Man Utd ឡើងវគ្គ១៦ក្រុម Europa League តែរបួសកីឡាករអស់២នាក់

2017-02-23 02:18:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបិសាចក្រហម Manchester United បានកក់កៅអីឡើងវគ្គ១៦ក្រុម UEFA Europa League បន្ទាប់ពីឈ្នះ Saint-Etienne ១-០ នៅទឹកដីបារាំងយប់មិញ និងសរុបទាំង២ជើង ឈ្នះ ៤-០។ ប៉ុន្តែកីឡាករក្រុម Man Utd ២នាក់រងរបួស នឹងត្រូវអវត្តមានប្រកួតផ្ដាច់ព្រ័ត្រ EFL Cup នៅថ្ងៃអាទិត្យខាងមុខនេះ។

Henrikh Mkhitaryan (ស្តាំ) ស៊ុតចូលយប់មិញ

Henrikh Mkhitaryan ជាអ្នកស៊ុតគ្រាប់ជ័យជម្នះឲ្យ Man Utd យប់មិញ នៅនាទី១៦ បន្ទាប់ពី Juan Mata បញ្ជូនឲ្យ។ ចំណែកឯខ្សែការពារ Eric Bailly បានទទួលកាតក្រហម (លឿង២ដង) នាទី៦៣ នឹងត្រូវអវត្តមានប្រកួតបន្ទាប់នៅ UEFA Europa League។

បន្ទាប់ពីស៊ុតចូល Mkhitaryan បានរងរបួសសរសៃពួរ ត្រូវដូរចេញនាទី២៥ ខណៈដែល Michael Carrick ដូរចេញនាទី៦២ ដោយសាររបួសឈឺចាប់កំភួនជើង។ អ្នកចាត់ការ Jose Mourinho បានលើកឡើង ក្រោយចប់ការប្រកួតថា ខ្សែបម្រើទាំង២នាក់នេះ នឹងត្រូវអវត្តមានប្រកួតផ្ដាច់ព្រ័ត្រ EFL Cup ប៉ះ Southampton នៅ Wembley នាយប់ថ្ងៃអាទិត្យ។

“ខ្ញុំគិតថា Mkhitaryan មិនអាចជាទាន់នៅប្រកួតផ្ដាច់ព្រ័ត្រ (EFL Cup) ទេ។ ខ្ញុំគិតថាគាត់ និង Carrick នឹងត្រូវអវត្តមានប្រកួតនោះ។ ពួកគេទាំង២ជាកីឡាករសំខាន់សម្រាប់យើង។ គ្មានពួកគេនៅផ្ដាច់ព្រ័ត្រ ពិតជាធ្វើឲ្យយើងស្មុគស្មាញ ប៉ុន្តែខ្ញុំគិតថា Marouane Fellaini និង Bastian Schweinsteiger នឹងអាចជំនួសពួកគេបាន”។ អ្នកចាត់ការរហស្សនាម Special One បានបញ្ជាក់៕