គួច សុគុម្ភៈ បន្តអវត្តមាន២សប្ដាហ៍ទៀត ព្រោះមានរបួសពេលប្រកួត...

2017-02-23 02:26:51
ចំនួនមតិ 0 | ចំនួនចែករំលែក 0

ចន្លោះមិនឃើញ

“គួច សុគុម្ភៈ នឹងត្រូវអវត្តមាន២សប្ដាហ៍ទៀត ព្រោះគាត់មានរបួសកាលពីមុនបើករដូវកាលនេះ ពេលប្រកួតមិត្តភាពជាមួយក្រុមអាស៊ីអឺរ៉ុប”។ នេះបើតាមលោក មាស ចាន់ណា គ្រូបង្វឹកក្រុមណាហ្គាវើលបានបញ្ជាក់។

សុគុម្ភៈ បានខកខានបង្ហាញខ្លួននៅលើទីលានក្នុងប្រកួតផ្លូវការអស់ពេលជាងកន្លះឆ្នាំមកហើយ ក្រោយពីរងរបួសធ្ងន់ធ្ងរពេលលេងទល់ក្រុមស៊ីម៉ាក់នៅពហុកីឡដ្ឋានជាតិ ក្នុងការប្រកួតពានរង្វាន់លីគកំពូលកម្ពុជាកាលពីរដូវកាលមុន។ យ៉ាងណាមិញ ក្រោយពីព្យាបាលអស់ពេលជាយូរមកនោះ ខ្សែបម្រើរូបនេះបានត្រលប់មកចូលហ្វឹកហាត់វិញ ហើយក៏បានត្រៀមខ្លួនដើម្បីចូលរួមប្រកួតនៅរដូវកាលថ្មីនេះដែរ។

តែគួរឱ្យសោកស្ដាយ កាលពីប្រកួតមិត្តភាពកន្លងទៅនេះ រូបគេបានរងរបួសជាថ្មីម្ដងទៀត ដោយប៉ះជាមួយកីឡាកររបស់ក្រុមអាស៊ីអឺរ៉ុប ហើយរបួសនោះក៏ត្រូវឱ្យរូបគេនៅក្រៅទីលានរយៈពេល២សប្ដាហ៍ទៀតដែរ ទើបអាចចូលលេងវិញបាន។ បើតាមការបញ្ជាក់ពីលោក មាស ចាន់ណា គឺអតីតកីឡាករភ្នំពេញក្រោនរូបនេះ អាចនឹងចូលវិញបាន ពេលក្រុមណាហ្គាវើលប៉ះជាមួយក្រុមក្រសួងការពារជាតិ ក្នុងសប្ដាហ៍ទី៤នៃលីគកំពូលកម្ពុជា។

កីឡាករមកពីខេត្តកំពង់ធំខាងលើនេះ បានចាប់ផ្តើមលេងបាល់ទាត់នៅពេលរូបគេជាសិស្សសាលាបឋមសិក្សាកំពង់ធំ និងបន្តលេងឲ្យក្រុមវិទ្យាល័យបល្ល័ង្គ។ ឆ្នាំ២០០២ រូបគេបានជួយឲ្យវិទ្យាល័យបល្ល័ង្គ ជាប់ចំណាត់ថ្នាក់លេខ១ក្នុងការប្រកួតជ្រើសរើសបាល់ទាត់ទូទាំងប្រទេស។ ដោយសារតែមានទម្រង់លេងគួរឲ្យចាប់អារម្មណ៍ និង លេចធ្លោអ្នកគ្រប់គ្រងក្លឹប ខេមរាកីឡា លោក លាស់ សាឡាក់ខាន់ បានយក គួច សកុម្ភៈ មកធ្វើតេស្ត ហើយក៏ជាប់លេងក្រុមខេមរាកីឡានៅឆ្នាំ ២០០៦។ ក្រោយមករូបគេបានលេងឲ្យក្លឹបភ្នំពេញក្រោនឆ្នាំ២០១១ មុនពេលប្ដូរមកលេងឲ្យក្លឹបណាហ្គាវើលក្នុងឆ្នាំ២០១៥៕

អត្ថបទ៖ មុន្នីរម្យ