ប្រជាជនបារាំងធ្វើញត្តិហៅ អូបាម៉ា ឲ្យមកធ្វើជាប្រធានាធិបតី

2017-02-27 02:41:24
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតប្រធានាធិបតីអាមេរិកទី៤៤ ទើបផុតអាណត្តិ បារ៉ាក់ អូបាម៉ា ត្រូវបានពលរដ្ឋបារាំងមួយចំនួនគោរពស្រលាញ់ការដឹកនាំប្រទេស ធ្វើឲ្យពួកគេនាំគ្នាប្រមូលញត្តិឲ្យបានច្រើនដើម្បីអំពាវនាវឲ្យលោក ចូលរួមការបោះឆ្នោតជ្រើសរើសប្រធានាធិបតីបារាំងនៅខែមេសាខាងមុខ។

រូបភាពផ្ដល់សិទ្ធិដោយ Reuters

ក្រុមអ្នកធ្វើញត្តិបែបនេះ ព្រោះពួកគេមិនពេញចិត្តនឹងបេក្ខជនប្រធានាធិបតីបច្ចុប្បន្ន ទើបសម្រេចស្វែងរកបេក្ខជនចូលរួមប្រកួតម្នាក់ទៀតជាលោក អូបាម៉ា។

ញត្តិនោះឈ្មោះថា Obama17 មានគោលបំណងស្វែងរកការគាំទ្រឲ្យបាន ១លានសំឡេង ដើម្បីបញ្ចុះបញ្ចូលលោកអូបាម៉ា មកប្រកួតយកតំណែងប្រធានាធិបតីបារាំង។

នៅប៉ុន្មានថ្ងៃចុងក្រោយនេះ គេឃើញផ្ទាំងរូបភាពផ្សព្វផ្សាយប្រមាណ ៥០០សន្លឹកត្រូវបានបិទតាមទីសាធារណៈទូទាំងក្រុងប៉ារីសដោយជំរុញឲ្យគ្រប់គ្នាចូលទៅគាំទ្រញត្តិក្នុងគេហទំព័ររបស់ពួកគេ។

ក្នុងញត្តិខាងលើបានសរសេរពាក្យស្លោកជាភាសាបារាំងថា "Oui on peut” មានន័យថា "បាទ/ចាស យើងអាច" និងអមដោយពាក្យថា "អតីតមេបញ្ជាការរូបនេះសក្ដិសមបំផុតលើលោកក្នុងការបន្តធ្វើជាប្រធានាធិបតីបារាំង។ យើងប្រាថ្នាយកឈ្នះបញ្ហាមួយដោយជ្រើសរើសប្រធានាធិបតីបរទេសមកដឹកនាំប្រទេសដ៏ស្រស់ស្អាតរបស់យើង។ លោកអូបាម៉ា បានជាប់ជាប្រធានាធិបតីអាមេរិកដល់ទៅ២អាណត្តិ ហេតុអ្វីមិនអាចជួលគាត់ឲ្យមកធ្វើជាប្រធានាធិបតីបារាំងបាន?" ទោះជាយ៉ាងណាមកទល់ពេលនេះ គេមិនទាន់ដឹងថាលោកអូបាម៉ា ប្រតិកម្មយ៉ាងណានោះទេ៕