គ្រូណាហ្គា ប្រាប់ថា ក្នុងវគ្គទី១ក្រុមរបស់លោកគួរតែស៊ុតស៊ីម៉ាក់លើស៣គ្រាប់

2017-03-06 03:03:44
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក មាស ចាន់ណា គ្រូបង្វឹកក្រុមបាល់ទាត់ណាហ្គាវើលលើកឡើងថា លោករំពឹងក្រុមរបស់ខ្លួនអាចទាត់បញ្ចូលទីដៃគូស៊ីម៉ាក់លើសពី៣គ្រាប់ត្រឹមវគ្គទី១ កាលពីម្សិលមិញនេះក្នុងការប្រកួតលីគកំពូលកម្ពុជាសប្ដាហ៍ទី៣នៅពហុកីឡដ្ឋានជាតិ។

ក្រុមបាល់ទាត់ណាហ្គាវើលបានយកឈ្នះក្រុមស៊ីម៉ាក់ដោយលទ្ធផល៣-០កាលពីម្សិលមិញ។ ជំនួបនេះក្រុមរបស់លោក មាស ចាន់ណា បានព្យាយាមបង្កើតឱកាសយ៉ាងច្រើន ហើយទម្លាយសំណាញ់ទីដៃគូបានចំនួន២គ្រាប់ត្រឹមវគ្គទី១ នៅនាទី៨ និងនាទី៤៣ ព្រមទាំងបន្ថែមគ្រាប់ទី៣ នៅវគ្គទី២នាទីទី៨១។

លោក មាស ចាន់ណា

ក្រោយចប់ការប្រកួតគ្រូបង្វឹកមានស្រុកកំណើតមកពីខេត្តកំពង់ស្ពឺរូបនេះបានឲ្យដឹងថា ក្រុមរបស់លោកមិនគួរធ្វើមិនបានលើសពី ៣គ្រាប់នៅវគ្គទី១នោះទេ។ លទ្ធផលនេះធ្វើឲ្យខុសការរំពឹងទុករបស់លោក ដែលមើលឃើញពីចំណុចខ្សោយរបស់ស៊ីម៉ាក់នៅលើទីលាន។

គ្រូបង្វឹកកម្រិត A-License រួបនេះបន្ថែមថា ចាប់ផ្ដើមដើមវគ្គទី១ កូនក្រុមរបស់លោកហាក់លេងត្រូវតាមការចង់បានរបស់លោក និងបង្កើតឱកាសជាបន្ទាប់។ ប៉ុន្តែក្រោយរកបានពីរគ្រាប់នៅដើមវគ្គទី១កូនក្រុមរបស់ខ្លួនទាំងអស់ហាក់លេងតាមរបៀបខ្លួនឯង ពោលគឺបែកទម្រង់មិនវាយស្រុកដូចកាលដើមវគ្គទី១នោះទេ។

និយាយពីមុនការប្រកួតគ្រូបង្វឹករូបនេះដឹងមុនថា ក្រុមរបស់លោក នឹងឈ្នះទៅលើក្រុមស៊ីម៉ាក់យ៉ាងតិច៣គ្រាប់។ ខណៈការប្រកួតចាប់ផ្ដើមបានប្រហែល ៥នាទីលោកមើលឃើញថា គ្រាប់បាល់ដែលឈ្នះតិចបំផុតក៏ ៤ឬ ៥គ្រាប់ដែរ។

ក្រុម ណាហ្គាវើល

ពីរប្រកួតចាប់ផ្ដើមរបស់ណាហ្គាវើលគឺឈ្នះក្រុមអគ្គិសនី៤-១ ចាញ់ភ្នំពេញក្រោន១-០។ ចំណែកលទ្ធផលគូផ្សេងទៀតដែលប្រកួតម្សិលមិញ គឺព្រះខ័នរាជស្វាយរៀងយកលត់វេស្ទើនភ្នំពេញ៥-០ ខណៈភ្នំពេញក្រោនស្មើប៉ូលិស២-២៕