ក្រុមផលិតរឿង Angelina Jolie បង្ហើបថ្ងៃចាក់បញ្ចាំងនៅខេត្តបាត់ដំបង

2017-02-21 23:08:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿង "មុនដំបូងខ្មែរក្រហមសម្លាប់លោកប៉ារបស់ខ្ញុំ" របស់អ្នកស្រី Angelina Jolie បានកំណត់ថ្ងៃបញ្ចាំងជាផ្លូវការនៅខេត្តបាត់ដំបង នៅចុងខែកុម្ភៈ ឆ្នាំ ២០១៧ នេះ។ នេះបើតាមលោក ជៀប សុវិជ្ជា នាយកមជ្ឈមណ្ឌលបណ្ដុះបណ្ដាលជំនាញ និងទទួលថតភាពយន្ត ប្រាប់ Sabay។

លោកមានប្រសាសន៍ថា រឿង "មុនដំបូងខ្មែរក្រហមសម្លាប់លោកប៉ារបស់ខ្ញុំ" នឹងត្រូវចាក់បញ្ចាំងនៅវាលបែកចានខេត្តបាត់ដំបងនៅថ្ងៃទី២៣ ខែ កុម្ភៈឆ្នាំ ២០១៧នេះហើយ។ ក្នុងនោះដែរមានសំបុត្រ ១០០០ ត្រូវបានអញ្ជើញរួចរាល់ហើយ"។

យ៉ាងណាក៏ដោយខុសពីការបញ្ចាំងនៅភ្នំពេញ និងសៀមរាប ការបញ្ចាំងរឿង "មុនដំបូងខ្មែរក្រហមសម្លាប់ប៉ារបស់ខ្ញុំ" បើកទូលាយជាងបន្តិច។ នាយកមជ្ឈមណ្ឌលដដែលបញ្ជាក់ថា ក្រុមការងារក៏បានត្រៀមកន្លែងខ្លះដែរ។ បន្ថែមពីលើនេះទៀត ករណីអ្នកទស្សនាលើសចំនួនសំបុត្រ ក៏អាចក្រាលកន្ទេលអង្គុយទស្សនាបានដែរ។

រីឯការចាក់បញ្ចាំងលក់សំបុត្រនៅតាមរោងកុនទាំងនៅរាជធានីភ្នំពេញ និងនៅតាមខេត្តចាប់ផ្តើមពីខែកញ្ញា ឆ្នាំ ២០១៧ ខាងមុខនេះ។ គួរបញ្ជាក់ថា រឿង "មុនដំបូងខ្មែរក្រហមសម្លាប់ប៉ារបស់ខ្ញុំ" នេះបានចាក់បញ្ចាំងនៅខេត្តសៀមរាបរួចហើយកាលពីថ្ងៃទី១៨ ខែ កុម្ភៈ ឆ្នាំ ២០១៧ មុនពេលមកបញ្ចាំងនៅរាជធានីភ្នំពេញយប់មិញនេះ៕