Tiger Street Football Festival 2017 នៅបាត់ដំបងបំពេញចិត្តក្រុមចូលរួម ទោះច្រើនលើស

2017-02-17 09:36:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍បាល់ទាត់ហ្វូតសាល Tiger Street Football Festival 2017 រដូវកាលទី៥ឈានដល់មណ្ឌលបាត់ដំបង ស្អែកនេះហើយ បន្ទាប់ពីមណ្ឌលព្រះសីហនុបានធ្វើការប្រកួតរួចកាលពីសប្តាហ៍មុន។ នៅមណ្ឌលខេត្តបាត់ដំបងនេះពិតជាពិសេសមែនទែនដោយក្រុមបានចូលរួមលើសពីការកំណត់ ប៉ុន្តែអ្នករៀបចំការប្រកូតបំពេញបំណងរបស់ពួកគេ។

ពិធីចាប់ឆ្នោត

តាមការឲ្យដឹងពីលោក ទុយ វិច្ឆិកា ប្រធានអាជ្ញាកណ្តាលនៃសហព័ន្ធបាល់ទាត់កម្ពុជាដែលបានចូលរួមក្នុងសន្និសីទសារព័ត៌មាន និងចាប់ឆ្នោតជ្រើសពូលនារសៀលថ្ងៃទី១៧ ខែកុម្ភៈនេះថា តាមការគ្រោងទុក នៅខេត្តបាត់ដំបងនេះកំណត់យកត្រឹមតែ៥០ក្រុមប៉ុណ្ណោះដើម្បីចូលរួមប្រកួតពានរង្វាន់ Tiger Street Football Festival 2017 នេះ ប៉ុន្តែក្រុមបានដាក់ពាក្យចូលរួមច្រើនរហូតដល់៦៨ក្រុម។ ដើម្បីបំពេញតម្រូវការយុវជនដែលចង់ចូលរួមប្រកួត គណៈកម្មការរៀបចំការប្រកួតបានសម្រេចទទួលយកទាំងអស់។

លោកអាជ្ញាកណ្តាលរូបនេះបន្តថា ដោយសារតែក្រុមមានច្រើនរហូតដល់៦៨ទើបធ្វើឲ្យរៀបចំការប្រកួតនៅមណ្ឌលខេត្តបាត់ដំបងនេះកាន់តែពិសេសប្លែកជាងនៅមណ្ឌលខេត្តព្រះសីហនុ។

ដំណាក់កាលទី១

ជ្រើសរើសយក៨ក្រុមដើម្បីចាប់ឆ្នោតជ្រើសរើសធ្វើការប្រកួតដោយក្រុមចាញ់៤ត្រូវអស់ឱកាស ខណៈក្រុមឈ្នះទាំង៤ត្រូវឡើងទៅចូលរួមជាមួយ៦០ក្រុមដែលសរុបទាំងអស់៦៤ក្រុម។

ដំណាក់កាលទី២

ក្រុមទាំង៦៤ត្រូវបានចាប់ឆ្នោតរើសដៃគូដែលមាន៣២គូដើម្បីធ្វើការប្រកួតដោយក្រុមចាញ់ធ្លាក់ និងក្រុមឈ្នះឡើងទៅវគ្គ១៦ក្រុមចុងក្រោយ។

នៅមណ្ឌលបាត់ដំបងនេះក៏មិនខុសពីខេត្តព្រះសីហនុដែរគឺត្រូវជ្រើសរើស៦ក្រុមឡើងទៅជុំផ្តាច់ព្រ័ត្រនៅរាជធានីភ្នំពេញ។ យន្តការនៃការរើសរើស៦ក្រុមនេះគឺ៤ក្រុមដែលឡើងវគ្គពាក់កណ្តាលផ្តាច់ព្រ័ត្រទទួលបានកៅអីឡើងទៅជុំផ្តាច់ព្រ័ត្រនៅរាជធានីភ្នំពេញតែម្តង ប៉ុន្តែក្រុមទាំង៤ត្រូវប្រកួតគ្នាវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រដើម្បីស្វែងរកចំណាត់ថ្នាក់ពីលេខ១ដល់លេខ៤ប្រចាំមណ្ឌលបាត់ដំបង។ ចំពោះ២ក្រុមទៀតត្រូវជ្រើសរើសចេញពីក្រុមធ្លាក់ទាំងអស់ដែលគិតទៅលើលទ្ធផលល្អជាងគេបើប្រៀបធៀបនឹងក្រុមធ្លាក់ផ្សេងៗទៀត។