ត្រាំ ប្រកាសមិនចូលរួមទទួលទានអាហារប្រចាំឆ្នាំជាមួយអ្នកកាសែត

2017-02-26 04:14:37
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ដូណាល់ ត្រាំ បានក្លាយជាប្រធានាធិបតីអាមេរិកទី១ ក្នុងរយៈពេល ៣៦ឆ្នាំចុងក្រោយ ដែលប្រកាសមិនចូលរួមពិធីទទួលទានអាហារប្រចាំឆ្នាំជាមួយអ្នកឆ្លើយឆ្លងព័ត៌មាននានានៅថ្ងៃទី២៩ មេសាខាងមុខ។

ជំនួបរវាងមន្ត្រីរដ្ឋាភិបាល ប្រធានាធិបតី ជាមួយអ្នកសារព័ត៌មានល្បីៗ គឺជាប្រពៃណីរាប់សិបឆ្នាំមកហើយ របស់សហរដ្ឋអាមេរិក ដើម្បីធ្វើឲ្យភាគីពាក់ព័ន្ធទាំងអស់កាន់តែមានភាពជិតស្និទ្ធនឹងគ្នា។ ពិធីជួបជុំនេះបង្កើតឡើងដំបូងក្នុងឆ្នាំ ១៩២១ ហើយក្នុងឱកាសនោះក៏មានការផ្ដល់ពានរង្វាន់ដល់អ្នកកាសែត និងអាហារូបករណ៍នានាផងដែរ។

ចំណែក លោក ដូណាល់ ត្រាំ បានប្រកាសថាមិនចូលរួមកម្មវិធីនេះឡើយកាលពីថ្ងៃសៅរ៍ម្សិលមិញ នៅលើបណ្ដាញសង្គម Twitter របស់ខ្លួន ប៉ុន្តែមិនបង្ហាញមូលហេតុ។ លោកបានបង្ហោះថា៖ "ខ្ញុំនឹងមិនចូលរួមពិធីទទួលទានអាហាររវាងសេតវិមាន និងសមាគមអ្នកឆ្លើយឆ្លងព័ត៌មាននៅឆ្នាំនេះទេ។ សូមជួនពរឲ្យអ្នកទាំងអស់គ្នាសំណាងល្អ ហើយរីករាយនៅល្ងាចនោះ"។

ប្រធានាធិបតីចុងក្រោយបំផុត ដែលមិនចូលរួមពិធីនោះ គឺលោក Ronald Reagan ក្នុងឆ្នាំ១៩៨១ ប៉ុន្តែលោកមានហេតុផលសមរម្យ ដោយសារទើបរួចផុតពីការប៉ងធ្វើឃាត។ យ៉ាងណាក្ដី លោកក៏បាននិយាយតាមទូរសព្ទបែបកំប្លែងទៅកាន់ពិធីនោះថា៖ "ពេលអ្នកណាប្រាប់ឲ្យចូលឡាន ចូលឲ្យលឿនទៅ"។

ចំពោះលោក ត្រាំ វិញ មិនបានបង្ហាញមូលហេតុច្បាស់លាស់ទេ ប៉ុន្តែប្រធានាធិបតីអាមេរិកទី៤៥ រូបនេះ មិនសូវត្រូវជាមួយអ្នកកាសែតទេ។ កាលពីពេលថ្មីៗលោកថែមទាំងបង្ហោះលើបណ្ដាញសង្គម Twitter របស់ខ្លួនថា សារព័ត៌មានគឺជាសត្រូវរបស់ប្រជាជនអាមេរិក៕

ប្រភព៖ CNN ប្រែសម្រួល៖ គង់ វិសាល