ភ្នំពេញក្រោន ចាញ់ Home United ទាំងប្រផុតប្រផើយ ៣-៤ ក្នុងដីខ្លួនឯងជើងទី១
- 2017-01-30 13:02:39
- ចំនួនមតិ 0 | ចំនួនចែករំលែក 0
ភ្នំពេញក្រោន ចាញ់ Home United ទាំងប្រផុតប្រផើយ ៣-៤ ក្នុងដីខ្លួនឯងជើងទី១
ចន្លោះមិនឃើញ
ក្រុមម្ចាស់ផ្ទះភ្នំពេញក្រោនបានចាញ់ក្រុមភ្ញៀវ Home United របស់សិង្ហបុរីដោយលទ្ធផល ៣-៤ សម្រាប់ការប្រកួតវគ្គជម្រុះពានរង្វាន់ AFC Cup ប្រចាំតំបន់អាស៊ានក្នុងជើងទី១។
Home United រកគ្រាប់បាល់ទី១នៅនាទីទី៣៤
Home United រកគ្រាប់បាល់ទី២នៅនាទីទី៣៦
ភ្នំពេញក្រោន រកគ្រាប់បាល់ទី១នៅនាទី៤៥+២
ខ្សែការពារភ្នំពេញក្រោនទាត់បាល់ខុសធ្វើឲ្យបាល់ចូលទីខ្លួនឯង
កែវ សុខង៉ន ស៊ុតចូលគ្រាប់ទី២ឲ្យភ្នំពេញក្រោននៅនាទី៨៤
Home United រកគ្រាប់បាល់ទី៤នៅនាទីទី៨៦
Booysen ស៊ុតបាល់ពិន័យចូលយ៉ាងស្អាតនៅនាទី៩០+៥
ការប្រកួតនៅកីឡដ្ឋាន RSN របស់ភ្នំពេញក្រោន ក្រុមទាំងពីរធ្វើបានល្អ និងមានឱកាសបញ្ជូនបាល់ទៅតំបន់គ្រោះថ្នាក់ដូចគ្នា ប៉ុន្តែការវាយបករបស់ក្រុមភ្ញៀវហាក់មានអំណោយផលច្រើនជាង។ នៅនាទីទី៣៤ខ្សែការពាររបស់ភ្នំពេញក្រោនបង្កកំហុសនៅតំបន់គ្រោះថ្នាក់ដែលបណ្តាលឲ្យ Home United ទទួលបានបាល់ពិន័យ១១ម៉ែត្រ និងស៊ុតចូលសម្រេចដោយកីឡាករ Faris Ramli។ ២នាទីក្រោយមកកីឡាកររូបនេះដដែលរកបាល់គ្រាប់ទី២ បន្ទាប់ពីខ្សែការពារបញ្ជូនបាល់វាយបកយ៉ាងលឿន។
ចំពោះម្ចាស់ផ្ទះភ្នំពេញក្រោនបានព្យាយាមវាយសម្រុកតាំងពីដើមវគ្គគឺមិនអត់ប្រយោជន៍ឡើយដោយនៅនាទីទី៤៥+២ ទៅហើយខ្សែបម្រើប្រយុទ្ធមកពីជប៉ុន Futa Nakamura បានតែតចូលទីរបស់ Home United បានសម្រេចដើម្បីតាមពីក្រោយ ២-១ សម្រាប់វគ្គទី១។
ចំពោះការប្រកួតវគ្គទី២ ទាំងក្រុមម្ចាស់ផ្ទះ និងក្រុមភ្ញៀវមានឱកាសវាយសម្រុករៀងៗខ្លួន ប៉ុន្តែភ្នំពេញក្រោននៅតែមិនសូវមានសំណាងល្អដដែល។ នៅនាទីទី៧០ ខ្សែប្រយុទ្ធរបស់ Home United ទទួលបានបាល់ដាច់មាត់ ប៉ុន្តែស៊ុតមិនចូល ដោយសារតែអ្នកចាំទី កែវ សុខសិលា សង្គ្រោះបាល់បាន។ ទោះជាយ៉ាងណា នៅតែសំណាងអាក្រក់របស់ភ្នំពេញក្រោនដោយខ្សែការពារស៊ុតបាល់ខុសក៏បាល់លោតចូលទីតែម្តងដើម្បី Home United នាំមុខ ៣-១។
ទោះយ៉ាងណា ភ្នំពេញក្រោននៅតែអាចបំប៉ោងសំណាញ់ទីរបស់ Home United ជាលើកទី២ បន្ទាប់ពីតារាជើងចាស់ កែវ សុខង៉ន ស៊ុតចូលយ៉ាងស្អាតនៅនាទីទី៨៤ ដើម្បីតាមពីក្រោយ ២-៣ ប៉ុន្តែ២នាទីក្រោយមក Home United ស៊ុតចូល១គ្រាប់ទៀតដើម្បីនាំមុខ ២-៤។ ការប្រកួតស្ទើរតែចប់ទៅហើយ ស្រាប់តែភ្នំពេញក្រោនទទួលបានបាល់ពិន័យ ហើយតារាឆ្នើម Booysen ស៊ុតចូលយ៉ាងស្អាតនៅនាទីទី៩០+៥ ដើម្បីតាមពីក្រោយ ៣-៤។ ចប់ការប្រកួតភ្នំពេញក្រោនចាញ់ Home United ទាំងប្រផុតប្រផើយដោយលទ្ធផល ៣-៤។ ជើងទីពីរ ភ្នំពេញក្រោននឹងធ្វើដំណើរទៅលេងនៅទឹកដីសិង្ហបុរីវិញម្តងនៅថ្ងៃទី៧ ខែកុម្ភៈ ឆ្នាំ២០១៧៕