គីម ជុងណាម ធ្លាប់សុំអង្វរឲ្យគេទុកជីវិតក្នុងការប៉ងលួចធ្វើឃាតលើកមុន

2017-02-15 07:53:32
ចំនួនមតិ 0 | ចំនួនចែករំលែក 0

ចន្លោះមិនឃើញ

បងប្រុសរបស់មេដឹកនាំគីម ជុងអ៊ុន គឺលោកគីម ជុងណាម ដែលត្រូវគេលួចធ្វើឃាតកាលពីយប់មិញនៅប្រទេសម៉ាឡេស៊ី ត្រូវគេដឹងថាធ្លាប់សុំអង្វរឲ្យគេទុកជីវិតខ្លួន បន្ទាប់ពីមានការប៉ុនប៉ងលួចធ្វើឃាតមិនបានសម្រេចម្ដងកាលឆ្នាំ២០១២។ បើតាមប្រធានចារកិច្ចក្រុងសេអ៊ូលបានអះអាងនៅថ្ងៃពុធនេះ។

ក្នុងឆ្នាំ ២០១២ ប្រទេសកូរ៉េខាងជើងបានព្យាយាមលួចធ្វើឃាត គីម ជុងណាម ដែលគេស្គាល់ថាជាអ្នកគាំទ្រឲ្យមានកំណែទម្រង់ក្រុងព្យុងយ៉ាង និងជាអ្នករិះគន់ការគ្រប់គ្រងទៀតផង។ សមាជិកសភាក្រុងសេអ៊ូលថ្លែង និងសង្ខេបដោយប្រធានភ្នាក់ងារស៊ើបការណ៍សម្ងាត់ជាតិលោកលី ប៊ូយ៉ុងហូ Lee Byung-Ho។

បើតាមប្រភពលោកលី បន្តថា មានការប៉ុនប៉ងធ្វើឃាតលើរូប ជុងណាម កាលឆ្នាំ២០១២ ហើយនៅខែមេសាឆ្នាំដដែលលោក ជុងណាម បានផ្ញើសំបុត្រទៅឲ្យប្អូនប្រុសគឺ គីម ជុងអ៊ុន ដោយសរសេរថា «សូមមេត្តាទុកជីវិតឲ្យខ្ញុំ និងក្រុមគ្រួសាររបស់ខ្ញុំផង។ យើងមិនមានកន្លែងត្រូវទៅទេ យើងដឹងថាផ្លូវដែលរត់គេច គឺជាផ្លូវស្លាប់។» លោកលី បន្ថែមថា គីម ជុងណាម ទទួលបានគាំពារផ្នែកនយោបាយតិចតួចប៉ុណ្ណោះនៅប្រទេសកំណើត ហើយជាឧបសគ្គតិចតួចផងចំពោះគីម ជុងអ៊ុន។

គ្រួសាររបស់លោកជុង ណាម ប្រពន្ធមុន និងប្រពន្ធបច្ចុប្បន្នរួមទាំងកូន៣នាក់ កំពុងរស់នៅទីក្រុងប៉េកាំង និងម៉ាកាវសព្វថ្ងៃ។ ពួកគេស្ថិតនៅក្រោមការការពារពីអាជ្ញាធរចិន។

ចំណែកឃាតកម្មលោក ជុងណាម ពេលនេះត្រូវបានគេចាត់ទុកជាមរណភាពរបស់បុគ្គលសំខាន់បំផុតក្នុងរបប គីម ជុងអ៊ុន ចាប់តាំងពីការប្រហារជីវិតពូរបស់គីម ជុងអ៊ុន គឺលោកចាង សុងថេក កាលពីខែធ្នូឆ្នាំ២០១៣ កន្លងមក។ លោក ចាង ត្រូវគេស្គាល់ថាមានទំនាក់ទំនងជិតស្និតជាមួយចិន និងគាំទ្រឲ្យមានកំណែទម្រង់សេដ្ឋកិច្ចកូរ៉េខាងជើង តែត្រូវគេចោទប្រកាន់ថា ក្បត់ជាតិ។

ចំណែកលោក ជុងណាម គេជឿថាមានទំនាក់ទំនងជាមួយឥស្សរជនក្រុងប៉េកាំង និងជាមនុស្សតែងតែរិះគន់ជាសាធារណៈអំពីរបបគ្រប់គ្រង់ក្រុងព្យុងយ៉ាងមិនសំចៃមាត់។ ទោះបីជាចាប់ជនសង្ស័យមិនទាន់បាន អាមេរិកបានចោទប្រកាន់ត្រង់ៗទៅលើក្រុងព្យុងយ៉ាង ថាជាអ្នកនៅពីក្រោយខ្នងអំពើឃាតកម្មនេះផងដែរ៕

ប្រភព៖ Scmp ប្រែសម្រួល៖ ឡេង ភារុណ