ម្ចាស់ស្នាដៃ "កំណត់ហេតុនាងនាថ" ត្រៀមអង្រួនរឿងថ្មី ដល់អ្នកគាំទ្រទៀតហើយ
- 2017-02-12 03:06:01
- ចំនួនមតិ 0 | ចំនួនចែករំលែក 0
ម្ចាស់ស្នាដៃ "កំណត់ហេតុនាងនាថ" ត្រៀមអង្រួនរឿងថ្មី ដល់អ្នកគាំទ្រទៀតហើយ
ចន្លោះមិនឃើញ
ម្ចាស់ស្នាដៃរឿង "កំណត់ហេតុនាងនាថ" របស់ផលិតកម្ម "ឥន្ទ្រានិមិត្ម" កំពុងតែត្រៀមបញ្ចេញស្នាដៃរឿងថ្មីចំណងជើងថា "សសរកន្លោង" ដើម្បីយកមកពញ្ញាក់អារម្មណ៍អ្នកគាំទ្រឆាប់ៗខាងមុខនេះហើយ។
កាលពីល្ងាចមិញនៅភោជនីយដ្ឋាន វីហ្វេ្រនបឹងត្របែកម្ចាស់ផលិតកម្ម "ឥន្ទ្រានិមិត្ម"បានធ្វើសន្និសីទបញ្ចេញតួសម្ដែងនៅក្នុងរឿងថ្មី សសរកន្លោងនេះ ដែលក្នុងនោះអ្នកនិពន្ធក៏ដូចជាអ្នកដឹកនាំលោក ចាន់ណា រ៉ូណាន់ បានឲ្យដឹងថា រឿងថ្មីនេះនឹងចាប់ផ្តើមក្រុងពាលីចេញថតចាប់ពីថ្ងៃ ៦ មិនា នៅតំបន់ខេត្តកែប។
រ៉ូណាន់ ចាន់ណា ថ្លែង៖ "សម្រាប់រឿងថ្មីនេះ ខ្ញុំសង្ឃឹមយ៉ាងមុតមាំថា នឹងជោគជ័យ ដោយសារខ្ញុំបានស្ទាបស្ទង់អ្នកគាំទ្រ កាលពីស្នាដៃរឿងចាស់ ក៏ដូចជាការប្រកាសចាប់ផ្តើមថតរឿងថ្មី គឺឃើញថាសន្ទុះនៃការចាំតាមដានរបស់បងប្អូនមានច្រើន។ ម្យ៉ាងស្នាដៃថ្មីនេះ ខ្ញុំសម្រិតសម្រាំងនិងព្យាយាមធ្វើយ៉ាងណាឲ្យកាន់តែល្អជាងមុន ផងដែរ"។
ស្នាដៃរឿងថ្មី "សសរកន្លោង" នេះអ្នកដឹកនាំ រ៉ូណាន់ ចាន់ណា បន្តឲ្យដឹងទៀតថាបានដកស្រង់ចេញពីរឿងព្រេងនិទានខ្មែរ និងចេញពីការនិទានតគ្នាពីចាស់ៗរួមផ្សំពីគំនិតច្នៃប្រឌិត ដែលលោកបានរៀបចំច្នៃសារជាថ្មី ដើម្បីឲ្យរឿងនេះកាន់តែប្លែក។ សម្រាប់ទីតាំងលោកប្រាប់ថាជ្រើសយកទឹកដីនៃខេត្តកែប និងកំពត ព្រោះនៅទីនោះមានសំណង់អគារបារាំងចាស់ៗ ដែលសមស្របឲ្យលោកអាចយកមកថតរឿងថ្មីនេះ។
តួសម្តែងនៅក្នុងរឿងនេះមានកញ្ញា យ៉ែម ស្រីពេជ្រ អ្នកនាង ប៉េងប៉ោង លោក ភីម៉ៃ លោក ទ្រី តារាវុធ អ្នកនាង ឆៃលី ដាឡែន លោក ហេង ចាន់វិសាល លោក ហ៊ុន សុភី ព្រមទាំង Frehie Boy Freshie Girl ក្មេងៗជាច្រើនដួងទៀត។ ដើម្បីចង់ពង្រឹងរឿងថ្មីនេះឲ្យកាន់តែល្អជាងមុន លោក រ៉ូណាន់ ផ្ទាល់ មិនបានចូលរួមសម្តែងដូចកាលរឿង "កំណត់ហេតុនាងនាថ" ឡើយ៕