អង្គបុរាណមួយកន្លែងនៅខេត្តតាកែវ ល្បីខ្មោចលងខ្លាំង

2017-01-31 04:35:15
ចំនួនមតិ 0 | ចំនួនចែករំលែក 0

ចន្លោះមិនឃើញ

អង្គក្តីចាស់ ស្ថិតនៅភូមិអង្គតាចាន់ ឃុំលាយបូ ស្រុកត្រាំកក់ ខេត្តតាកែវ ជាទួលបុរាណដែលសំបូរដោយដើមឈើតូចធំច្រើន ថែមទាំងមានត្រពាំងទឹកពីមុខ លាយឡំដោយព្រៃដុះអមសងខាង មើលទៅមានសភាពគួរឲ្យខ្លាច ហើយអ្នកស្រុកក៏មិនសូវហ៊ានទៅក្បែរដែរ។

អ្នកស្រី អ៊ំ ផល អាយុ ៥៩ឆ្នាំ បានប្រាប់ Sabayថា ទួលអង្គបុរាណនេះមិនសូវមានអ្នកដើរឆ្លងកាត់នៅពេលយប់ទេ ព្រោះកាលពីមុនមក ក្បែរអង្គនេះមានផ្ទះ ១គ្រួសារមានមនុស្សឈឺស្លាប់ទាំងអស់។ ក្រោយមកផ្ទះនេះត្រូវគេបោះបង់ចោល ហើយអោយតែមានអ្នកដំណើរឆ្លងកាត់តែងតែមានខ្មោចលងបំពេកូននិងទម្លាក់សក់រញ៉េរញ៉ៃជាដើម។ ជួនកាល មានការក្លែងបង្ហាញរូបធ្វើជាកង្កែបធំៗ អោយតាមដេញចាប់ រហូតចូលដល់បាត់រួបរាងតែម្ដង។

អ្នកស្រី អ៊ំ ផល

យុវជន ទ្រី ចាន់ណា អាយុ១៧ឆ្នាំ បានប្រាប់ថា យប់មួយខ្លួននិងមិត្តភ័ក្ដិ ២នាក់នាំគ្នាទៅឆ្លុះត្រីនៅជុំវិញកន្លែងខាងលើ ពេលនោះមិនទាន់ឆ្លុះបានប៉ុន្មានផងក៏លឺសំឡេងកូនង៉ែតយំចេញពីទីនោះ។ ពេលដែលឈរស្ដាប់យូរបន្តិចលឺសូរសំឡេងបំពេកូនបន្ទាប់មក លឺសំឡេងបងលួងប្អូនកុំអោយយំ។ ចាន់ណា បាននិយាយថា៖ “ពួកខ្ញុំទ្រាំស្ដាប់ទៀតលែងបានក៏រត់បាតជើងសព្រាតទាំងអស់គ្នាទៅ"។

យុវជន ទ្រី ចាន់ណា

ចំណែកបុរសម្នាក់សុំមិនបញ្ចេញឈ្មោះ មានទីលំនៅចម្ងាយ ១០០ម៉ែត្រពីកន្លែងនោះប្រាប់ថា គាត់រស់មិនដែលឃើញមានហេតុភេទអ្វីកើតឡើងទេ លឺតែអ្នកភូមិនិយាយប្រាប់ស្ទើរគ្រប់គ្នា។ យ៉ាងនេះក្ដី លោកថាជួនកាលមានមនុស្សពឹងអោយជួយជូនឆ្លងកាត់ទីនេះពេលយប់ដែរ តែមិនហ៊ាន។

តាមការអោយដឹងពីប្រភពខាងលើថា ទួលអង្គបុរាណនេះ ជាអតីតទីតាំងវត្តលាយបូចាស់ ដែលបានប្តូរមកទីតាំងថ្មីចម្ងាយពីគ្នាជាង ២០០ម៉ែត្រ។ ប៉ុន្តែនៅគ្រាមួយនោះមានសត្វឈ្លូស ១ក្បាលរត់ចូលវត្ត ហើយក្រោយមកធ្វើអោយមនុស្សឈឺស្លាប់ច្រើននាក់ បានជាព្រះសង្ឃនិងពុទ្ធបរិស័ទនាំគ្នាប្តូរទីតាំងវត្តមកកន្លែងសព្វថ្ងៃនេះ៕