ជឿអត់ថា យុវជនបច្ចុប្បន្នមានលទ្ធភាពស្គាល់គ្នាច្រើន ដោយមិនចាំបាច់មានការណែនាំពីចាស់ទុំ?

2017-03-11 02:54:30
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរាណខ្មែរយើងនិយមរៀបចំផ្គូផ្គងគូស្រករទៅតាមទំនៀមទម្លាប់ប្រពៃណីដោយបុរស ឬនារីនៅក្នុងភូមិស្រឡាញ់ គ្នាត្រូវស្វែងរកចាស់ទុំនៅក្នុងស្រុកភូមិដើម្បីផ្សំផ្គុំឲ្យ ហើយភាគច្រើនការជ្រើសរើសគូស្រករតែងធ្វើឡើងតាមរយៈការស៊ើបសួរពីចាស់ទុំទៅលើពូជអម្បូរ និងការសិក្សារៀនសូត្ររបស់បុរស ឬនារីក្នុងសម័យនោះ។

បច្ចុប្បន្ននេះប្រពៃណីបែបនេះហាក់សាបរលាបខ្លះៗហើយបើទោះបីជាមិនទាន់បាត់ទាំងស្រុង ស្របពេល ដែលបច្ចេកវិទ្យាកាន់តែរីកចម្រើនយុវវ័យសម័យថ្មីមានលទ្ធភាពស្គាល់គ្នាច្រើនដោយមិនចាំបាច់មានការណែនាំពីចាស់ទុំ។

ទូរស័ព្ទដៃ អ៊ីនធឺណិត អ៊ីមែល ហ្វេសប៊ុក ឡាញ បានក្លាយជាមធ្យោបាយរបស់យុវជនសម័យថ្មីនេះបានជួបគ្នា និងស្គាល់គ្នា។ យុវជន ហេង ពិសិដ្ឋ ដែលជាបុគ្គលិកលក់គ្រឿងអេឡិចត្រូនិក បានឲ្យដឹងថា តាមពិតទៅខ្ញុំ និងមិត្តស្រីរបស់ខ្ញុំគឺបានស្គាល់គ្នាតាមរយៈមិត្តភ័ក្ដិដែលធ្វើការជាមួយគ្នា ហើយពួកយើងបានទាក់ទង និងនិយាយគ្នាតាម Chat ។

ពិសិដ្ឋ បន្តថា ពួកយើងបានស្គាល់គ្នាជាងមួយឆ្នាំមកហើយ ជារៀងរាល់ថ្ងៃពួកយើងតែងតែនិយាយគ្នាតាម Chat ឬនិយាយទូរស័ព្ទខ្លីៗជាមួយគ្នាជាប្រចាំ ។ ក្រោយមកពួកយើងក៏បានសម្រេចចិត្តណែនាំឲ្យចាស់ទុំទាំងសងខាងគាត់ស្គាល់ ពេលនោះគឺល្អដែរ ដោយពួកគាត់មិនបានជំទាស់ ឫហាមមិនឲ្យពួកយើងទាក់ទងគ្នានោះទេ។

សម្រាប់យុវជន ឡុង សារិទ្ធ ជាបុគ្គលិកដឹកជញ្ជួនទំនិញរបស់ក្រុមហ៊ុនឯកជនមួយ ដែលទើបរៀបការរួចថ្មីៗនេះបានឲ្យដឹងថា មុនឈានដល់បានរៀបការ ដំបូងខ្ញុំ និងប្រពន្ធរបស់ខ្ញុំបានស្គាល់គ្នាតាមរយៈមិត្តភ័ក្ដិគាត់ (ប្រពន្ធ) បានឲ្យលេខទូរស័ព្ទ ក្រោយពួកយើងបាននិយាយគ្នាតាមទូរស័ព្ទ និងលេង Facebook ជារៀងរាល់ថ្ងៃនៅពេលទំនេរពីការងារ ឫមុនពេលចូលគេង។

សារិទ្ធ បន្តថា ដោយបាននិយាយគ្នា និងស្គាល់ចិត្តថ្លើមគ្នាជាងមួយឆ្នាំមក ខ្ញុំក៏បានណែនាំគាត់ឲ្យម៉ាក់ប៉ាបានស្គាល់ ក្រោយមកពួកយើងក៏បានប្រាប់ឲ្យចាស់ទុំទាំងសងខាងបានដឹងឮ ហើយពេលនោះពួកគាត់មិនបានជំទាស់ ឫមិនឲ្យទាក់ទងគ្នានោះទេ។ បន្ទាប់មកខ្ញុំក៏បានសុំឲ្យម៉ាក់ប៉ាចូលទៅស្តីដណ្តឹងខាងស្រី ក្រោយមកចាស់ទុំទាំងសងខាងក៏បានរើសថ្ងៃរើសវេលា ដើម្បីរៀបចំពិធីមង្គលការតែម្តង៕

អត្ថបទ៖ ហេង នាង (CCJ)