ម៉ាឡេស៊ីព្រមប្រគល់សពគីម ជុងណាម ឲ្យកូរ៉េខាងជើង តែមានលក្ខខណ្ឌពិសេស

2017-02-17 06:32:22
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅមុននេះបន្តិច អាជ្ញាធរម៉ាឡេស៊ីបានប្រកាសថា បន្ទាប់ពីធ្វើកោសល្យវិច័យរួចរាល់ គេនឹងប្រគល់សាកសពទៅកូរ៉េខាងជើងភ្លាម ប្រសិនបើក្រុមគ្រួសារលោកគីម ជុងណាម ព្រមតាមលក្ខខណ្ឌពិសេសធ្វើតេស្ដ DNA ត្រឹមត្រូវ។

ការអះអាងជាមួយលក្ខខណ្ឌខាងលើ ក្រោយពីក្រុងព្យុងយ៉ាងបានស្នើសុំយកសាកសពដោយមិនទាន់ធ្វើកោសលវិច័យកាលពីថ្ងៃម្សិលមិញ។ នេះបើតាមមេប៉ូលិសម៉ាឡេស៊ី Abdul Samah Mat បញ្ជាក់ថ្ងៃទី១៧កុម្ភៈ។

លោកបន្ថែម «មកទល់ពេលនេះ មិនទាន់មានសមាជិកគ្រួសាររបស់ជនរងគ្រោះណាម្នាក់ មកអះអាងទទួលស្គាល់សាកសពនៅឡើយទេ យើងត្រូវការសំណាក DNA នៃសមាជិកគ្រួសារ ដើម្បីឲ្យប្រាកដថាត្រូវគ្នាជាមួយសាកសព ឬអត់។ ប្រទេសកូរ៉េខាងជើងបានដាក់សំណើសុំមួយ ដើម្បីយកសាកសព ប៉ុន្តែមុនពេលយើងប្រគល់ជូន យើងត្រូវតែកំណត់ថាសាកសពជារបស់អ្នកណាពិតប្រាកដ។»

កាលពីថ្ងៃម្សិលមិញ ឧបនាយករដ្ឋមន្ត្រីម៉ាឡេស៊ីបានបញ្ជាក់ជាផ្លូវការថា បុរសត្រូវគេធ្វើឃាតនៅព្រលានយន្តហោះកូឡាឡាំពួរមានឈ្មោះ គីម ជុងណាម ជាបងប្រុសមេដឹកនាំ គីម ជុងអ៊ុន តែម្ដាយផ្សេងគ្នា។ បើផ្អែកតាមលិខិតឆ្លងដែនបុរសនោះកាន់។ លោក Ahmad Zahid Hamidi ថ្លែងថាម៉ាឡេស៊ីមានបំណងប្រគល់ជូនតាមសំណើទៅក្រុងព្យុងយ៉ាងដែរ។

គួរបញ្ជាក់ថា លោក ជុងណាម អាយុ៤៥ឆ្នាំ មកប្រទេសម៉ាឡេស៊ីដោយប្រើលិខិតឆ្លងដែនឈ្មោះ Kim Chol៕