ក្រសួងវប្បធម៌ អំពាវនាវអោយមាតាបិតាជួយអប់រំកូន ពីទិវាបុណ្យនៃក្ដីស្រលាញ់

2017-02-13 08:24:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងវប្បធម៌ និង វិចិត្រសិល្បៈបានចេញសេចក្ដីអំពាវនាវមួយដើម្បីអោយមាតាបិតាសិស្ស រឺ អាណាព្យាបាល មេត្តាជួយណែនាំ និង អប់រំបុត្រធីតារបស់ខ្លួន អោយបានល្អ ជាមួយការយល់ដឹងពីទិវាបុណ្យនៃក្តីស្រលាញ់ (Valentine's Day) នាថ្ងៃទី ១៤ កុម្ភៈ ស្អែកនេះ។

ខាងក្រសួងបានពន្យល់ថា តាមការពិតទិវានេះគឺជាប្រពៃណីរបស់គ្រិស្តសាសនិកតែប៉ុណ្ណោះ។ ចំពោះបរិបទក្នុងប្រទេសកម្ពុជាវិញ យុវវ័យខ្មែរគួរតែយកឱកាសនេះដើម្បីបង្ហាញក្តីស្រលាញ់ចំពោះមនុស្សដែលនៅជុំវិញខ្លួន តួយ៉ាងដូចជា មិត្តភ័ក្ដិ គូរសង្សារ ស្វាមីភរិយា កូនចៅ និង ជីដូនជីតាជាដើម។ ជាពិសេសយុវជនខ្មែរគួរចេះចែករំលែកនូវក្តីស្រលាញ់ទាំងនោះទៅកាន់មនុស្សពិការ កុមារកំព្រា និង មនុស្សដែលមានជីវភាពខ្សត់ខ្សោយជាងខ្លួនផងដែរ។

លើសពីនេះទៅទៀត ការបង្ហាញក្តីស្រលាញ់គឺអាចធ្វើឡើងបានតាមរយៈ ការសរសេរលិខិតជូនពរ ការជូនវត្ថុអនុស្សាវរីយ រឺ ផ្កាជាដើម ដោយចៀសវាងនូវការប្រព្រឹត្តទង្វើដែលប្រាស់ចាកនឹងសីលធម៌ វប្បធម៌ និង ទំនៀមទម្លាប់ដ៏ល្អផូរផង់របស់ជនជាតិខ្មែរនោះដែរ។ មិនតែប៉ុណ្ណោះ ការប្រព្រឹត្តនូវអំពើខុសឆ្គងក្នុងពិធីបុណ្យនេះ ក៏នឹងធ្វើអោយបុគ្គលនោះផ្ទាល់បាត់បង់នូវអនាគត ព្រមទាំងកិត្តិយសគ្រួសារទៀតផង។