាអ្នកស៊ុតច្រើនជាងគេបំផុតនៅជម្រើសជាតិអង់គ្លេស ៥៣គ្រាប់ផងដែរ កាលឆ្នាំ២០១៥៕