ចេញតម្លៃកៅស៊ូខ្ពស់គួរឱ្យភ្ញាក់ផ្អើល ប្រជាពលរដ្ឋកំពុងរំភើបចិត្តយ៉ាងខ្លាំង

2017-01-23 10:12:34
ចំនួនមតិ 0 | ចំនួនចែករំលែក 0

ចន្លោះមិនឃើញ

តម្លៃដំណាំកៅស៊ូសម្រាប់បងប្អូនប្រជាពលរដ្ឋដាំជាលក្ខណៈគ្រួសារ មានការកើនឡើងថ្លៃគួរឱ្យកត់សម្គាល់។ តាមការឱ្យដឹង ពី លោក ភារៈ រតន កសិករក្នុងខេត្តត្បូងឃ្មុំ បានប្រាប់មកកាន់ Sabay ថាគិតត្រឹមថ្ងៃទី ២៣ ខែមករានេះមានក្រុមហ៊ុនមួយចំនួនបានទិញកៅស៊ូ ពីប្រជាពលរដ្ឋក្នុង ១គីឡូក្រាម រហូតទៅដល់ ៧០០០រៀល ដែលនេះជាតម្លៃកើនឡើងយ៉ាងខ្លាំងបើធៀបនឹងឆ្នាំ ២០១៦។

លោក រតន បានប្រាប់ថា កៅស៊ូចាប់ផ្ដើមឡើងតាំងពីដើមខែ ពី ៦៥០០ រៀល រហូតដល់៧០០០រៀលគិតមកត្រឹមថ្ងៃនេះ។ លោកបានបន្តទៀតថា កៅស៊ូអាចនឹងបន្តឡើងថ្លៃទៀតក្នុងឆ្នាំនេះ ដែលធ្វើឱ្យប្រជាពលរដ្ឋកំពុងមានកម្លាំងចិត្តយ៉ាងខ្លាំងក្នុងការដាំកៅស៊ូបន្តទៀត។ ប៉ុន្តែចំពោះការកើនឡើងថ្លៃកៅស៊ូនេះគឺសម្រាប់ប្រជាពលរដ្ឋ ដែលដាំជាលក្ខណៈគ្រួសារតែប៉ុណ្ណោះ។

កសិករដាំដំណាំកៅស៊ូរូបនេះបន្តទៀតថា ក្នុងមួយហិចតា ជាទូទៅកៅស៊ូអាចប្រមូលផលបាន ជាង១តោន គឺអាស្រ័យទៅលើប្រភេទដី ជាទូទៅប្រសិនបើដាំលើដីក្រហម នឹងទទួលបានទិន្នផលល្អ បូកផ្សំនឹងការប្រើប្រាស់ជីផងដែរ។ ចំពោះការនាំចេញវិញ លោកពូ រតន ប្រាប់ថា នាំចេញទៅប្រទេសវៀតណាម ដែលជាឈ្មួញកណ្ដាល។ បន្ទាប់មកទៀតវៀតណាមនឹងនាំចេញបន្តទៅកាន់ប្រទេសចិន ម៉ាឡេស៊ី សិង្ហបុរីជាដើម។

លោកពូក៏បញ្ជាក់ផងដែរថា ចំពោះតម្លៃ ៧០០០ រៀលក្នុងមួយគីឡូនេះសម្រាប់ជ័រកៅស៊ូស្រស់យកចេញពីដើម តែនៅពេលដែលចម្រាញ់ជាកៅស៊ូស្ងួតនោះនឹងបានតម្លៃខ្ពស់ជាងនេះទៀត។ លោកពូ រតន លើកឡើងថា ប្រសិនប្រជាពលរដ្ឋអាចមានលទ្ធភាព ក្នុងការចម្រាញ់ជ័រកៅស៊ូ ដោយខ្លួនឯងនោះជីវភាពកាន់តែប្រសើរឡើងជាងនេះទៀត ដោយមិនចាំបាច់លក់បន្តឱ្យទៅក្រុមហ៊ុននោះទេ។

បន្ថែមពីលើពីកសិករដាំដំណាំកៅស៊ូរូបនេះទៀត បុគ្គលិកផ្នែកទីផ្សារក្នុងក្រុមហ៊ុនឯកជនមួយកន្លែង សុំមិនបញ្ចេញឈ្មោះ ក្នុងខេត្តកំពង់ចាម ក៏បានឱ្យដឹងផងដែរថា ចំពោះមូលហេតុដែលតម្លៃកៅស៊ូឡើងថ្លៃខ្ពស់ដូច្នេះ គឺមកពីតម្រូវការមានការកើនឡើងខ្លាំង ចំណែកឯការផ្គត់ផ្គង់នៅមានចំនួនតិច បើធៀបនឹងឆ្នាំចាស់។ ម្យ៉ាងវិញទៀតដោយសារតែលក្ខណៈសេដ្ឋកិច្ចក្នុងប្រទេសកម្ពុជា មានការរីកចម្រើន អាចឲ្យប្រជាពលរដ្ឋមានលទ្ធភាពក្នុងការទិញជីមកប្រើប្រាស់កាន់តែច្រើន ធ្វើឱ្យដំណាំកៅស៊ូមានគុណភាពល្អ ឯតម្លៃដំណាំកៅស៊ូកើនឡើងទៅតាមនោះដែរ៕

អត្ថបទ៖ វឌ្ឍនៈ