Pep ថា Man City ញញើតខ្សែប្រយុទ្ធក្រុម Monaco ២នាក់យប់នេះ

2017-02-21 09:13:43
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការ Pep Guardiola របស់ក្រុម Manchester City បានលើកឡើងថា ក្រុមមេឃខៀវរបស់លោក ខ្លាចញញើតខ្សែប្រយុទ្ធ២នាក់របស់ក្រុម AS Monaco គឺ Radamel Falcao និង Valere Germain ក្នុងជំនួប UEFA Champions League វគ្គ១៦ក្រុម ជើងទី១ នៅកីឡដ្ឋាន Etihad វេលាម៉ោង ០២:៤៥នាទីយប់នេះ។

អ្នកចាត់ការ Pep Guardiola របស់ក្រុម Manchester City

ក្រុមដែលកំពុងឈរលេខ១ ក្នុងតារាង Ligue 1 របស់បារាំង Monaco បានស៊ុតបញ្ចូលទីគេសរុប ៧៦គ្រាប់ហើយរដូវកាលនេះ និងជាចំនួនមួយច្រើនជាងក្រុមណាៗទាំងអស់ នៅលីគកំពូលអឺរ៉ុបទាំង៥ ខណៈដែលអតីតកីឡាករក្រុម Chelsea និង Manchester United ខ្សែប្រយុទ្ធជម្រើសជាតិកូឡុំប៊ី Falcao ២៨ប្រកួត ស៊ុតបាន២២គ្រាប់ ហើយក្រៅពីនោះកីឡាករបារាំងវ័យ២៦ឆ្នាំ Germain ក៏រកបានច្រើនគ្រាប់ផងដែរ។

Pep បាននិយាយក្នុងសន្និសីទកាសែតម្សិលមិញថា៖ "ខ្សែប្រយុទ្ធរបស់ពួកគេ Falcao និង Germain គឺជាអ្នកពិឃាដក្នុងប្រអប់គ្រោះថ្នាក់។ ខ្សែការពារក្រោមរបស់គេ លេងដូចបម្រើស្លាប ហើយខ្សែបម្រើស្លាប លេងដូចបម្រើប្រយុទ្ធ។ ពួកគេជាក្រុមដ៏ល្អ និងគ្រោះថ្នាក់បំផុត។ ពួកគេជាក្រុមជោគជ័យបំផុតនៅអឺរ៉ុប បើគិតលើគ្រាប់បាល់រដូវកាលនេះ។ ពួកគេមានកីឡាករគុណភាពច្រើន ដូច្នេះមិនចាំបាច់មានឱកាសច្រើននោះទេ”។

Radamel Falcao ខ្សែប្រយុទ្ធឆ្នើមក្រុម Monaco

ខ្សែប្រយុទ្ធ Valere Germain របស់ក្រុម Monaco

ម្ចាស់ផ្ទះ Man City នឹងអវត្តមានកីឡាករសំខាន់ៗ៣នាក់យប់នេះគឺ ប្រធានក្រុម Vincent Kompany, ខ្សែបម្រើ Ilkay Gundogan និងខ្សែប្រយុទ្ធវ័យក្មេង Gabriel Jesus ដោយសារមានបញ្ហារបួស៕

ប្រភព៖ The Sun ប្រែសម្រួល៖ វិន ជីវ័ន្ត