ក្តៅៗ! តុលាការអាមេរិក ចេញមុខតទល់ច្បាប់ជនអន្តោប្រវេសន៍របស់ ត្រាំ ហើយ!

2017-02-04 02:24:15
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃសុក្រនេះ ចៅក្រមសហព័ន្ធអាមេរិក នៅក្នុងទីក្រុង Seattle រដ្ឋ Washington បានផ្អាកច្បាប់ថ្មីរបស់ប្រធានាធិបតីអាមេរិក លោក ដូណាល់ ត្រាំ បណ្តោះអាសន្ន នៅទូទាំងប្រទេស ដែលហាមឃាត់ជនភៀសខ្លួន និង ពលរដ្ឋមកពីប្រទេសមូស្លីម ចំនួន៧ មិនឲ្យចូលទឹកដីអាមេរិក។

ជាមួយគ្នានេះដែរ អង្គរដ្ឋអាជ្ញានៃរដ្ឋ Washington លោក Bob Ferguson បានអះអាងដែរថា ការហាមឃាត់ជនអន្តោប្រវេសន៍ គឺមិនស្របនឹងច្បាប់រដ្ឋធម្មនុញ្ញឡើយ។ ក្នុងពាក្យបណ្ដឹង អង្គរដ្ឋអាជ្ញារូបនេះ បានអះអាងថា រដ្ឋាភិបាលរបស់លោក ត្រាំ កំពុងតែរំលោភបំពាន លើការការពាររបស់រដ្ឋធម្មនុញ្ញ សម្រាប់សេរីភាពសាសនា។ មិនតែប៉ុណ្ណោះ រដ្ឋ New York និង Virginia ក៏បានចាត់វិធានការផ្លូវច្បាប់ ប្រឆាំងនឹងបម្រាមរបស់ប្រធានាធិបតី ត្រាំ ផងដែរ។

លោក Ferguson បាននិយាយនៅក្នុងសេចក្ដីថ្លែងការណ៍ ប្រាប់ទៅសារព័ត៌មាន CNBC ថា ៖«ទោះបីជាយ៉ាងណា ខ្ញុំជឿជាក់ថា គ្មាននរណាម្នាក់នៅពីលើច្បាប់នោះទេ ហើយខ្ញុំមានកាតព្វកិច្ចដើម្បីការពារ ពលរដ្ឋ Washington ពីសកម្មភាពខុសច្បាប់ ដែលរំលោភលើរដ្ឋធម្មនុញ្ញ។ ខ្ញុំនឹងបន្តការប្រយុទ្ធនេះ រហូតដល់តុលាការកំពូលអាមេរិក បើសិនជាចាំបាច់ ដើម្បីលើកកម្ពស់នីតិរដ្ឋ»៕