ចាយលុយមិនសល់ មកពីការចំណាយមិនចាំបាច់ទាំងនេះ

2017-02-15 08:07:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងជីវភាពរស់នៅប្រចាំថ្ងៃ ជៀសមិនផុតរឿងចំណាយលុយដើម្បីបំពេញតម្រូវការផ្សេងៗ។ ប៉ុន្តែការចំណាយខ្លះក៏មិនចាំបាច់ក្នុងការចាយលុយដែលខំរក ធ្វើឱ្យអស់លុយអត់ប្រយោជន៍ដែរ។ ដូច្នេះតើចំណាយណាខ្លះដែលមិនចាំបាច់ក្នុងការចំណាយលុយ? ខាងក្រោមនេះគឺជាការលើកឡើង របស់លោកសាស្ត្រាចារ្យសេដ្ឋកិច្ច ហេង ដារ៉ារ័ត្ន ដែលកំពុងបង្រៀននៅសាកលវិទ្យាល័យឯកជនមួយ។

១. បង្កើនការទិញរបស់ប្រើប្រាស់

របស់ប្រើប្រាស់ចាំបាច់ប្រចាំថ្ងៃរបស់មនុស្ស គ្មានអ្វីក្រៅពីសំលៀកបំពាក់ ស្បែកជើង កាតាបស្ពាយ និងរបស់ផ្សេងទៀត។ ប៉ុន្តែការចំណាយដែលមិនចាំបាច់ទៅលើរបស់ប្រើប្រាស់រាល់ថ្ងៃនោះ គឺការទិញបន្ថែមជានិច្ចទោះបីជាមានប្រើប្រាស់គ្រប់គ្រាន់ហើយក៏ដោយ។ ដូចនេះគួរកាត់បន្ថយការទិញបន្ថែមដូចជាសំលៀកបំពាក់ ស្បែកជើងកាបូបជាដើម ប្រសិនបើនៅប្រើបានពុំមានបញ្ហាអ្វី។ នេះបើតាមការលើកឡើងរបស់សាស្ត្រាចារ្យ សេដ្ឋកិច្ច ហេង ដារ៉ារ័ត្ន។

២. ចំណាយលើការហូបចុកក្រៅផ្ទះ

លោកសាស្ត្រាចារ្យ សេដ្ឋកិច្ចរូបនេះ លើកឡើងបន្ថែមទៀតថា ទម្លាប់មិនហូបបាយផ្ទះក៏ការចំណាយមិនចាំបាច់ក្នុងជីវភាពរស់នៅប្រចាំថ្ងៃដែរ។ នៅត្រង់ចំណុចនេះមានន័យថា ការចំណាយត្រង់នេះជារឿងមួយមិនត្រូវចំណាយនោះទេ គួរតែយកលុយដែលចំណាយអស់ជាច្រើន ដើម្បីទិញគេហូបនោះ យកទៅទិញម្ហូបទុកធ្វើខ្លួនឯងនៅផ្ទះប្រសើរជាង។ ហើយម្យ៉ាងវិញទៀតប្រសិនបើនៅផ្ទះមានអ្នកធ្វើស្រាប់កាន់តែប្រសើរ ពីព្រោះចំណាយលើការហូបក្រៅផ្ទះអាចអស់ច្រើនជាងចំណាយណាៗទាំងអស់។

៣. ចំណាយលើមនុស្សមិនបានផល

ចំពោះចំណុចនេះវិញមានន័យថា ជាធម្មតាមនុស្សតែងមានមិត្តភក្ដិការរាប់អានគ្នាទៅវិញទៅមក តែងមានការជួបជុំគ្នា និងមានកម្មវិធីផ្សេងៗ។ ប៉ុន្តែដោយឡែកមនុស្សខ្លះតែងចំណាយលុយផ្ទាល់ខ្លួន ដើម្បីប៉ាវអ្នកដទៃញ៉ាំនេះញ៉ាំនោះ ហើយជួនកាលអ្នកទាំងនោះជាមនុស្សពុំបានផ្ដល់ផលប្រយោជន៍ត្រឡប់មកវិញទេ។

លោកសាស្ត្រាចារ្យ សេដ្ឋកិច្ច ហេង ដារ៉ារ័ត្ន លើកឡើងថា នៅក្នុងផែនការចាយលុយ មានលុយមួយចំណែកត្រូវយកទៅប៉ាវអ្នកដទៃដែរ ប៉ុន្តែអ្នកដែលត្រូវប៉ាវនោះលុះត្រាជាបុគ្គលជោគជ័យ អ្នករកស៊ីជាដើម ដើម្បីបានគំនិត ការរៀនសូត្រពីគេ។ ប៉ុន្តែចំពោះមិត្តភក្ដិធម្មតាគួរចេញស្មើគ្នាទៅ មិនចាំបាច់ធ្វើអ្នកមាននោះទេ។

៤. សេវាមិនចាំបាច់ផ្សេងៗ

លោកសាស្ត្រាចារ្យ ហេង ដារ៉ារ័ត្ន បន្តទៀតថា ចំពោះសេវាប្រើប្រាស់ជាប្រចាំថ្ងៃខ្លះ មិនចាំបាច់ត្រូវចំណាយនោះទេ ឧទាហរណ៍សេវាអ៊ីនធឺណេតចំពោះអ្នកមិនចាំបាច់ភ្ជាប់វា លើកលែងតែអ្នកមានអាជីវកម្មត្រូវប្រើអ៊ីនធឺណេត។ ក្រៅពីនោះនៅមានសេវាផ្សេងទៀតដូចជា សេវាបោកគក់ សំអាតផ្ទះ គឺសុទ្ធតែអាចធ្វើខ្លួនឯងមិនចាំបាច់ត្រូវចំណាយលុយនោះទេ។

៥. ទម្លាប់បង្កើតបំណុល

ចំណុចនេះគឺជារឿងសំខាន់បំផុតដើម្បីចង់សល់លុយសល់កាក់។ យកល្អកុំទម្លាប់ធ្វើឱ្យខ្លួនឯងក្លាយជាកូនបំណុលឱ្យសោះ ព្រោះនឹងធ្វើខ្លួនឯង ត្រូវបង្កើនការចំណាយបន្ថែមទៀតក្នុងជីវភាពរបស់នៅប្រចាំថ្ងៃ។ លោក ហេង ដារ៉ារ័ត្ន និយាយថា មនុស្សខ្លះច្រើនមានទម្លាប់ធ្វើអ្វីមុនមានលុយ ដូចជាទិញទូរសព្ទបង់រំលស់ ទិញម៉ូតូ ឬរបស់ផ្សេងទៀតបង់រលស់ ដែលសុទ្ធសឹងតែជាការបង់រំលស់មិនចាំបាច់។

ក្រៅពីចំណុចនេះ អ្នកខ្លះមានទម្លាប់លេងតុងទីន ក៏អាចបង្កើនការចំណាយរបស់ខ្លួនឯងកាន់តែច្រើនផងដែរ។ ប្រសិនបើអាចគួរទុកលុយខ្លួនឯងតែម្ដងទៅមិនចាំបាច់យកលុយឱ្យគេបង្វិល ចំណែកខ្លួនឯងជួបការលំបាកនោះទេ៕