គិតម៉េចវិញ iPhone 8 នឹងដំឡើងនៅឥណ្ឌាវិញម្ដង?

2017-01-24 02:50:47
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បានចាប់ផ្ដើមស្វះស្វែងសម្លឹងរកដៃគូដំឡើង iPhone នៅក្នុងប្រទេសឥណ្ឌា ដើម្បីជាថ្នូរដូរយកការបើកហាងលក់រាយនៅក្នុងប្រទេសនេះ។ តាមការចុះផ្សាយរបស់ 9to5 Mac ដៃគូសំខាន់របស់ Apple លើកនេះមិនមែនជា Foxconn ឡើយ។

ផ្ទុយទៅវិញ Apple បានជ្រើសរើសក្រុមហ៊ុន Wistron ជាដៃគូសំខាន់ ដោយក្រុមហ៊ុននេះមានរោងចក្រផលិតស្មាតហ្វូននៅប្រទេសឥណ្ឌាស្រាប់ ប៉ុន្តែ Foxconn និងដៃគូផ្គត់ផ្គង់ដទៃទៀតស្ថិតនៅជាទ័ពជំនួយ ករណីដែលតម្រូវការផលិតកើនឡើង។ កន្លងមក Apple បានជួបពិភាក្សាជាមួយរដ្ឋាភិបាលឥណ្ឌាជាញឹកញាប់ដើម្បីពិភាក្សាពីផែនការអនាគតសម្រាប់ទីផ្សារស្មាតហ្វូនដ៏ធំមួយនេះ។ ក្រុមហ៊ុននេះចង់បើកហាងលក់រាយប៉ុន្មានកន្លែងនៅឥណ្ឌាប៉ុន្តែច្បាប់មិនអនុញ្ញាតឡើយ។ លុះត្រាតែ Apple ផលិតផលិតផលរបស់ខ្លួននៅឥណ្ឌា ៣០% ទើបអាចបើកហាងលក់រាយបាន។

ក្រុមហ៊ុនបច្ចេកវិទ្យាយក្សនេះក៏ធ្លាប់បានសុំការអនុគ្រោះពន្ធពីរដ្ឋាភិបាលឥណ្ឌាដើម្បីឲ្យសង្វាក់ផលិតកម្មនៅឥណ្ឌារបស់ខ្លួនប្រព្រឹត្តទៅដោយរលូន ប៉ុន្តែរដ្ឋាភិបាលឥណ្ឌាបានច្រានចោលសំណើរនេះកាលពីដើមខែកន្លងទៅ៕

ប្រភព៖ 9to5Mac ប្រែសម្រួល៖ សុខហេង