Alves បកស្រាយរឿង ដែលខ្លួនធ្លាប់ហៅ CR7 ថាកីឡាករអាត្មានិយម
- 2017-02-21 01:59:54
- ចំនួនមតិ 0 | ចំនួនចែករំលែក 0
Alves បកស្រាយរឿង ដែលខ្លួនធ្លាប់ហៅ CR7 ថាកីឡាករអាត្មានិយម
ចន្លោះមិនឃើញ
Dani Alves អតីតខ្សែការពារក្រុម FC Barcelona បានបកស្រាយរឿង ដែលខ្លួនធ្លាប់ហៅ Cristiano Ronaldo តារាឆ្នើមក្រុម Real Madrid ថាជាកីឡាករអាត្មានិយម គឺមិនមែនមានន័យអាក្រក់ ដូចសារព័ត៌មានបានចុះផ្សាយឡើយ។
អំឡុងពេលលេងឲ្យ Barcelona ខ្សែការពារជម្រើសជាតិប្រេស៊ីល ត្រូវបានគេជឿថា មានការប៉ះទង្គិចគ្នាត្រង់ពាក្យសម្តី ដោយនិយាយឌឺដង CR7 ថាជា "កីឡាករអាត្មានិយម”។ ក្រោយមក Ronaldo ក៏ជឿថា Alves មានចេតនានិយាយអាក្រក់ពីខ្លួនមែន ហើយប្រធានក្រុមជម្រើសជាតិព័រទុយហ្គាល់រូបនេះ មិនបានរាក់ទាក់ Alves នោះទេ ក្នុងពិធីប្រគល់ពាន Ballon d'Or កាលឆ្នាំ២០១៥។
Alves ដែលចាកចេញពី Barcelona ទៅ Juventus កាលដើមរដូវកាលនេះ បាននិយាយម្សិលមិញថា៖ "ខ្ញុំសូមបញ្ជាក់ច្បាស់ៗថា ខ្ញុំគោរព Ronaldo ណាស់។ គ្រប់គ្នាប្រាប់ខ្ញុំថា គាត់ជាកីឡាករដ៏អស្ចារ្យ។ សម្រាប់ CR7 គឺខុសគេ។ គាត់ជាគូប្រជែងរបស់ខ្ញុំ ហើយខ្ញុំត្រូវប្រកួតជាមួយគាត់។ ពេលខ្ញុំនិយាយថា គាត់អាត្មានិយមណាស់ នោះមានន័យថា ពេលអ្នកឈ្នះ អ្នកនឹងក្លាយជាតារា ប៉ុន្តែពេលអ្នកចាញ់ អ្នកគាំទ្រនឹងដាក់កំហុសលើអ្នក។ ខ្ញុំនិយាយ ដោយការគោរពទេ។ ខ្ញុំក៏គិតលើ Lionel Messi ឬ Neymar ដូចគ្នា”។
“អ្វីដែលកើតឡើងគឺ សារព័ត៌មានបានប្រឌិត ដោយពួកគេបានចុះផ្សាយថា ខ្ញុំនិយាយអាក្រក់ពីគាត់។ ហើយ Ronaldo គាត់ជឿដូច្នោះ។ នោះជាមូលហេតុ ដែលគាត់មិនស្វាគមន៍ខ្ញុំ មិនសប្បាយចិត្តជាមួយខ្ញុំ នៅពិធីប្រគល់ពាន Ballon d'Or ឆ្នាំ២០១៥។ ខ្ញុំជឿថា អស់រយៈពេលជាយូរ Ronaldo គាត់បានពិចារណា ហើយដឹងថា ពាក្យរបស់ខ្ញុំមិនមែនមានន័យអាក្រក់ទេ។ ក្នុងប្រកួត El Clasico ក្រោយពិធីប្រគល់ពាន Balon d'Or..គាត់បានដើរមករកខ្ញុំ និងចាប់ដៃខ្ញុំ...ដូច្នេះរឿងត្រូវបានបញ្ចប់”។ កីឡាករវ័យ៣៣ឆ្នាំ បានបញ្ជាក់៕