ឧកញ៉ា ម៉ុង ឫទ្ធី មួយថ្ងៃចំណាយពេលមិនតិចជាង ៦ ម៉ោងលើទូរសព្ទ

2017-02-22 03:12:59
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកជំនួញផ្នែកកសិឧស្សាហកម្មល្បីឈ្មោះ លោក ឧកញ៉ា ម៉ុង ឬទ្ធី ចំណាយលុយទៅលើទូរសព្ទទំនើបដើម្បីធ្វើជំនួញ មិនមែនប្រើសម្រាប់តែការសប្បាយ។ រាល់ថ្ងៃលោកចំណាយពេលលើទូរសព្ទមិនតិចជាង ៦ ម៉ោងឡើយ ដើម្បីគ្រប់គ្រងការងារក្នុងក្រុមហ៊ុន។

“ខ្ញុំអត់ចង់ឲ្យបង់លុយថ្លៃទូរសព្ទចោលទទេៗទេ។ មនុស្សមួយចំនួនប្រហែលគ្រាន់តែយកទូរសព្ទជាការកម្សាន្ត ហើយស្ដាប់ចម្រៀង តែខ្ញុំចង់ណែនាំឲ្យប្រើបច្ចេកវិទ្យាទាំងនេះ ទៅរកចំណូលវិញល្អជាង។ សព្វថ្ងៃខ្ញុំប្រើទូរសព្ទទំនើប ដើម្បីធ្វើជំនួញ មិនមែនជាការសប្បាយទេ"។

អ្នកជំនួញកសិឧស្សាហកម្មល្បីរូបនេះ បានលើកឡើងបន្តទៀតថា អ្នកខ្លះទិញទូរសព្ទទំនើបយកទៅលេងហ្វេសប៊ុក ឈ្លោះគ្នាបែកទឹកបែកដី តែបើជ្រុលចំណាយលុយច្រើនបែបនេះហើយ គួរតែប្រើជាប្រយោជន៍ណាមួយដល់ខ្លួនវិញទើបជាការល្អ។

លោកប្រាប់ថា លោកចំណាយពេលច្រើនលើទូរសព្ទដូចជាលើបណ្តាញសង្គមមាន Facebook, Whats Up និង Line ដើម្បីគ្រប់គ្រងលំហូរការងារប្រចាំថ្ងៃ។

“...ចំពោះខ្ញុំសំខាន់ណាស់ បើគ្មានបណ្ដាញសង្គមទាំងអស់ហ្នឹងទេ ខ្ញុំមិនអាចគ្រប់គ្រងក្រុមហ៊ុនបានឡើយ ព្រោះអីច្រើនផ្នែក អ៊ីចឹងទាល់តែរាយការណ៍មកតាមហ្នឹង ខ្ញុំមិនអាចទៅមើលអស់ទេ"។

លោកឧកញ៉ាបានបញ្ជាក់ថា បច្ចុប្បន្នជំនួញគ្រប់ប្រភេទរបស់លោក បានផ្ដល់ការងារដោយផ្ទាល់ដល់ប្រជាជនកម្ពុជាប្រហែល ១ម៉ឺននាក់ និងដោយប្រយោលរាប់ម៉ឺននាក់ផ្សេងទៀត។ បំណងធំរបស់លោក គឺចង់ឲ្យពលរដ្ឋខ្មែរចាកផុតពីភាពក្រីក្រ និងចង់ឲ្យកម្មករស្នាក់នៅផ្ទះថ្ម ហើយទទួលបានប្រាក់ខែលើសពី៥០០ដុល្លារ ក្នុងពេលដែលលោកនៅមានជីវិត៕