ឈិត សុវណ្ណបញ្ញា អួលដើមក ពេលដើរចេញពីហង្សមាស

2017-02-02 09:10:31
ចំនួនមតិ 0 | ចំនួនចែករំលែក 0

ចន្លោះមិនឃើញ

រយៈពេលជាង១១ឆ្នាំហើយ ដែលតារាចម្រៀងស្រគត់ស្រគំ ឈិត សុវណ្ណបញ្ញា ជ្រកក្នុងផលិតកម្មរស្មីហង្សមាស តែមុននេះ បញ្ញា បញ្ជាក់ថានាងបានសម្រេចចិត្តចាកចេញពី ហង្សមាស ហើយ។

ម្ចាស់បទ "អូនជាចំណែកលើស" បញ្ជាក់មកកាន់ Sabay ថា តាំងពីនាងក្លាយជាតារាចម្រៀងរបស់ផលិតកម្ម ហង្សមាសប្រមាណ១១ ឆ្នាំមកនេះ នាងពុំទាន់មានឱកាសចេញអាល់ប៊ុមទោលផ្ទាល់ខ្លួននោះទេ ទោះបីនាងស្នើសុំទៅអ្នកគ្រប់គ្រងក៏ដោយ។ "និយាយទៅអ្នកគាំទ្រទាំងអស់គាត់ដឹងហើយថា ១១ ឆ្នាំនេះខ្ញុំគ្មានអាល់ប៊ុមផ្ទាល់ខ្លួននោះទេ ប្រហែលក្រុមហ៊ុនគិតថាខ្ញុំគ្មានសមត្ថភាពគ្រប់គ្រាន់"។

បញ្ញា បន្តថា ទម្រាំនាងសម្រេចចិត្តចាកចេញបែបនេះនាងប្រើពេលវេលាគិតគូរយ៉ាងល្អិតល្អន់ ព្រោះនាងស្រលាញ់ក្រុមហ៊ុនខ្លាំង ប៉ុន្តែចុងក្រោយនាងសម្រេចត្រូវចាកចេញទៅសាងអនាគតថ្មី ព្រោះមិនចង់ចំណាយនិង លេងសើចជាមួយពេលវេលាបន្តទៀតព្រោះ ១១ ឆ្នាំវាយូរគ្រប់គ្រាន់ដែរសម្រាប់នាងក្នុងការរង់ចាំ។

ឆ្លៀតក្នុងឱកាសនេះ ឈិត សុវណ្ណបញ្ញា ក៏បានថ្លែងអំណរគុណទៅដល់ថ្នាក់ដឹកនាំគ្រប់លំដាប់ថ្នាក់នៃផលិតកម្មហង្សមាស និងរៀមច្បងទាំងអស់ ដែលតែងតែ ផ្តល់ដំបូន្មានល្អៗដល់នាង។ ក្នុងនោះ បញ្ញា សន្យាថានឹងនៅតែបន្តក្នុងវិថីសិល្បៈ ដរាបណាទស្សនិកជននៅតែគាំទ្រនាង។

តួឯកស្រីក្នុងរឿង "ទេសចរណ៍ឋាននរក" បន្ថែមថាសម្រាប់គម្រោងបន្តនាងពុំទាន់អាចជម្រាបបាននៅឡើយទេថា នាងនឹងបន្តជាតារាចម្រៀងក្នុងផលិតកម្មផ្សេង ឬជាតារាចម្រៀងឯករាជ្យ។

ដូចគ្នាដែរ កាលពីព្រឹកមិញនេះលោក អ៊ីន ទីតូ អ្នកគ្រប់គ្រងការសម្ដែងទូទៅរបស់ ផលិតកម្មរស្មីហង្សមាស បានប្រាប់ Sabay ថាលោកបានចាកចេញពី ហង្សមាស ដោយរកបានទ្រនំថ្មីគឺផលិតកម្មថោន៕

អត្ថបទ៖ Samedy