អាមេរិក ព្រមានតបស្នង កូរ៉េខាងជើង មួយចាស់ដៃ បើនៅតែផ្គើនប្រើនុយក្លេអ៊ែរ

2017-02-06 00:53:58
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋមន្ត្រីការពារជាតិអាមេរិក លោក James Mattis បានប្រាប់ឲ្យដឹង ពីប្រទេសកូរ៉េខាងត្បូង មុនពេលធ្វើដំណើរទៅទីក្រុងតូក្យូ ថា ការប្រើប្រាស់អាវុធនុយក្លេអ៊ែររបស់កូរ៉េខាងជើង អាចនឹងជួបការឆ្លើយតបដ៏មានប្រសិទ្ធភាព និងលើសលប់មួយ។

រដ្ឋមន្ត្រីការពារជាតិអាមេរិក លោក James Mattis

ជាមួយគ្នានេះដែរ រដ្ឋមន្ត្រីរូបនេះ បានបញ្ជាក់សាជាថ្មី ពីផែនការដាក់ពង្រាយប្រព័ន្ធការពារមីស៊ីលរបស់អាមេរិក ក្នុងទឹកដីកូរ៉េខាងត្បូង នៅឆ្នាំនេះទៀតផង។

គួរបញ្ជាក់ថា កូរ៉េខាងជើង បានធ្វើការបាញ់សាកល្បងគ្រាប់មីស៊ីល និងនុយក្លេអ៊ែរ ម្ដងហើយម្ដងទៀត និងចេញសេចក្ដីថ្លែងការណ៍ឈ្លានពាន ដើម្បីបន្តជូនដំណឹង និងបញ្ចេញកំហឹងរបស់ខ្លួន។

ទោះបីជាយ៉ាងណា កងយោធាសហរដ្ឋអាមេរិកមានវត្តមានយ៉ាងច្រើន នៅក្នុងប្រទេសកូរ៉េខាងត្បូង និងជប៉ុន ដែលជាផ្នែកមួយ នៃកិច្ចព្រមព្រៀងការពារជាតិក្រោយសង្គ្រាម។ កងយោធាអាមេរិក ស្ថិតនៅកូរ៉េខាងត្បូង ប្រហែល ២៨ ៥០០នាក់ ខណៈប្រទេសមួយនេះ ត្រូវចំណាយប្រាក់ ប្រហែល ៩០០លានដុល្លារ ឲ្យអាមេរិកជារៀងរាល់ឆ្នាំ។

ប្រធានាធិបតីអាមេរិក លោក ដូណាល់ ត្រាំ ធ្លាប់បានថ្លែងថា លោកចង់ឲ្យកូរ៉េខាងត្បូង និងជប៉ុន បង់ប្រាក់បន្ថែមទៀត ដើម្បីថែរក្សាវត្តមានកងយោធាទាំងនោះ៕