ក្រុមហ៊ុន CLEAR និងលោក Leonardo ប្ដេជ្ញាជួយជម្រើសជាតិឱ្យជោគជ័យឆ្នាំនេះ
- 2017-03-06 09:01:38
- ចំនួនមតិ 0 | ចំនួនចែករំលែក 0
ក្រុមហ៊ុន CLEAR និងលោក Leonardo ប្ដេជ្ញាជួយជម្រើសជាតិឱ្យជោគជ័យឆ្នាំនេះ
ចន្លោះមិនឃើញ
ក្រុមហ៊ុន CLEAR បានជួយជ្រោមជ្រែងដល់សហព័ន្ធបាល់ទាត់កម្ពុជាអស់ពេលជាយូរមកហើយ ក្នុងនោះពួកគេក៏បានជួយទាំងថវិកានិងជំរុញតាមផ្នែកផ្សេងៗជាច្រើនក្នុងការប្រកួតមិត្តភាពអន្តរជាតិ CLEAR កាលពីពេលកន្លងទៅ ក៏ដូចជាការប្រកួតខាងមុខនេះ។
លោក Freddy Ong នាយកក្រុមហ៊ុន CLEAR នៅកម្ពុជាបានបញ្ជាក់ឱ្យដឹងដូច្នេះថា៖ “ក្រុមហ៊ុន Clear មិនត្រឹមតែចង់ជួយដល់ក្រុមជម្រើសជាតិកម្ពុជាប៉ុណ្ណោះទេ ប៉ុន្តែពួកយើងក៏មានគម្រោងជួយដល់ថ្នាលយុវជនផងដែរ។ ដោយរាល់សកម្មភាពកីឡាបាល់ទាត់នៅកម្ពុជា គឺ CLEAR តែងតែចង់ចូលរួមជាមួយជានិច្ច។ ដូចដែលបានឃើញស្រាប់ហើយ ថាកាលពីប្រកួតមិត្តភាពអន្តរជាតិកន្លងទៅ គឺ Clear ចូលរួមបានយ៉ាងច្រើន”។
ដូចគ្នាទៅនឹងក្រុមហ៊ុន CLEAR ដែរ លោក Leonardo Luis បានបញ្ជាក់យ៉ាងច្បាស់ថាលោកនឹងធ្វើឱ្យអស់ពីសមត្ថភាពក្នុងការជួយកម្ពុជាឱ្យដើរទៅមុខ។ ចាប់ពីពេលនេះទៅ លោកគឺជាមនុស្សម្នាក់រស់នៅប្រទេសកម្ពុជា ដើម្បីជួយក្រុមកម្ពុជា។ ចំពោះកីឡាករវិញ លោកនឹងចាប់ផ្ដើមមើលជើងចាប់ពីសប្ដាហ៍នេះទៅ ដោយមិនទាន់ធ្វើការជ្រើសរើសនៅឡើយនោះទេ។ ប្រសិនណាបើកីឡាករណាម្នាក់ល្អ និងអាចជាប់ជម្រើសជាតិបាន ប៉ុន្តែបើមិនល្អលោកមិនចង់បានឡើយ។
សូមបញ្ជាក់ថា CLEAR បានបង្ហាញខ្លួនជួយបាល់ទាត់កម្ពុជាច្រើនមកហើយ រួមមានការប្រកួតមិត្តភាពជាមួយក្រុមសិង្ហបុរី ហុងកុង ស្រីលង្កា និងក្រុមយុវជនក្រោមអាយុ១៦ឆ្នាំប្រកួតជាដើម។ ខណៈពេលខាងមុខនេះ CLEAR ក៏នឹងចូលរួមក្នុងការប្រកួតមិត្តភាពកម្ពុជាជាមួយក្រុមជម្រើសជាតិឥណ្ឌានាថ្ងៃទី២២ ខែមីនា ឆ្នាំ២០១៧ នៅពហុកីឡដ្ឋានជាតិផងដែរ៕