មិនដល់២ឆ្នាំផង ណា សាឌី ប្ដូរដៃគូរាប់ភ្លេច

2017-02-23 04:30:16
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងពិធីការិនីរបស់ស្ថានីយទូរទស្សន៍បាយ័នកញ្ញា ណា សាឌី បានប្រាប់ថា ខ្លួនបោះជំហានវិថីសិល្បៈមិនបានដល់២ឆ្នាំស្រួលបួលផង ប៉ុន្តែឆ្លងកាត់ដៃគូរាប់ភ្លេចហើយ ជុំវិញការធ្វើជាពិធីការិនីនេះ។

ពិធីករដែល សាឌី ធ្លាប់ចាប់ដៃគូមាន លោក ជា វណ្ណារិទ្ធ លោក ជួប សុភ័ក្រ លោក អៀង វិច្ឆ័យ លោក មង្គល សេង លោក ទ្រី តារាវុទ្ធ លោក យ៉ែម សំអូន ជាដើម។ មែនទែនទៅនៅបាយ័ន សាឌី កាន់កម្មវិធីតែ២ប៉ុណ្ណោះ គឺកម្មវិធី "ពិភពរីករាយ" និង "តន្ត្រីខារ៉ាបាវ" ប៉ុន្តែមូលហេតុដែលនាំឲ្យតារាសម្ដែងក្នុងរឿង"មន្តស្នេហ៍លេខា"ម្នាក់នេះមានឱកាសបាន ចាប់ដៃគូច្រើនគ្នាបែបនេះ ត្រូវបាននាងបញ្ជាក់ថា ភាគច្រើនខ្លួនទៅធ្វើកម្មវិធីខាងក្រៅពីការងារទូរទស្សន៍ ដូចជាសម្ពោធហាង សម្ពោធផលិតផលឲ្យក្រុមហ៊ុនធំៗជាដើម។

សាឌី ថ្លែងថា សប្បាយចិត្តខ្លាំងណាស់នៅពេលដែលបានធ្វើការងារមួយដែលខ្លួនពេញចិត្តបែបនេះ ជាពិសេសការងារពិធីការិនីតែម្ដង។ នាងថា ឆ្លងតាមការងារដែលបានធ្វើជាមួយដៃគូច្រើនដូចបានរៀបរាប់ខាងលើ ពិសេសជាមួយពិធីកររៀមច្បង ខ្លួនទទួលបានបទពិសោធន៍ល្អច្រើនណាស់។

ដោយសារតែឃើញស្នាដៃបែបនេះនាងបង្ហើបថា នៅខែក្រោយនេះថ្នាក់ដឹកនាំស្ថានីយទូរទស្សន៍បាយ័ន គ្រោងប្រគល់ឲ្យខ្លួនកាន់កម្មវិធី២ទៀត ដោយកម្មវិធីទាំង២នោះ ទាក់ទង់ការផ្សាយផ្ទាល់លើ ការប្រគំតន្ត្រីតែម្ដង។ ឈ្មោះកម្មវិធី សាឌី មិនទាន់ដឹងឡើយ គ្រាន់តែដឹងតម្រុយខ្លះប៉ុណ្ណោះ។

ណា សាឌី ក្រៅពីការងារជាពិធីការិនី តារាស្រីរូបនេះធ្លាប់បានថតMV ស្ប៉ត និង ខ្សែភាពយន្តជាច្រើនរឿងមកហើយ។ រឿងដែលមានធ្លាប់ថតមានដូចជា "សុបិនយុវវ័យ" "ព្យុះជីវិតចិត្តអ្នកលេង" "ផ្លូវមរណៈ" និង រឿង "មន្តស្នេហ៍លេខា" ដែលកំពុងដំណើរការថត៕