ប្ដីប្រពន្ធចំណាស់ រៀបការ ៨១ឆ្នាំ មិនធ្លាប់បែកគ្នាសូម្បីមួយថ្ងៃ
- 2017-03-08 03:24:16
- ចំនួនមតិ 0 | ចំនួនចែករំលែក 0
ប្ដីប្រពន្ធចំណាស់ រៀបការ ៨១ឆ្នាំ មិនធ្លាប់បែកគ្នាសូម្បីមួយថ្ងៃ
ចន្លោះមិនឃើញ
អាចជាស្នេហាស្មោះស្ម័គ្រកម្របានជួប និងមានមនុស្សជាច្រើនកំពុងប្រាថ្នាចង់បាន។ ប្ដីប្រពន្ធចំណាស់មួយគូនៅក្រុងChongqing ប្រទេសចិន បានរៀបការសាងអនាគតជាមួយគ្នា ៨១ឆ្នាំទាំងមានសុភមង្គលបំផុត ហើយមិនធ្លាប់បែកគ្នាសូម្បីមួយថ្ងៃណាឡើយ។
លោកយាយ Wu Xi'an ជាប្រពន្ធមានអាយុ ១០០ឆ្នាំ ចំណែកប្ដី Xiang Yongshan មានអាយុ ៩៩ឆ្នាំ។ ពេលលោកយាយ Wu មានអាយុ ៣ឆ្នាំ ឪពុកម្ដាយបានចាប់ផ្ដើមធ្វើតាមប្រពៃណីបត់ប្រអប់ជើងឲ្យតូចដើម្បីរកប្ដី បើទោះបីលោកយាយស្រែកយំដោយភាពឈឺចាប់យ៉ាងណាក្ដី ព្រោះវាជាទំនៀមទម្លាប់របស់ប្រទេសចិនពីបុរាណ។ ពេលឈានចូលអាយុ ៦ឆ្នាំ គ្រួសារលោកយាយ Wu បានយល់ព្រមជាមួយគ្រួសារលោក Xiang ថានឹងផ្សំផ្គុំពួកគេទាំងពីរ។
ដោយសារអនុវត្តតាមទំនៀមទម្លាប់បានល្អ លោកយាយ Wu ពិតជាបានរៀបការជាមួយលោកតា Xiang ដែលជាគ្រួសារមួយមានជីវភាពធូរធារជាង ព្រោះមានដីស្រែចម្ការច្រើន។ កាលនៅតូច លោកយាយ Wu មិនធ្លាប់ចូលរៀននៅសាលាទេ ហើយអក្សរដែលចំណាំបានគឺមានតែឈ្មោះរបស់លោកយាយ និងប្ដីប៉ុណ្ណោះ។ នៅអាយុ ១៩ឆ្នាំ លោកយាយ Wu ក៏បានរៀបការជាមួយប្ដីតាមប្រពៃណី។
បច្ចុប្បន្ន អាពាហ៍ពិពាហ៍មួយនេះ មានអាយុកាល ៨១ឆ្នាំហើយ ប៉ុន្តែលោកយាយ Wu និងលោកតា Xiang នៅតែកាន់ដៃគ្នាដើរយ៉ាងផ្អែមល្ហែម មិនធ្លាប់បែកគ្នាមួយថ្ងៃណាឡើយ។ ចំណងស្នេហ៍ដ៏រឹងមាំនេះ បានបន្សល់ទុកកូនចៅ ៥៥នាក់ ហើយពេលបុណ្យទានម្ដងៗ ពួកគេតែងត្រលប់មកជុំគ្នាដើម្បីជប់លៀងយ៉ាងរីករាយ៕