សេន ប៊ុនថេន, ម៉ឺន សុភា និង ឡៅ ចន្រ្ទា ប៉ះសុទ្ធតែជើងខ្លាំងនៅបារាំង

2017-03-10 04:51:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងជួរមុខរបស់កម្ពុជា ៣រូប រួមមានកីឡាករចាស់វស្សា សេន ប៊ុនថេន,ម៉ឺន សុភា និងអ្នកប្រដាល់មកពី ទ័ពពិសេសឆ័ត្រយោង៩១១ ឡៅ ចន្រ្ទា នឹងចេញទៅប្រទេសបារាំង នាដើមខែមេសា ឆ្នាំ ២០១៧ ខាងមុខនេះដើម្បីប្រកួតយកខ្សែក្រវាត់នៅទីនោះ។

លោក ហួរ សុទ្ធី ខាងឆ្វេងគេបង្អស់

លោក ហួរ សុទ្ធី ដែលជាម្ចាស់ក្លឹបប្រដាល់ បុរាណ នៅប្រទេសបារាំងនិងជាអ្នកយកកីឡាករកម្ពុជា៣រូបខាងលើទៅប្រកួតបានឲ្យដឹងថា លោកពិតជាមានការរីករាយខ្លាំង ពេលដែលបានកីឡាករកម្ពុជាមកប្រកួតនៅថ្ងៃទី១៥ ខែមេសា ឆ្នាំ ២០១៧ នៅប្រទេសបារាំងនេះ។ កីឡាករបរទេសដែលនឹងជួបជាមួយអ្នកប្រដាល់កម្ពុជាសុទ្ធតែជាជើងខ្លាំង ធ្លាប់ប្រឡូកសង្វៀនច្រើនសូម្បីតែនៅប្រទេសថៃក៏ពួកគេធ្លាប់មកចូលរួមប្រកួតដែរ។

កីឡាករ សេន ប៊ុនថេន vs Vapi Kevin

ម៉ឺន សុភា vs Lawson Penningto

ការចេញទៅប្រកួតនៅប្រទេសបារាំងលើកនេះ លោកចង់អភិវឌ្ឍន៍វិស័យប្រដាល់នៅ បារាំង ឲ្យកាន់តែរីកចម្រើននិងផ្សព្វផ្សាយពីក្បាច់គុនបុរាណមួយនេះឲ្យបរទេសបានស្គាល់បន្ថែមទៀត។ ម្ចាស់ក្លឹបប្រដាល់ម្នាក់នេះបន្ថែមទៀតថា នៅពេលប៉ុន្មានឆ្នាំចុងក្រោយនេះប្រជាជននៅបារាំងមានការចាប់អារម្មណ៍លើប្រដាល់គុនខ្មែរខ្លាំង ហើយថែមទាំងចង់រៀនសូត្រទៀតផង។ ការចេញទៅលើកនេះ វាជាបទពិសោធន៍ល្អមួយសម្រាប់កីឡាករកម្ពុជាយល់ដឹងពីការហ្វឹកហាត់បែបទំនើបនៅប្រទេសបារាំង ជាជំហានមួយសម្រាប់ពួកគេចង់បង្កើតក្លឹបប្រដាល់ផ្ទាល់ខ្លួននៅពេលអនាគត។ ការប្រកួតនៅបារាំងនេះ ក៏ជាឱកាសដែលជើងខ្លាំងកម្ពុជាទទួលបានប្រាក់កម្រៃច្រើន ពីការប្រកួតក៏ដូចជាការបង្ហាត់កីឡាករកីឡាការិនីនៅទីនោះផងដែរ។

ឡៅ ចន្រ្ទា vs Celestion Mendes

កីឡាករ សេន ប៊ុនថេន ត្រូវជួប Vapi Kevin,ម៉ឺន សុភា ប៉ះ Lawson Penningto និង ឡៅ ចន្រ្ទា ប៉ះ Celestion Mendes ហើយកីឡាករទាំង៣នាក់នេះជាសុទ្ធតែជាជនជាតិបារាំង។ ពួកគេនឹងត្រូវឡើងសង្វៀននៅជាយទីក្រុងប៉ារីស ប្រទេសបារាំងនៅថ្ងៃទី១៥ ខែមេសា ឆ្នាំ ២០១៧ ខាងមុខនេះ៕

អត្ថបទ៖ នួន ស៊ីណា