រកឃើញមូលហេតុពិត ដែលធ្វើឲ្យកុមារខ្លះអាចចាំជាតិបាន

2017-01-30 10:01:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តប្រហែលជាធ្លាប់បានលឺថាមានកុមារមួយចំនួនដែលមានអាយុត្រឹម ៥-៨ ឆ្នាំអាចចាំជាតិរបស់ខ្លួនឯងបាន ហើយរៀបរាប់ថាជាតិមុនខ្លួនជានរណា មកពីណា និង ស្លាប់ដោយសារអ្វីទៀតផង។ ចំណុចនេះហើយដែលធ្វើអោយមានមនុស្សជាច្រើនបានឆ្ងល់ និង ជឿជាក់ថាវាជាការពិត។ ប៉ុន្តែតើមនុស្សយើងពិតជាអាចចាំជាតិរបស់ខ្លួនឯងបានមែនរឺយ៉ាងណា?

រូបតំណាង

តាមការសិក្សាស្រាវជ្រាវរបស់សាស្ត្រាចារ្យ ប្រាជ្ញ ជុំ ដោយបានធ្វើការវិភាគផ្អែកលើវិជ្ជាពេទ្យ ជីវសាស្ត្រ និង ទស្សនៈវិជ្ជាផងនោះបានបង្ហាញថា កុមារដែលកើតមកហើយអាចចាំជាតិបាននោះ គឺ ដោយសារ វាមានជាប់ទាក់ទងទៅនឹងម្ដាយបង្កើតរបស់ខ្លួន តាំងពីនៅក្នុងផ្ទៃម្ដាយមកម្ល៉េះ។

លោកបានពន្យល់ថា នៅក្នុងស្បូនរបស់ម្ដាយ មានសរសៃវិញ្ញាណជាច្រើនដែលបានតភ្ជាប់ទៅនឹងទារក ដូចជាការទទួលយកអាហារជាមួយម្តាយ ការបញ្ចេញចោលជាមួយម្តាយ ការដកដង្ហើមជាមួយម្តាយជាដើម។ ទាំងអស់នេះវាបានធ្វើអោយឈាមរបស់ទារកធ្វើចលនាស្របគ្នាទាំងស្រុងជាមួយឈាមម្តាយ ដែលជាហេតុនាំអោយទារក និង ម្តាយអាចមានទំនាក់ទំនងផ្លូវចិត្តជាមួយគ្នា។

ប្រសិនបើម្តាយមានអារម្មណ៍មិនស្រួល នោះក៏អាចនាំអោយទារកក្នុងផ្ទៃប្រែប្រួលទៅតាមនោះដែរ។ ជាពិសេសពេលដែលស្រ្តីជាម្តាយរំភើបខ្លាំង រឺ ភ័យតក់ស្លុតខ្លាំង វានឹងធ្វើអោយខួរក្បាលរបស់គាត់កម្រើកឡើង ដោយបង្កើតជារូបភាពស្រមើស្រមៃដូចទៅនឹងព្រឹត្តិការណ៍មួយនោះ។ បន្ទាប់មក វាក៏បញ្ជូនព័ត៌មានទាំងនោះទៅកាន់ខួរក្បាលរបស់ទារកក្នុងផ្ទៃផងដែរ ដោយបានកត់ត្រានូវព្រឹត្តិការណ៍មួយនោះ។

រូបតំណាង

ជាក់ស្ដែង មានរឿងមួយដែលលោក សាស្ត្រាចារ្យ ប្រាជ្ញ ជុំ បានលើកឡើងយកមកបរិយាយនៅក្នុងសៀវភៅរបស់គាត់។ រឿងនេះកើតឡើងនៅកំពង់កន្ទួត ដោយមានក្មេងស្រីម្នាក់អាយុមិនទាន់បាន១០ឆ្នាំផង ប៉ុន្តែនាងអាចនិយាយរៀបរាប់អំពីជាតិមុនរបស់នាងបាន។ នាងប្រាប់ថា ជាតិមុននាងជាស្រ្តីមេម៉ាយ រកស៊ីទូលអំបុកលក់ ស្រាប់តែថ្ងៃមួយ ពេលនាងដើរកាត់តាមវាលស្រែ ចេញមកថ្នល់ធំក៏ត្រូវពួកបារាំងបាញ់ ធ្វើអោយនាងដួលស្លាប់មួយរំពេច។

ក្រោយការស្រាវជ្រាវរបស់លោក ប្រាជ្ញ ជុំ ជាងមួយឆ្នាំមក លោកបានរកឃើញថា តាមការពិតស្រ្តីមេម៉ាយនោះ កាលនៅរស់គឺមានទំនាក់ទំនងស្និទ្ធជាមួយមីងសាន ដែលត្រូវជាម្តាយរបស់ស្រីអូន ក្នុងជាតិថ្មីនេះ។ ពេលដែលមីងសានដើរទៅផ្ទះ ស្ត្រីមេម៉ាយនោះដើម្បីទៅលក់អំបុកជាមួយគ្នា ស្រាប់តែ គាត់ឃើញឡានមួយគ្រឿងសុទ្ធតែទាហានបារាំង។ ភ្លាមនោះគាត់លឺស្នូរកាំភ្លើងផាំង ហើយលឺស្ត្រីមេម៉ាយស្រែកអូយៗ រួចក៏ឃើញនាងដួលស្លាប់តែម្ដង។ ព្រឹត្តិការណ៍នេះធ្វើអោយមីងសាន ភ័យរន្ធត់ជាខ្លាំង ហើយបានទៅចាប់អង្រួនសពស្ត្រីមេម៉ាយនោះទាំងទឹកភ្នែករហាម។

ក្រោយការស្លាប់របស់នាង មីងសានចេះតែនឹកអាណិត និង ស្រមៃដល់ស្ត្រីមេម៉ាយនោះដែលជាមនុស្សស្លូតបូត។ ហើយមានពេលខ្លះ គាត់យល់សប្ដិឃើញ នាងយកអំបុកមកលក់អោយគាត់ទៀតផង។ រហូតដល់ថ្ងៃឆ្លងទន្លេ គឺគាត់សង្កេតឃើញមានស្នាមជាំក្រហមនៅនឹងស្មងជើងរបស់កូនស្រីគាត់ ដូចទៅនឹងស្លាកស្នាមពេលដែលស្ត្រីមេម៉ាយនោះបានស្លាប់ផងដែរ។ គាត់ក៏ជឿថាស្ត្រីមេម៉ាយនោះ បានមកចាប់ជាតិជាកូនរបស់គាត់ ហើយគាត់ក៏ដាក់ឈ្មោះនាងថា ស្រីអូនៗនេះឯង។

សូមបញ្ជាក់ថា តាមការពិតទៅពេលដែលមីងសានបានឃើញស្រ្តីមេម៉ាយស្លាប់ គឺគាត់មានផ្ទៃពោះ២ខែរួចទៅហើយ។ ប្រការនេះហើយ ទើបវាបានជះឥទ្ធិពលទៅលើខួរក្បាលរបស់ស្រីអូនតាំងពីកំណើតមកម្ល៉េះ ដែលធ្វើអោយនាងអាចរៀបរាប់ប្រាប់អ្នកភូមិពីព្រឹត្តិការណ៍នៃការស្លាប់នោះបាន ដោយមិនចាំបាច់មាននរណាមកនិទានប្រាប់នាងឡើយ៕

ចុះប្រិយមិត្តវិញ យល់យ៉ាងណាដែរ?