គ្រូបង្វឹក Barcelona ថានៅមានឱកាសសងសឹក PSG សម្រាប់ជើងទី២

2017-02-15 01:53:36
ចំនួនមតិ 0 | ចំនួនចែករំលែក 0

ចន្លោះមិនឃើញ

Luis Enrique អ្នកចាត់ការក្រុម FC Barcelona មិនបាត់បង់ក្ដីសង្ឃឹមនោះទេ ទោះបីក្រុមអ្នកមានបុណ្យ ចាញ់ក្រុម PSG ៤-០ នៅ UEFA Champions League វគ្គ១៦ក្រុម ជើងទី១ នៅកីឡដ្ឋាន Parc des Princes យប់មិញក៏ដោយ។ ផ្ទុយទៅវិញ អ្នកចាត់ការសញ្ជាតិអេស្ប៉ាញ បានបញ្ជាក់ថា Barca នៅតែមានឱកាសឡើងវគ្គបន្ត សម្រាប់ជើងទី២ នៅកីឡដ្ឋាន Camp Nou។

Luis Enrique អ្នកចាត់ការក្រុម FC Barcelona

ក្រោយចប់ការប្រកួតដ៏ខកចិត្តនេះ លោក Enrique បាននិយាយថា៖ "ខ្ញុំទទួលខុសត្រូវសម្រាប់លទ្ធផលនេះ ដូច្នេះខ្ញុំមិនដាក់កំហុសលើកីឡាកររូបណាម្នាក់ទេ។ ដៃគូរបស់យើង (PSG) ពួកគេលេងបានល្អបំផុត ពួកគេដណ្តើមបាល់ឈ្នះច្រើន និងមានប្រសិទ្ធភាព។ យើងជាក្រុមមួយ យើងត្រូវតែរួបរួមគ្នា (នៅជើងទី២)។ វាពិតជាពិបាក ប៉ុន្តែយើងនឹងមានឱកាស”។

ចំណែកឯ Andres Iniesta ប្រធានក្រុម Barca បាននិយាយថា៖ "វាពិបាកពន្យល់ណាស់។ នេះជាការប្រកួតប្រជែង ដែលគ្មានឱកាសសម្រាប់អ្នកបង្កកំហុសច្រើន (Error) នោះទេ។ យើងបានជួបថ្ងៃដ៏អាក្រក់។ យើងត្រូវតែគិតនៅជើងទី២។ រឿងខកចិត្តដូចនេះ ពេលខ្លះវាអាចកើតឡើងយ៉ាងដូច្នេះ ប៉ុន្តែយើងត្រូវតែក្រោកឈរឡើង ដោះស្រាយទាំងអស់គ្នា”។

Barcelona នឹងត្រូវស្វាគមន៍ PSG នៅជើងទី២ នាកីឡដ្ឋាន Camp Nou ប្រទេសអេស្ប៉ាញ នៅថ្ងៃទី០៨ ខែមិនា ខាងមុខ៕