យក់ ថិតរដ្ឋា ខ្លោចចិត្តស្ទើរស្រក់ទឹកភ្នែកតាម ឈិត សុវណ្ណបញ្ញា រឿងចេញពីហង្សមាស

2017-02-03 04:16:14
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពី ឈិត សុវណ្ណបញ្ញា ប្រកាសដើរចេញពីផលិតកម្ម "រស្មីហង្សមាស" មក អ្នកនាង យក់ ថិតរដ្ឋា តារាចម្រៀងធ្លាប់ជ្រកក្រោមទ្រនំជាមួយនោះ បានបញ្ចេញសារស្ទើរស្រក់ទឹកភ្នែកតាមដែរ ។

យក់ ថិតរដ្ឋា បានបង្ហាញអារម្មណ៍លើFacebookផ្ទាល់ខ្លួន ដោយអាណិតអាសូរ បន្ទាប់ពីបានលឺ សំឡេងការរៀបរាប់ការសម្រេចចិត្តដើរចេញពីហង្សមាសរបស់ ឈិត សុវណ្ណបញ្ញា មកកាន់ Sabay កាលម្សិលមិញ។ ម្ចាស់បទ"តើឲ្យអូនក្បត់បងម្ដេចទៅ" បានសរសេរយ៉ាងដូចនេះថា៖"ស្តាប់សំលេងយាយម៉ោ ! បងឡើងចង់យំតាមហើយ ! អាណិតណាស់ប្អូនសំលាញ់ Panha Chhet ហ៊ឹម ! ទឹកត្រជាក់ត្រីកុំ កុំឆ្ងល់ពេកអូន ស៊ូស៊ូណាណប់ កុំចុះចាញ់ត្រូវតែខំប្រឹងក្រោកដើរទៅមុខបន្តទៀតណាណប់ !”។

ការសម្រេចដើរចេញ របស់ឈិត សុវណ្ណបញ្ញា បន្ទាប់ពីជ្រកក្រោមដំបូលផលិតកម្មខាងលើ បានជិត១១ឆ្នាំ ហេតុផលចម្បងនោះ បញ្ញា បានលើកថា ពាក់ព័ន្ធនឹងការអាក់អន់ចិត្តខ្លះ ដែលកន្លងមក ផលិតកម្ម"រស្មីហង្សមាស" ហាក់ដូចជា មិនសូវមានបទចម្រៀងឲ្យខ្លួនច្រៀង រួមទាំងអ៊ាល់ប៊ុមទោល បើធៀបទៅតារាចម្រៀងផ្សេងទៀត។

មិនត្រឹមតែ ឈិត សុវណ្ណបញ្ញា នោះទេ ថ្មីៗនេះលោក អ៊ិន ទីតូ អ្នកគ្រប់គ្រងការសម្ដែង ក៏បានប្រកាសដើរចេញដូចគ្នា ដោយលោកទៅចូលនៅផលិតកម្មថោន។ ការដើរចេញរបស់លោក អ៊ិន ទីតូ ដែលធ្លាប់ធ្វើការជាមួយរស្មីហង្សមាសជិត៩ឆ្នាំមកនេះ មិនត្រូវបានលោក បញ្ជាក់ឲ្យដឹងល្អិតល្អន់ឡើយ គឺគ្រាន់តែប្រាប់ថា ចង់ផ្លាស់ប្ដូរបរិយាកាសការងារប៉ុណ្ណោះ។

ចំពោះ យក់ ឋិករដ្ឋា វិញ ម្ចាស់បទ "ឈឺចាប់មួយលានដង"រូបនេះ ក៏បានបង្ហាញតម្រុយចង់ចាកចេញពីផលិតកម្មៗរស្មីហង្សមាស"ដូចគ្នា។ បច្ចុប្បន្ននាងកំពុងតែធ្វើការចរចារជាមួយថ្នាក់ដឹកនាំផលិតកម្ម ដើម្បីផ្ដល់ការងារឲ្យសក្ដិសមនឹងសមត្ថភាពដែលខ្លួនមាន៕

អត្ថបទ៖ ខុត សីហា