ប្រាសាក់ ប្ដូរនិមិត្តសញ្ញាថ្មី ឲ្យសាធារណជនងាយចំណាំ

2017-02-25 03:15:36
ចំនួនមតិ 0 | ចំនួនចែករំលែក 0

ចន្លោះមិនឃើញ

អនុលោមតាមប្រសាសន៍ណែនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានថ្លែងដោយអនុលោមតាមច្បាប់ស្តីពីម៉ាកពាណិជ្ជនាម ក្នុងសម័យប្រជុំពេញអង្គគណៈរដ្ឋមន្ត្រី កាលពីថ្ងៃទី១៧ កុម្ភៈ ២០១៧ និងក្នុងពិធីប្រគល់សញ្ញាប័ត្រដល់និស្សិតសាកលវិទ្យាល័យភ្នំពេញអន្តរជាតិ កាលពីព្រឹកថ្ងៃទី២២ កុម្ភៈ ២០១៧ តំណាងគ្រឹះស្ថានមីក្រូហិរញ្ញវត្ថុប្រាសាក់ បានជួបពិភាក្សាជាមួយតំណាងក្រសួងពាណិជ្ជកម្មដើម្បីសុំផ្លាស់ប្ដូរនិមិត្តសញ្ញាថ្មី និងការប្រតិបត្តិតាមច្បាប់ស្តីពីម៉ាកពាណិជ្ជនាម នៅរសៀលថ្ងៃទី២២ ដដែល។

ក្នុងកិច្ចប្រជុំនេះ ថ្នាក់ដឹកនាំក្រសួងពាណិជ្ជកម្មបានលើកឡើងពីច្បាប់ស្ដីពីម៉ាកពាណិជ្ជនាម និងបញ្ជាក់ពីការផ្លាស់ប្ដូរនិមិត្តសញ្ញាថ្មីរបស់គ្រឹះស្ថានមីក្រូហិរញ្ញវត្ថុនានា ដើម្បីកុំឲ្យមានការភ័ន្តច្រឡំពីសាធារណជន។ ថ្នាក់ដឹកនាំក្រសួងក៏បានស្នើដល់មន្ត្រីនៃនាយកដ្ឋាន កម្មសិទ្ធិបញ្ញា សហការជាមួយគ្រឹះស្ថានមីក្រូហិរញ្ញវត្ថុប្រាសាក់ ដើម្បីរៀបចំលិខិតស្នាមចុះបញ្ជីការនិមិត្តសញ្ញាថ្មី។

ជាការឆ្លើយតប ថ្នាក់គ្រប់គ្រងគ្រឹះស្ថានមីក្រូហិរញ្ញវត្ថុប្រាសាក់ បានឯកភាពផ្លាស់ប្ដូរនិមិត្តសញ្ញាថ្មី ដែលប្ដូរសញ្ញាប្រាក់រៀល «៛៛៛» ចេញ និងជំនួសវិញដោយពាក្យ «ប្រាសាក់» ដែលធ្វើឲ្យអតិថិជនកាន់តែងាយចំណាំ និងមិនភ័ន្តច្រឡំថា គ្រឹះស្ថានមីក្រូហិរញ្ញវត្ថុប្រាសាក់ ជាគ្រឹះស្ថានរបស់រដ្ឋនោះទេ។ ថ្នាក់គ្រប់គ្រងគ្រឹះស្ថានមីក្រូហិរញ្ញវត្ថុប្រាសាក់ ក៏បានថ្លែងអំណរគុណដល់ថ្នាក់ដឹកនាំក្រសួង និងមន្ត្រីជំនាញ ដែលបានជួយសម្របសម្រួលដំណើរការរៀបចំផ្លាស់ប្ដូរនិមិត្តសញ្ញាថ្មី ដើម្បីគ្រឹះស្ថានអាចបន្តការបម្រើសេវាហិរញ្ញវត្ថុជូនប្រជាជនកម្ពុជាបន្តទៀត។

បញ្ជាក់ជាថ្មីថា គ្រឹះស្ថានមីក្រូហិរញ្ញវត្ថុប្រាសាក់ ជាគ្រឹះស្ថានឯកជន និងមិនមែនជាគ្រឹះស្ថានរបស់រដ្ឋទេ ហើយគ្រឹះស្ថានបានដកចេញនិមិត្តសញ្ញា (Logo) បច្ចុប្បន្នរបស់ខ្លួនពីបណ្ដាអគារការិយាល័យ សម្ភារៈ ឯកសារផ្សព្វផ្សាយ និងពីបណ្ដាញផ្សព្វផ្សាយនានា ដើម្បីកុំមានការភ័ន្តច្រឡំពីអតិថិជន និងសាធារណជន។ អំឡុងពេលដំណើរការផ្លាស់ប្ដូរនិមិត្តសញ្ញាថ្មីនេះ ប្រាសាក់ នៅតែបើកបម្រើសេវាជូនអតិថិជន និងសាធារណជនដូចធម្មតា៕