Man City វាយបកយកឈ្នះ Monaco ៥-៣ យ៉ាងអស្ចារ្យនៅ Champions League

2017-02-22 01:09:27
ចំនួនមតិ 0 | ចំនួនចែករំលែក 0

ចន្លោះមិនឃើញ

Manchester City បានវាយបកយកឈ្នះ Monaco របស់បារាំង ៥-៣ ក្នុងការប្រកួតវគ្គ១៦ក្រុមចុងក្រោយ Champions League ជើងទី១កាលពីយប់មិញ បន្ទាប់ពីត្រូវគូប្រជែងនាំមុខរហូត២ដង។

ការប្រកួតដែលធ្វើឡើងនៅកីឡដ្ឋាន Etihad ម្ចាស់ផ្ទះនាំមុខ១គ្រាប់មុនដោយ Sterling នៅនាទី២៦ ក្រោយការបញ្ជូនបាល់ឲ្យពីសំណាក់មិត្តរួមក្រុម Leroy Sané។ យ៉ាងណាក៏ដោយនៅនាទី ៣២ Falcao តែតឲ្យ Monaco បានស្មើវិញ មុនពេលដែល Mbappe ស៊ុតបាន១គ្រាប់ទៀតនៅចុងម៉ោងតង់ទីមួយ។

ចូលដល់តង់ទីពីរ Sterling បានបញ្ជូនបាល់ឲ្យ Agüero ស៊ុតតាមស្មើ ២-២ ត្រឹមនាទី៥៨ តែ Man City ត្រូវភ្លាត់ឲ្យ Monaco នាំមុខសារជាថ្មីនៅនាទី៦១ ក្រោយពេល Falcao ចុចរំលងអ្នកចាំទី Caballero បញ្ចូលទីយ៉ាងល្អ។

Monaco មិនទាន់មានសុវត្ថិភាពនៅឡើយទេពោលក្រោយនាំមុខបានតែប៉ុន្មាននាទី Silva បានលើកជ្រុងឲ្យ Agüero កាប់មួយជើងបញ្ចូលទីតាមស្មើសារជាថ្មីនៅនាទី ៧១ ហើយ ខ្សែការពារ John Stones និង ខ្សែបម្រើ Leroy Sané ស៊ុតម្នាក់មួយគ្រាប់បន្ថែមឲ្យក្រុមលោក Pep Guardiola យកជម្នះនៅជើងទី១ក្នុងលទ្ធផល ៥-៣។ លទ្ធផលមួយគូទៀត៖ Atletico Madrid បានយកឈ្នះម្ចាស់ផ្ទះ Bayer Leverkusen ៤-២៕